Rahabei Kokpheibü Shuong Hubü
Kokpheibü müt nyiei Jerikho suonlamnyu che chem to hukei, hoba Rahabei ngüh khangbü lenbou ki: sangnyu pendouei seneibü Bouei Saklangbü Yungnyua kümbü ditkei hoba tat tühnyinan kikei. Haoei haoeneibü langkei haoeibü chempen langkei yoa yakyokei, hoba saklangbü amaaphilabü che haoeibü khuthük to papkei.
2 1Naneibü shou Joshuaei Shittim ka müt nyi huphanga kokpheibü shuong lela hautiko laukei, “Hauan, kaonyek, kongnyu leko Jerikho pheian chühashi.” Haoen hauan Rahab namei suonlamnyu che chem to atkei, hoba khünei thüngkei.
2Jerikho Choba to ho tegü laukei, “Israelbü ka müt tao kaonyek pheila shanga hanei loukei.”
3Jerikho Choba Rahab jungto hautiko laukei, “Ka jungto louan kaibü chem to atbü müt kho leian longshi, aishanga haoen kaodak khümbo pheila shanga loukei.”
4Lausikei saoei müt nyi leian huan phokei, hoba laukei, “Haü, müt kü jungto loukei, lausikei haoen lae ka loukeije ngei angekei. 5Nakthüha, koukhüm khinbo kijinei, müt longkei. Müt lae to haukei ngei angekei. Tongde haoen phai shijung hauashi, aishanga kanei haoen laphetlabü.” 6Lausikei saoei haoen chemdaka kaitian, chemdaka phokubü phemba youshen maanga haoen hukei. 7Müt kho Jordan lam danko dei khatshang sühko haoen shijung haukei, hoba shijung haubü shuong longbü dangtham, bakhün khinkei.
8Kokpheibü shuong khüyou yeptila ohautoua, Rahab chemdaka haoen jungto kaitikei, 9hoba haoen to laukei, “Bunyubouei kan to kaodak kua, hoba kan la hatbümok sen to longkei, hoba kaodaka kibü pendou kan thedanga tühnyinda dogo, ngei ngeda. 10Kan Ijep ka longbü jiha Bunyubouei kan thedanga Saklangbü Yungnyu seengeikei, hoba Jordan chaang aenei kibü Amorbü Choba müt nyi, Sihon si Og, kan khümbo lemailela mautibü shuong to ai kümbei kho, künei ditkei. 11Künei ditkei, hoba seneibü maang tühnyinkei, hoba kan la aoyou ongkei ik hau akiko apbei, aishanga Bunyubou kaneibü Mühghaü kho thüka müha hoba leinei kaodaka Mühghaü ki. 12Tou kan la Bunyubou phongko kü to theyolanyoashi; ngei kan to sanou lenbü shanga, kanei kü boueibü chemdang to kakei sanou lenshima. Hoba kü la maanglembü amaaphilabü che kushima, 13kanei kü bou, nyu, jaisinasi shuong, hoba haoen la kibü pendou langkei püetlabü, hoba hailabü ka sen khümenlabü dogo.”
14Müt shuongei sao to laukei, “Kaneibü langkei shanga seneibü langkei kilabü! Kanei senei kümbü ho alenlonga, kheijinei seneibü Bouei sen to kaodak kulaje, senei kan to sanou hoba maanglembü lenlabü.”
15Saoei janglüh danko koulom danko haoen tonletkei, aishanga saoeibü chem sangnyu kümthanga kikei—sao kümthanga kikei. 16Saoei laukei, “Shongh to hauashi, khei ayinglonga shijung haubü shuongei kan haüyolabü. Khünei semnyet, haoen sepeibü sühko thoshi, kheijinei kaneibü lam to hauashi.”
17Müt shuongei sao to laukei, “Nyi sen la theyolanyotibü ho theyolanyobü ka senei tükde kilabü, 18Künei ho kaodak to atjinei, no sen tonan yantikubü koulom to ho saklangbü lin khühashi, hoba kaibü bou, kaibü nyu, kaibü jaisina hoba kaibü bou chempen pendou kho chem to kamshaiashi. 19Aoei kaibü chem koukap ka khongto longlaje, haoeibü sii haoeibü khua kilabü, künei mubü kilabü. Lausikei no yoa chem maang ka kibü müt at to ikei meitilaje, haoeibü sii seneibü khua kilabü. 20Lausikei no künei kümbü to lenlaje, no sen thetilantibü theyolanyobü shanga künei shedbü akilabü.”
21Saoei laukei, “Kanei laubü tegü kümshi.” Saoei haoen hautikei, hoba haoen haukei, hoba saoei koulom to saklangbü lin khühkei.
22Haoen shongh to haukei, hoba shijung haubü shuong sepeinyu ngaiku shongko khünei chalou sem kikei. Shijung haubü shuongei lam khümboa lambei, lausikei ai ühüp. 23Müt nyi sepeinyu ngaikei, shongh ka louyenkei, danan loukei, hoba Naneibü shou Joshua jungto loukei, hoba haosi to haüthükbü pendou hao to lenkei. 24Haosiei Joshua to laukei, “Maimaitham seneibü Bouei kaodak pendou seneibü ik to khümbo kua; chühashi, ho kaodaka kibü pendou seneibü thedangka hatan satan apa.”
