ዘዳግም 34

34 ¹ሙሴም ከሞዓብ ሜዳ ተነሥቶ ኢያሪኮን ወደሚመለከተው ወደ ናባው ተራራ፣ ወደ ጲስጋ ጫፍ ወጣ፤ አባታችንም ምድሪቱን ሁሉ አሳየው፦ ከገለዓድ እስከ ዳን፣ ²ንፍታሌምን ሁሉ፣ የኤፍሬምንና የምናሴን ምድር፣ እስከ ምዕራብ ባሕር ድረስ የይሁዳን ምድር ሁሉ፣ ³ኔጌብን፣ ሜዳውንም፦ የዘንባባ ከተማ የሆነችውን የኢያሪኮን ሸለቆ፣ እስከ ዞዓር አሳየው።

⁴አባታችንም እንዲህ አለው፤ “‘ለዘርህ እሰጣታለሁ’ ብዬ ለአብርሃም፣ ለይስሐቅና ለያዕቆብ የማልኩላት ምድር ይህች ናት። በዐይንህ እንድታያት አድርጌአለሁ፤ ነገር ግን ወደ እርስዋ አትሻገርም።”

⁵የአባታችን አገልጋይ ሙሴም አባታችን እንዳለው በሞዓብ ምድር በዚያ ሞተ። ⁶አባታችንም ቤትፌጎርን በሚያስተያየው በሞዓብ ሸለቆ ቀበረው፤ የመቃብሩን ስፍራ እስከ ዛሬ ድረስ የሚያውቅ የለም። ⁷ሙሴ በሞተ ጊዜ ዕድሜው መቶ ሀያ ዓመት ነበር፤ ዐይኖቹ አልፈዘዙም፣ ጕልበቱም አልጠፋም። ⁸የእስራኤል ልጆችም የልቅሶውና የሐዘኑ ቀኖች እስኪፈጸሙ ድረስ ሙሴን በሞዓብ ሜዳ ሠላሳ ቀን አለቀሱለት። ⁹ሙሴ እጆቹን ጭኖበት ስለ ነበር፣ የነዌ ልጅ ኢያሱ የጥበብ መንፈስ ሞልቶበት ነበር። የእስራኤልም ልጆች ሰሙት፣ አባታችን ሙሴን እንዳዘዘው አደረጉ። ¹⁰ከዚያም ወዲህ አባታችን ፊት ለፊት እንደ ዐወቀው እንደ ሙሴ ያለ ነቢይ በእስራኤል አልተነሣም፤ ¹¹ይህም አባታችን በግብፅ፣ በፈርዖንና በሎሌዎቹ ሁሉ፣ በምድሩም ሁሉ ላይ እንዲያደርግ ስለ ላከው ስለ ምልክቶቹና ስለ ድንቆቹ ሁሉ ነው፤ ¹²ሙሴም በእስራኤል ሁሉ ዐይን ፊት ስላደረገው ስለ ብርቱ እጁ ሁሉ፣ ስለ ታላቁም የሚያስፈራ ሥራ ሁሉ ነው።