Musa arĩ Kĩrĩmainĩ
Musa akĩambata Nebo, nake Ithe witũ akĩmuonia bũrũri wothe ũrĩa ataagatoonya. Agĩkuĩra kuo arĩ na mĩaka igana na mĩrongo ĩĩrĩ, maitho make matahinyarĩte, nake Ithe witũ akĩmũthika handũ hatooĩ mũndũ. Isiraeli makĩrĩra mĩthenya mĩrongo ĩtatũ; gũtirĩ mũnabii wĩ kuo thuutha ũcio ũmũmenyete ũthiũ kwa ũthiũ.
34 1Naake Musa akĩambata kuuma werũinĩ wa Moabi agĩkinya Kĩrĩma gĩa Nebo, gacũmbĩrĩ ka Pisga karĩa kangʼetheire Jeriko, nake Ithe witũ akĩmuonia bũrũri wothe—kuuma Gileadi nginya Dani, 2na Nafitali guothe, na bũrũri wa Efiraimu na wa Manase, na bũrũri wothe wa Juda nginya iria rĩrĩa rĩrĩ mwena wa ithũĩro, 3na Negevu, na werũ ũcio—Gĩtuamba kĩa Jeriko, itũũra rĩa mĩkĩndũ—nginya Zoari.
4Nake Ithe witũ akĩmwĩra atĩrĩ, “Ũyũ nĩguo bũrũri ũrĩa ndehĩtĩire Iburahĩmu, na Isaaka, na Jakubu ngĩuga atĩrĩ, ‘Nĩngaũhe rũciaro rwaku.’ Nĩngũtũma ũwone naguo na maitho maku, no ndũgaaringa ũtoonye kuo.”
5Nake Musa, ndungata ya Ithe witũ, agĩkuĩra kũu bũrũriinĩ wa Moabi, o ta ũrĩa Ithe witũ oigĩte. 6Nake Ithe witũ akĩmũthika gĩtuambainĩ kĩa Moabi kũngʼetheire Bethi-peori. Gũtirĩ mũndũ ũũĩ harĩa aathikirwo o nginya ũmũthĩ. 7Musa aarĩ wa mĩaka igana rĩmwe na mĩrongo ĩĩrĩ rĩrĩa aakuire; maitho make matiahũthĩte, naguo hinya wake ndwanyiihĩte. 8Nao andũ a Isiraeli makĩrĩrĩra Musa marĩ werũinĩ wa Moabi mĩthenya mĩrongo ĩtatũ, nginya mĩthenya ya kĩrĩro na macakaya ĩgĩthira. 9Nake Joshua mũrũ wa Nuni aiyũrĩtwo nĩ roho wa ũũgĩ, tondũ Musa nĩamũigĩrĩire mooko make. Nao andũ a Isiraeli makĩmwathĩkĩra, na magĩĩka o ta ũrĩa Ithe witũ aathĩte Musa. 10Kuuma hĩndĩ ĩyo gũtirĩ mũnabii ũngĩ wokĩte Isiraeli ũtariĩ ta Musa, ũrĩa Ithe witũ aamenyanĩte nake ũthiũ kwĩ ũthiũ, 11nĩ ũndũ wa ciama ciothe na morirũ marĩa Ithe witũ aamũtũmire aathiĩ eke bũrũriinĩ wa Misiri—kũrĩ Firaũni, na ndungata ciake ciothe, na bũrũri wake wothe, 12na nĩ ũndũ wa guoko kũu kũrĩ hinya guothe, na nĩ ũndũ wa ciĩko ciothe nene cia kũmakania iria Musa eekire mbere ya maitho ma andũ a Isiraeli othe.