Joṣua 2

2 ¹Joṣua ọmọ Nuni sì fi ìdákẹ́rọ̀ rán àwọn ọkùnrin méjì láti Ṣittimu gẹ́gẹ́ bí amí pé, “Ẹ lọ, ẹ yọ́ ilẹ̀ náà wò, pàápàá jùlọ Jeriko.” Wọ́n sì lọ, wọ́n wọ ilé obìnrin panṣágà kan tí à ń pè ní Rahabu, wọ́n sì wọ̀ síbẹ̀.

²A sì sọ fún ọba Jeriko pé, “Wò ó, àwọn ọkùnrin kan ti inú àwọn ọmọ Israẹli wá síhìn-ín ní òru òní láti yọ́ ilẹ̀ náà wò.”

³Ọba Jeriko sì ránṣẹ́ sí Rahabu pé, “Mú àwọn ọkùnrin tí ó tọ̀ ọ́ wá, tí wọ́n sì wọ ilé rẹ jáde, nítorí wọ́n wá láti yọ́ gbogbo ilẹ̀ náà wò.”

⁴Ṣùgbọ́n obìnrin náà ti mú àwọn ọkùnrin méjì náà, ó sì fi wọ́n pamọ́, ó sì wí pé, “Bẹ́ẹ̀ ni, àwọn ọkùnrin náà tọ̀ mí wá, ṣùgbọ́n èmi kò mọ ibi tí wọ́n ti wá. ⁵Ní àsìkò tí ilẹ̀ ṣú, nígbà tí a fẹ́ sé ẹnu-ọ̀nà ìlú, àwọn ọkùnrin náà jáde lọ. Èmi kò mọ ibi tí àwọn ọkùnrin náà lọ. Ẹ yára lépa wọn, nítorí ẹ̀yin yóò bá wọn.” ⁶Ṣùgbọ́n ó ti mú wọn gòkè lọ sórí òrùlé, ó sì fi wọ́n pamọ́ sábẹ́ àwọn igi ọ̀gbọ̀ tí ó tẹ́ síbẹ̀. ⁷Àwọn ọkùnrin náà sì lépa wọn ní ọ̀nà tí ó lọ sí Jordani, títí dé àwọn ibi ìwọdò; bí àwọn tí ń lépa wọn ti jáde tán, a sì ti ẹnu-ọ̀nà ìlú.

⁸Kí àwọn amí tó dùbúlẹ̀ fún òru, Rahabu gòkè tọ̀ wọ́n wá sórí òrùlé, ⁹ó sì wí fún wọn pé, “Mo mọ̀ pé Olúwa ti fi ilẹ̀ náà fún yín, pé ẹ̀rù yín ti bà wá, àti pé gbogbo àwọn tí ń gbé inú ilẹ̀ náà ti yọ́ dànù níwájú yín. ¹⁰Àwa ti gbọ́ bí Olúwa ti mú Òkun Pupa gbẹ níwájú yín nígbà tí ẹ jáde kúrò ní Ijipti, àti ohun tí ẹ ṣe sí Sihoni àti Ogu, àwọn ọba Amori méjì tí ó wà ní ìhà ìlà-oòrùn Jordani, àwọn tí ẹ run pátápátá. ¹¹Nígbà tí àwa gbọ́, ọkàn wa sì yọ́, kò sì sí àyà tí ó kù nínú ẹnikẹ́ni nítorí yín, nítorí Olúwa Ọlọ́run yín ni Ọlọ́run ní ọ̀run lókè àti ní ayé nísàlẹ̀. ¹²Ǹjẹ́ nísinsìnyí, ẹ fi Olúwa búra fún mi pé, bí èmi ti ṣe oore fún yín, ẹ̀yin pẹ̀lú yóò ṣe oore fún ilé baba mi. Ẹ fún mi ní àmì tí a lè gbẹ́kẹ̀lé, ¹³àti pé ẹ ó dá ẹ̀mí baba mi, àti ìyá mi, àti àwọn arákùnrin mi, àti àwọn arábìnrin mi, àti gbogbo àwọn tí í ṣe tiwọn sí, kí ẹ sì gbà wá lọ́wọ́ ikú.”

