Mosis Nʼelu Ugwu
Mosis rigoro Nibo, Nna anyị gosikwa ya ala ahụ niile ọ na-agaghị abanye. Ọ nwụrụ nʼebe ahụ mgbe ọ dị narị afọ na iri abụọ, anya ya ka na-ahụ ụzọ nke ọma, Nna anyị liekwara ya nʼebe ọ dịghị onye maara. Izrel kwara ákwá ụbọchị iri atọ; ọ dịbeghị onye amụma kemgbe ahụ maara ya ihu na ihu.
34 1Mgbe ahụ, Mosis sitere nʼobosara ala Moab rigoro nʼelu Ugwu Nibo, nʼelu Pisga nke chere Jeriko ihu, Nna anyị wee gosi ya ala ahụ niile—site na Gilead ruo Dan, 2Naftalaị niile, ala Ifrem na Manase, ala Juda niile ruo nʼoké osimiri dị nʼọdịda anyanwụ, 3Negev, na obosara ala ahụ—Ndagwurugwu Jeriko, obodo nkwụ—ruo Zoa.
4Mgbe ahụ, Nna anyị gwara ya sị, “Nke a bụ ala ahụ m ṅụụrụ Ebraham, Aịzik, na Jekọb iyi, sị, ‘Aga m enye ya ụmụ gị.’ Emela m ka i jiri anya gị hụ ya, ma ị gaghị agafe banye nʼime ya.”
5Mosis, bụ ohu Nna anyị, nwụrụ nʼebe ahụ nʼala Moab, dịka Nna anyị kwuru. 6Nna anyị liri ya na ndagwurugwu Moab nke chere Bet-peoa ihu. O nweghị onye maara ebe e liri ya ruo taa. 7Mosis gbara narị afọ na iri abụọ mgbe ọ nwụrụ; anya ya ahapụghị ịhụ ụzọ, ike ya alaghịkwa nʼiyi. 8Ụmụ Izrel bere akwa nʼihi Mosis nʼobosara ala Moab ụbọchị iri atọ, ruo mgbe ụbọchị iru uju na ịkwa akwa ahụ gwụchara. 9Joshua nwa Nun jupụtara na mmụọ amamihe, nʼihi na Mosis bikwasịrị ya aka ya. Ụmụ Izrel gere ya ntị meekwa dịka Nna anyị nyere Mosis nʼiwu. 10Site nʼoge ahụ, o nwebeghị onye amụma ọzọ biliri nʼIzrel dịka Mosis, onye Nna anyị maara ihu na ihu, 11nʼihi ihe ịrịbaama na ọrụ ebube niile ahụ Nna anyị zigara ya ka o mee nʼIjipt—megide Fero, ndị ohu ya niile, na ala ya niile, 12nʼihi aka ike ahụ niile na nʼihi ọrụ ukwu niile na-emenye egwu nke Mosis mere nʼihu Izrel niile.
