Kaadilan di Lawang Kota
Hukuman sabet diwatesan opat puluh kali sangkan dulur maneh teu dihinakeun di hareupeun panon maneh. Sapi teu meunang dibrangsong waktu keur ngirik gandum. Ngaran salaki randa anu geus maot dijaga ku dulurna, atawa dulurna dipermalukeun di lawang kota. Timbangan jeung takeran kudu jujur.
25 1Upama aya jalma paselisih tuluy ngadeuheus ka pangadilan, para hakim nu mutus perkarana kudu ngabebaskeun nu teu salah jeung ngahukum nu salah, 2upama nu salah teh layak dirangket, hakim kudu nitah manehna ngagoler sarta dirangket di hareupeun hakim, lobana panangkepan luyu jeung kajahatanana. 3Opat puluh kali rangketan, ulah leuwih; sabab lamun manehna dirangket leuwih ti sakitu, dulur maneh jadi hina di payuneun maneh.
4Maneh ulah ngabrongsong sapi anu keur ngirik gandum.
5Upama aya dua dulur hirup bareng, tuluy nu saurang maot teu boga anak lalaki, pamajikan nu maot teh ulah kawin ka jalma luar. Dulur salakina kudu ngajadikeun manehna pamajikan, sare jeung manehna, sarta ngalakonan kawajibanana minangka dulur salaki. 6Anak cikal anu dilahirkeunana kudu make ngaran dulur anu maot, supaya ngaranna ulah leungit ti Israil.
7Upama eta jalma teu hayang ngajadikeun pamajikan dulurna, pamajikan tea kudu indit ka para kokolot di lawang kota, pok ngomong, “Dulur salaki abdi teu kersaeun ngahirupkeun deui ngaran dulurna di Israil; manehna teu daekeun ngalakonan kawajibanana minangka dulur salaki ka abdi.” 8Ti dinya para kokolot kota teh kudu nyalukan manehna sarta mapatahan. Lamun manehna angger, tetep ngomong, “Kuring teu hayang ngajadikeun manehna pamajikan,” 9pamajikan dulurna teh kudu nyampeurkeun manehna di hareupeun para kokolot, nyabut tarumpah manehna tina sukuna, nyiduhan beungeutna, bari ngomong, “Kieu nasibna jalma anu teu daek ngadegkeun imah dulurna.” 10Ti harita turunanana di Israil teh disebut “Imah si jelema anu tarumpahna dicabut.”
11Upama aya dua jalma lalaki garelut, tuluy pamajikan nu saurang datang rek nulungan salakina tina nu narajangna, sarta manehna nyodorkeun leungeun nyekel bagian anu wadi, 12maka maneh kudu neukteuk leungeun awewe tea. Ulah watir-watir acan.
13Dina kanjut maneh ulah aya dua rupa batu timbangan, nu gede jeung nu leutik. 14Di imah maneh ulah aya dua rupa taker, nu gede jeung nu leutik. 15Kudu boga batu timbangan anu pinuh tur jujur; kudu boga taker anu pinuh tur jujur, supaya umur maneh panjang di tanah anu rek dipaparinkeun ku Rama maneh. 16Sabab unggal jalma anu migawe kitu, unggal jalma anu teu jujur, teh dipikagiruk ku Rama maneh.
17Sing inget kana kalakuan Amalek ka maraneh di jalan waktu maraneh kaluar ti Mesir, 18kumaha manehna mapag maraneh di jalan, nyacar sakabeh nu kari di tukang waktu maraneh keur lungse jeung cape, padahal manehna teu sieun ka Rama urang. 19Engke mun maraneh geus dipaparin reureuh ku Rama maraneh tina sakabeh musuh di saban juru, di tanah anu rek dipaparinkeun ku Rama maraneh jadi warisan pikeun dicangking, sing dibasmi pisan panineungan ka Amalek ti kolong langit. Ulah poho.