ምሳሌ 31 FHB Father's Heart Bible™

31 ¹ቃላት ንጉስ ለሙኤል፥ እቲ ኣዲኡ ዝመሃረቶ ምስላ፦ ²እንታይ፥ ወደይ? እንታይ፥ ወዲ ማህፀነይ? እንታይ፥ ወዲ መብፅዓይ? ³ሓይልኻ ንኣንስቲ ኣይትሃብ፥ መንገድኻ ድማ ነቶም ንነገስታት ዘጥፍኡ ኣይትሃብ። ⁴ኦ ለሙኤል፥ ወይኒ ምስታይ ንነገስታት ኣይኮነን፥ ብርቱዕ መስተ ምምናይ ከዓ ንኣሕሉቕ ኣይኮነን። ⁵እንተ ሰተዩ፥ እቲ ዝተኣዘዘ ይርስዑ፥ መሰል ኵሎም ግፉዓት ከዓ የቐይኑ እዮም እሞ። ⁶ብርቱዕ መስተ ነቲ ዝጠፍእ ዘሎ ሃቦ፥ ወይኒ ድማ ነቶም ኣብ መሪር ፀበባ ዘለዉ ሃቦም። ⁷ይስተዩ እሞ ድኽነቶም ይረስዑ፥ መከራኦም ድማ ደጊም ኣይዘክሩን። ⁸ኣፍካ ነቶም ዘይዛረቡ ክፈት፥ ንመሰል ኵሎም እቶም ዝተገድፉ ድኻታት ክፈት። ⁹ኣፍካ ክፈት፥ ብፅድቂ ፍረድ፥ ንመሰል ድኻን ፅጉምን ከዓ ተማጐት።

ብርትዕቲ ሰበይቲ

¹⁰ብርትዕቲ ሰበይቲ መን ክረኽባ ይኽእል? ካብ ክቡር ዕንቊ ኣዝያ ትኸብር። ¹¹ልቢ ሰብኣያ ይኣምና፥ ዝኾነ ክቡር ነገር ድማ ኣይስእንን። ¹²ብዅሉ መዓልቲታት ህይወታ፥ ፅቡቕ ደኣ እምበር ክፉእ ኣይትገብረሉን። ¹³ፀጕሪ በጊዕን እንጣጢዕን ትደሊ፥ ብፍቓደኛ ኣእዳዋ ድማ ትሰርሕ። ¹⁴ከም መራኽብ ንግዲ እያ፥ ምግባ ኻብ ርሑቕ ተምፅእ። ¹⁵ገና ለይቲ እንተሎ ትትስእ፥ ንስድራ ቤታ ምግቢ ተዳሉ፥ ንኣግራዳ ድማ ግደ ትህብ። ¹⁶ሓደ ግራት ርእያ ትዕድጎ፥ ካብ ፍረ ኣእዳዋ ድማ ኣታኽልቲ ወይኒ ትተክል። ¹⁷ንርእሳ ብሓይሊ ትዓጥቕ፥ ቀላፅማ ድማ ተበርትዕ። ¹⁸ንግዳ ኸም ዝኸስብ ትግንዘብ፤ መብራህታ ብለይቲ ኣይጠፍእን። ¹⁹ኣእዳዋ ናብ መፍተል ትዝርግሕ፥ ኣእዳዋ ድማ ንእንዝርት ይሕዛ። ²⁰ነቲ ድኻ ኢዳ ትኸፍት፥ ናብ ፅጉም ድማ ኣእዳዋ ትዝርግሕ። ²¹ንስድራ ቤታ ኣይትፈርሕን፥ በረድ ኣብ ዝወርደሉ ጊዜ፤ ኵሉ ስድራ ቤታ ቀይሕ ግምጃ ተኸዲኑ እዩ እሞ። ²²ንርእሳ ምንፃፋት ትገብር፤ ክዳና ኸዓ ቀጢን ዓለባን ሕብሪ ወይንን እዩ። ²³ሰብኣያ ኣብ ደጌታት ይፍለጥ፥ ምስ ዓበይቲ እታ ሃገር ኮፍ ኣብ ዝብለሉ ጊዜ። ²⁴ቀጢን ክዳውንቲ ሰሪሓ ትሸጥ፥ ንነጋዶ ድማ ቅናውቲ ተቕርበሎም። ²⁵ሓይልን ክብረትን ክዳና እዮም፥ ነተን ዝመፃ መዓልቲታት ከዓ ትስሕቕ። ²⁶ኣፋ ብጥበብ ትኸፍት፥ ናይ እምነት ትምህርቲ ኸዓ ኣብ ልሳና ኣሎ። ²⁷መንገዲ ስድራ ቤታ ትሕሉ፥ እንጀራ ስንፍና ኸዓ ኣይትበልዕን። ²⁸ደቃ ተሲኦም ብፅእቲ ይብልዋ፤ ሰብኣያ ኸዓ ከምኡ፥ ይንእዳ ድማ፦ ²⁹“ብዙሓት ኣዋልድ ብርትዐ ገይረን፥ ንስኺ ግና ንዅለን ትበልፅየን ኢኺ።” ³⁰ሞገስ መስሓቲ እዩ፥ ፅባቐ ኸዓ ጊዜያዊ እዩ፥ ንኣቦና እትፈርሕ ሰበይቲ ግና ክትንኣድ እያ። ³¹ፍረ ኣእዳዋ ሃብዋ፥ ግብራ ኸዓ ኣብ ደጌታት ይንኣዳ።