¹⁴Àwọn ọkùnrin náà sì wí fún un pé, “Ẹ̀mí wa dípò ẹ̀mí yín! Bí ìwọ kò bá sọ ohun tí àwa ń ṣe yìí jáde, nígbà náà, nígbà tí Baba wa bá fi ilẹ̀ náà fún wa, àwa yóò fi oore àti òtítọ́ hàn sí ọ.”

¹⁵Ó sì fi okùn sọ̀ wọ́n kalẹ̀ láti ojú fèrèsé, nítorí ilé rẹ̀ wà lára ògiri ìlú náà—ara ògiri náà ni ó ń gbé. ¹⁶Ó sì wí fún wọn pé, “Ẹ lọ sí orí òkè, kí àwọn tí ń lépa yín má bàa pàdé yín. Ẹ fi ara yín pamọ́ síbẹ̀ fún ọjọ́ mẹ́ta títí wọn ó fi padà, lẹ́yìn náà ẹ tó bá ọ̀nà yín lọ.”

¹⁷Àwọn ọkùnrin náà sì wí fún un pé, “Àwa yóò bọ́ lọ́wọ́ ìbúra yìí tí ìwọ mú wa búra, ¹⁸àyàfi tí ìwọ bá so okùn aláwọ̀ pupa yìí mọ́ ojú fèrèsé tí ìwọ fi sọ̀ wá kalẹ̀, nígbà tí àwa bá wọ ilẹ̀ náà, kí o sì kó baba rẹ, àti ìyá rẹ, àti àwọn arákùnrin rẹ, àti gbogbo agbo ilé baba rẹ jọ sínú ilé náà. ¹⁹Ẹnikẹ́ni tí ó bá jáde kúrò ní àwọn ẹnu-ọ̀nà ilé rẹ sí ìgboro—ẹ̀jẹ̀ rẹ̀ yóò wà lórí ara rẹ̀; àwa yóò sì mọ́. Ṣùgbọ́n bí ọwọ́ bá kan ẹnikẹ́ni tí ó bá wà pẹ̀lú rẹ nínú ilé, ẹ̀jẹ̀ rẹ̀ yóò wà lórí wa. ²⁰Ṣùgbọ́n bí ìwọ bá sọ ohun tí àwa ń ṣe yìí jáde, àwa yóò bọ́ lọ́wọ́ ìbúra tí ìwọ mú wa búra.”

²¹Ó sì wí pé, “Kí ó rí bí ẹ ti wí.” Ó sì rán wọn lọ, wọ́n sì jáde lọ; ó sì so okùn aláwọ̀ pupa náà mọ́ ojú fèrèsé.

²²Wọ́n sì lọ sí orí òkè, wọ́n dúró síbẹ̀ fún ọjọ́ mẹ́ta títí àwọn tí ń lépa wọn fi padà. Àwọn tí ń lépa náà sì wá a jákèjádò ọ̀nà náà, wọn kò sì rí wọn. ²³Àwọn ọkùnrin méjì náà sì padà, wọ́n sọ̀kalẹ̀ láti orí òkè, wọ́n sì rékọjá odò, wọ́n dé ọ̀dọ̀ Joṣua ọmọ Nuni, wọ́n sì ròyìn gbogbo ohun tí ó ṣẹlẹ̀ sí wọn fún un. ²⁴Wọ́n sì wí fún Joṣua pé, “Nítòótọ́ Baba wa ti fi gbogbo ilẹ̀ náà lé wa lọ́wọ́; lóòótọ́, gbogbo àwọn olùgbé ibẹ̀ ti yọ́ dànù fún ìbẹ̀rù níwájú wa.”