Khalatlui 24

24 ¹Kalikha mi akhana ngalā akha khuida, awui ngachaili makhayā ot akha samphanglaga ali ningyāng maungluihaiakha, ana apreiva̱li kapāngwui lairik kapida, apāngli sangda, awui shimwui eina chihora, ^a a v1 Miwui ning kachang chiwui vang eina Mosesna kapāng mayai; kha Jishuna Haokaphokli ithumwui Avāwui khangarān, mayarnao kala apreiva̱ ringkhavai saikorali akha ngasāzat khavai chi, hanluida latheingasaka (Matthew 19:8). ²kala ana awui shimwui eina unghailaga vāda mi kateiwui preiva̱ ngasāhaiakha, ³kala agahara kakhane china ali yangkharinghaida, kapāngwui lairik kapida, apāngli sangda, awui shimwui eina chihohaiakha, lah ali apreiva̱ sākhavai khui agahara kakhane chi thihaiakha, ⁴chieina ali chiho kahai agahara kharena, a makathar ngasāhairawui thili ali latluida mangakumpaimana; chi ithumwui Avāwui mangāli ningkakachai otna, kala nathumwui Avāna shimlui khavai nathumli mikahai ngaleili khayon masā ngasakpaimara.

⁵Kalikha mi akhana apreiva̱ kadhar khuiakha, ana raimili mazangpaimana, lah ali khichānida ot mamipaimana; ana khui apreiva̱li mathān ngasak khavai, a khalatta zingkum akha shimli ningkhān pamra.

⁶Khipānakha shingkhur khani, lah ato kachigat chi kha̱lala, leimanwui tuingashit khavai makhuipaimana; kaja chi mi kachiva̱wui ringkhavai chi tuingashit sākhui kahaina.

⁷Kalikha mi akhana achinā Israelnao akhali tukkhuida raona ngasak lah khayor kahai theihaiakha, chi karankha sāng kahai mi china thiphalungra. Chithāda nathumwui alungli makaphā ot kasā tharngasakra.

⁸Phārrei kazātwui vang, ina athumli kaso kahai tākam eina, Levi pāngmonbingna nathumli tamchitheimi saikora chi mathālak eina sāra kaji theilu. ⁹Egyptwui eina nathum kharāthang apongli, nathumwui Avāna Mariamli sākahai chi phaningunglu.

¹⁰Nawui khongnainaoli khichānida chishutakha, awui tuingashit khui khavai awui shimli mazangpaimana. ¹¹Na khalatta ayarli nganingra, kala kashuka china tuingashit chi nawui pāngli khuishokra. ¹²Kha ana kachāma mi ngasaakha, awui tuingashit chi ngayā mathangnampaimana. ¹³Zimik matunranglakha awui tuingashit chi hanmihaolu, chieina ana awui kachonli pida nali somira; kala nawui Avāna nali khamashungana da shānkhuira.

¹⁴Achinā nilala, lah nawui keinunglungli, nawui ngaleili ngasokhara kha̱mi nilala, ngalang kaphei kachāma kala khavāta mili marekharekpaimana. ¹⁵Zimik matunranglakha chithang ngalāngda awui ngalang aman chi mihaolu; kaja a kachāma mi ngasāda chili ana ningshaira. Chi maningakha ana nawui vang ithumwui Avāli ngakaora, chieina chi nawui vang khayon ngasāra.

¹⁶Nava̱ navā chi athumwui naongarāwui vang masāthatpaimana, lah naongarā chi aniva̱ anavāwui vang masāthatpaimana; mi kachiva̱ chi a khalattawui moreiwui vang sāthatphalungra.

¹⁷Kha̱mi lah avāva̱ makhalei mibingwui mashun mamatuikhayeipaimara, lah ra̱meiva̱wui kachon tuingashit khavai makhuipaimana. ¹⁸Nathum phaningunglu kaja Egyptli nathum raonao sāsai, nathumwui Avāna chiwui eina nathumli ngatangkhuimi; chiwui vang eina ina nathumli hi sākhavai kagasona.

¹⁹Nathumna nathumwui luili mā kahāt tharan māmazān akha malailaga, chi ungkhui khavai malatungaranu. Chi kha̱minao, marānao, kala ra̱meinaobingwui vang taimilu, chithākha nathumwui pāng eina otsak kachiva̱li nathumwui Avāna nathumli somira. ²⁰Nathumna nathumwui oliverong kaphā tharan, aphāngbingli latluida maphāvālu; katai chi kha̱minao, marānao, kala ra̱meinaobingwui vang taimilu.

²¹Nathumwui drakhā yāmguili drakhāthei phākhui tharan, katai chi maphākhuiserhaialu; chi kha̱minao, marānao, kala ra̱meinaobingwui vang taimilu. ²²Nathum phaningunglu kaja Egypt ngaleili nathum raonao sāsai; chiwui vang eina ina nathumli hi sākhavai kagasona.