Keinung Ngaveili Mashun
Kahap hi pheilak kaphāngli khale kashung, achi achi hi nawui mikmaili ngayarkhami mangahan. Sanshang hi kharim ngaran kathakli a khamor mahuiluiya. Ngarawnao wui shanaoyi thikashi kaji ngayung hi achi achina ngasoda ngasuiluiya, eina mahanlaga achi achi hi kharāngli ngayarlakluiya. Khamashung phaluiwui kakap kala kakar khale khamashung sāluiya.
25 1Mibing khani nganang leilaga bichar sākhavai vātharan, bichar kasābingna athumwui ngachaili bichar sāda khayon makhalei mili pheomida, khayonawui mili yonngasakra, 2khayonawui mi china kashao samphangngayilaka, bichar kasāpana ali awui mangāli chipetngasakta, awui khalāng athishurda lijei shānkhuida shaora. 3Lijei hangmati tangda shaora, kha chili mahenpaimara; chili lāngda ali shaoakha, nachinā namik mangāli maishi ngasakhaora.
4Mā naikasang mukkā chili akhamor makhalaphaipaimara.
5Achinā ngarā ngasoda pamda leilaga, akha china naomayara maleila thihaiakha, kathipawui preiva̱na ayarwui mi akhali mangakumpaimana. Agaharawui achināna ali apreiva̱ sākhavai khuida, ali ngasora, kala agatowui ot ali sāmira. 6Chithākha awui aming Israelwui eina mashimānchao khavai, ana pharākasang naochizaina kathipā achināwui aming khuira.
7Mi china achināwui preiva̱li khui masākhangaiakha, sha̱nao china keinung ngaveili khararnaobingli vāda hāngra, "Igaharawui achināna Israelli achināwui aming juingasakkhavai mamayāmana; iwui agatowui ot ili sākhavai makhangaimana." 8Chiwui thili awui keinungwui khararnaobingna ali hokhuilaga hāngra. Kha a nganingtitta leilaga, "Ali khuikhavai masākhangaimana," da hāngakha, 9achināwui preiva̱na khararnaobingwui miktāli awuili asamphangda, awui pheiwui eina pheihop khuishokmida, awui maili machora̱ mashorrora, kala hāngra, "Achināwui shim masāla mi chili chithāda sāra." 10Kala awui shimkhur chi Israelwui ngachaili "Pheihop khuishokmihaipawui shim" da hohaora.
11Mayar khani ngararlaga, akhawui preiva̱na attai chiwui eina agaharali yuikhavai rāda, pāng tonglaga awui khayā yonkhuiakha, 12chithākha nana awui pāng ta̱tekra. Ali malumashanalu.
13Nawui khaolungli khāntam ayur khani, asākai akha kala kateo akha, maleipaimara. 14Nawui shimli napon ayur khani, asākai akha kala kateo akha, maleipaimara. 15Khamashunga kala kākashunga khāntam leiranu; khamashunga kala kākashunga napon leiranu, chithākha nathumwui Avāna nathumli mikahai ngaleili nathumwui atam longkatāra. 16Kaja chikathā ot sā mi kachiva̱, makhamashunga eina ot sā mi kachiva̱ chi, nathumwui Avāwui mangāli ningkakachai otna.
17Nathumna Egypt eina shokkahai atamli shongfali, Amalekna nathumli khi sāmi kahai chi phaningunglu, 18Kathāda ana nathumli shongfali samphangda, nathum vānhaida kala kakhanang leilakha nawui khanukshong eina khalei saikorali sāthatvai; kala ithumwui Avāli khangacheela maleisā. 19Nathumwui Avāna nathumwui kuimareida khalei yangkashebing saikorawui eina nathumli ngasāmkhui khangasak tharan, nathumwui Avāna nathumli shimluikat mikahai, vākhui khavai ngalei chili, okathuili Amaleknaobingwui ningphun sāshimānhaolu. Mamalaihailu.
