உபாகமம் 34

34 ¹பின்பு மோசே மோவாபின் சமபூமிகளிலிருந்து நேபோ மலைக்கும், எரிகோவுக்கு எதிரேயுள்ள பிஸ்காவின் சிகரத்திற்கும் ஏறிப்போனான்; அங்கே எங்கள் பிதா அவனுக்குக் கீலேயாத் தொடங்கி தாண்வரையுள்ள தேசம் முழுவதையும், ²நப்தலி முழுவதையும், எப்பிராயீம் மனாசே என்பவர்களின் தேசத்தையும், மேற்கே இருக்கும் கடல்வரையுள்ள யூதாவின் தேசம் முழுவதையும், ³தென்திசையையும், பேரீச்சமரங்களின் நகரமாகிய எரிகோவின் பள்ளத்தாக்கான சமபூமியையும் சோவார்வரைக்கும் காண்பித்தார்.

⁴அப்பொழுது எங்கள் பிதா அவனை நோக்கி: “‘உன் சந்ததிக்கு இதைக் கொடுப்பேன்’ என்று நான் ஆபிரகாமுக்கும் ஈசாக்குக்கும் யாக்கோபுக்கும் ஆணையிட்டுச் சொன்ன தேசம் இதுவே; இதை உன் கண்களால் காணும்படி செய்தேன், ஆனாலும் நீ அதற்குள் பிரவேசிக்கமாட்டாய்” என்றார்.

⁵அப்படியே எங்கள் பிதாவின் ஊழியக்காரனாகிய மோசே, எங்கள் பிதா சொல்லியிருந்தபடியே, மோவாப் தேசத்தில் அங்கே மரணமடைந்தான். ⁶எங்கள் பிதா அவனை மோவாப் பள்ளத்தாக்கிலே பெத்பெயோருக்கு எதிரே அடக்கம் பண்ணினார்; ஆனாலும் இந்நாள்வரைக்கும் அவன் அடக்கம்பண்ணப்பட்ட இடத்தை ஒருவரும் அறியார். ⁷மோசே மரணமடையும்போது நூற்றிருபது வயதாயிருந்தான்; அவன் கண்கள் மங்கிப்போகவுமில்லை, அவன் வீரியம் குறைந்துபோகவுமில்லை. ⁸இஸ்ரவேல் புத்திரர் மோவாபின் சமபூமிகளிலே மோசேக்காக முப்பது நாள் அழுது, துக்கங்கொண்டாடின நாட்கள் முடியும்வரைக்கும் புலம்பினார்கள். ⁹நூனின் குமாரனாகிய யோசுவா ஞானத்தின் ஆவியால் நிறைந்திருந்தான்; ஏனெனில் மோசே தன் கைகளை அவன்மேல் வைத்திருந்தான். இஸ்ரவேல் புத்திரர் அவனுக்குச் செவிகொடுத்து, எங்கள் பிதா மோசேக்குக் கட்டளையிட்டபடியே செய்தார்கள். ¹⁰எங்கள் பிதா முகமுகமாய் அறிந்திருந்த மோசேயைப்போல ஒரு தீர்க்கதரிசியும் அதற்குப்பின்பு இஸ்ரவேலில் எழும்பினதில்லை; ¹¹எங்கள் பிதா அவனை எகிப்து தேசத்தில் பார்வோனுக்கும், அவனுடைய எல்லா ஊழியக்காரருக்கும், அவனுடைய தேசம் முழுவதற்கும் விரோதமாய்ச் செய்யும்படி அனுப்பின எல்லா அடையாளங்களையும் அற்புதங்களையும், ¹²மோசே இஸ்ரவேலர் அனைவருடைய கண்களுக்கு முன்பாகச் செய்த பலத்த கரத்தின் செயல்கள் அனைத்தையும், பயங்கரமான பெரிய செயல்கள் அனைத்தையும் அவன்போல் ஒருவரும் செய்ததில்லை.