箴言 31

31 ¹利慕伊勒王嘅言語,就係佢母親教導佢嘅默示: ²我嘅兒啊,講乜嘢呢? 我親生嘅兒啊,講乜嘢呢? 我許願得嚟嘅兒啊,講乜嘢呢? ³唔好將你嘅精力畀女人, 亦都唔好將你嘅行徑畀嗰啲敗壞君王嘅人。 ⁴利慕伊勒啊,君王唔應該——君王唔應該飲酒, 掌權者唔應該 貪戀烈酒。 ⁵因為佢哋一飲,就會忘記所頒佈嘅律例, 扭曲一切受欺壓者嘅權利。 ⁶要將烈酒畀將要滅亡嘅人, 將酒畀心裏愁苦嘅人。 ⁷等佢哋飲咗,就忘記自己嘅貧窮, 唔再記得自己嘅苦難。 ⁸你要為冇聲音嘅人開口,為一切孤苦無依嘅人爭取權利。 ⁹你要開口,秉公審判, 為困苦窮乏嘅人伸張權利。

有才德嘅婦人

¹⁰有才德嘅婦人,邊個搵 得到佢呢?佢嘅價值遠遠勝過珠寶。 ¹¹佢丈夫嘅心信賴 佢,乜嘢貴重嘅嘢都唔會缺乏。 ¹²佢一生嘅日子只會令佢得益, 絕唔會害佢。 ¹³佢尋找羊毛同麻, 樂意親手做工。 ¹⁴佢好似商船咁, 由遠方運嚟糧食。 ¹⁵佢天未光就起身, 為全家預備食物, 又為啲婢女分派應得嘅份。 ¹⁶佢睇中一塊田就買 落嚟;用親手賺到嘅果實栽種葡萄園。 ¹⁷佢以力量 束住自己嘅腰, 令自己嘅膀臂強壯。 ¹⁸佢察覺自己嘅生意有利可圖;佢嘅燈通宵都唔會熄。 ¹⁹佢伸手拎起紡線嘅桿,手指握住紡錘。 ²⁰佢向窮人張開手, 向困苦嘅人伸出雙手。 ²¹落雪嘅時候,佢唔會為全家擔憂, 因為全家都著上大紅嘅衣裳。 ²²佢為自己做繡花嘅被鋪;佢嘅衣服係細麻布同紫色布料。 ²³佢丈夫喺城門口受人尊敬, 同本地嘅長老一齊坐喺嗰度。 ²⁴佢做細麻布嘅衣裳嚟賣, 又將腰帶供應畀商人。 ²⁵力量同尊榮係佢嘅衣服, 佢喜笑面對將來嘅日子。 ²⁶佢開口就有智慧, 舌頭上有忠誠嘅教誨。 ²⁷佢看顧全家嘅事務, 唔會白食懶惰嘅飯。 ²⁸佢啲仔女起嚟稱佢有福; 佢丈夫都咁樣讚美佢: ²⁹「好多女子都做得出色,但係你勝過佢哋所有人。」 ³⁰艷麗係虛假嘅,美貌係轉眼即逝嘅, 唯獨敬畏我哋嘅父嘅婦人,先至會得到稱讚。 ³¹要將佢親手做嘅成果歸畀佢, 願佢嘅工作喺城門口稱讚佢。