ሙሴ ኣብ እምባ

ሙሴ ናብ ናባው ይድይብ፥ ኣቦና ድማ ነታ ዘይኣትዋ ኵላ ምድሪ ኣርኣዮ። ኣብኡ ኣብ ሚእትን ዕስራን ዓመቱ፥ ኣዒንቱ ገና እናበርሃ፥ ሞተ፥ ኣቦና ድማ ሓደ እኳ ኣብ ዘይፈልጦ ቀበሮ። እስራኤል ሰላሳ መዓልቲ በኸዩ፤ ካብኡ ንደሓር ከም ሙሴ ገፅ ንገፅ ዝፈለጦ ነቢይ የለን።

ምዕራፍ 34።

ሙሴ ኸዓ ካብ ጐላጕል ሞኣብ ናብ እምባ ናባው፥ ኣብ መንፅር ኢያሪኮ ናብ ዘሎ ርእሲ ፈስጋ ደየበ፤ ኣቦና ድማ ነታ ኵላ ምድሪ፥ ካብ ገለዓድ ክሳዕ ዳን ኣርኣዮ፥ ንዅሉ ንፍታሌምን ንምድሪ ኤፍሬምን ምናሴን፥ ክሳዕ ባሕሪ ምዕራብ ንዅላ ምድሪ ይሁዳን፥ ንደቡብን ንጐልጐልን፥ ነቲ ለሰ ኢያሪኮ፥ ነታ ተምሪ ዘለዋ ኸተማ፥ ክሳዕ ዞዓር ኣርኣዮ።

ኣቦና ድማ ከምዙይ ኢሉ በሎ፦ “እዛ ንኣብርሃምን ንይስሓቅን ንያእቆብን ፦ ‘ንዘርእኻ ክህባ እየ’ ኢለ ዝመሓልኩላ ምድሪ እዚኣ እያ። በዒንትኻ ኸም እትርእያ ገይረ ኣለኹ፤ ናብኣ ግና ኣይትሰግርን ኢኻ።”

ባርያ ኣቦና ሙሴ ድማ፥ ከምቲ ኣቦና ዝበሎ፥ ኣብኡ ኣብ ምድሪ ሞኣብ ሞተ። ኣቦና ድማ ኣብ ምድሪ ሞኣብ፥ ኣብ መንፅር ቤተፌጎር ኣብ ዘሎ ለሰ ቀበሮ። ክሳዕ ሎሚ መዓልቲ ድማ መቓብሩ ዝፈልጥ የለን። ሙሴ ወዲ ሚእትን ዕስራን ዓመት ኮይኑ ሞተ፤ ኣዒንቱ ኣይደኸማን፥ ጉልበቱውን ኣይጐደለን ነበረ። ደቂ እስራኤል ድማ ኣብ ጐላጕል ሞኣብ ንሙሴ ሰላሳ መዓልቲ በኸዩሉ፤ መዓልቲታት ብኽያትን ሓዘንን ክሳዕ ዝተፈፀመ። ኢያሱ ወዲ ነዌ ድማ፥ ሙሴ ኣእዳዉ ኣብ ልዕሊኡ ኣንቢሩ ስለ ዝነበረ፥ መንፈስ ጥበብ መልኦ ነበረ። ደቂ እስራኤል ከዓ ሰምዕዎ፤ ከምቲ ኣቦና ንሙሴ ዝኣዘዞ ድማ ገበሩ። ካብኡ ንደሓር ከም ሙሴ ዝበለ፥ ኣቦና ገፅ ንገፅ ዝፈለጦ ነቢይ፥ ኣብ እስራኤል ኣይተልዓለን፤ ነቲ ኣቦና ኣብ ግብፂ፥ ኣብ ፈርዖንን ኣብ ኵሎም ሓሻኽሩን ኣብ ኵላ ሃገሩን ክገብሮ ዝለኣኾ ዅሉ ምልክታትን ተኣምራትን፥ ነቲ ሙሴ ኣብ ቅድሚ ኣዒንቲ ኵሉ እስራኤል ዝገበሮ ዅሉ ብርቱዕ ኢድን ኵሉ ዓብዪ ዘስካሕክሕ ተግባራት እዩ።