Moses Kaphungtungli
Mosesna Nebo kakhonli kazat, kala ithum Avāna a kazat mangaya ngalei hi kachiva ali kanungashok. A chili kum shakhane kathumra thiyi, mik kathakhali khale kakhanglakra, kala ithum Avāna ali mi mangatheili phunmirluiya. Israelna zingthum kathum ngakashiya; chiwui thuili mayonphalung kakhane khale Avāna ali mik eina mik ngasheiya mangathei.
34 1Chiwui thili Mosesna Moab tampākwui eina Nebo Kaphung, Jericholi kāroda khalei Pisgahwui kaphungtonli kai, kala ithumwui Avāna ali ngalei katonga chithei, Gileadwui eina Danli, 2Naphtali saikora, Ephraim kala Manassehwui ngalei, kala zingtunwui shamadru thari Judahwui ngalei katonga, 3Negeb, tampāk, khaneirong keinung Jericho Leiwuk, Zoar thari sākhui.
4Chiwui thili ithumwui Avāna ali hānga, "Hi chi ina Abraham, Isaac, kala Jacobli ngashit kahai ngalei china: 'Ina nawui ara̱-azāli mira.' Ina chili nawui mik eina theingasakhaira, kha nana chili makānpaimara."
5Ithumwui Avāna hāngkahai tākam eina, ithumwui Avāwui rao Moses Moab ngaleili chili thihaowa. 6Ithumwui Avāna ali Beth-peorli kāroda khalei Moab leiwukli chifahaowa. Kha aja rāshungda mi akhala awui chifapam chi matheimana. 7Mosesna kathi atam chitharan a zingkum shākha maga̱ kāhairasai; awui mik mamānmana, kala awui pangshap mathenghaimana. 8Israelwui mibingna Moab tampākli, kachap kala kasifawui atam kupranglakha eina tangda, Moseswui vang thumrāthang chapa. 9Nunwui naomayara Joshuana thangkhamei manglāna pemtinghai, kaja Mosesna awuitungli apāng parmi. Kala Israelwui mibingna ali nganāsanga, kala ithumwui Avāna Mosesli kakaso athishurda sai. 10Chithangwui eina thuida ithumwui Avāna mashā eina mashā theikahai Moses thāda marān akhala Israelli maphorkasangmana, 11ithumwui Avāna ali Egyptli Pharaohli, awui rao saikorali, kala aram saikorali sākhavai chihovā kahai khudam kala matakhak kahai saikorawui vang, 12kala pāngthei kharei saikorawui vang kala Israel saikorawui miktāli Mosesna sākahai khangachee khangachā otsak khare saikorawui vang.
