Dokokin Gida da na Maƙwabci

Dokokin da suke kāre mutane a lokacin da suka fi rauni: sabon miji an keɓe shi daga yaƙi har shekara ɗaya, ba a karɓar dutsen niƙa jingina, ana mayar wa matalauci mayafinsa kafin faɗuwar rana, ana biyan ladan aiki a ranar. Dammunan da aka manta, da sauran zaitun da inabi, na baƙo ne, da maraya, da gwauruwa.

Babi na 24.

Sa'ad da mutum ya auri mace, in ba ta ƙara faranta masa rai ba domin ya sami wani abin kunya a gare ta, sai ya rubuta mata takardar saki, ya ba ta a hannunta, ya kuma kore ta daga gidansa, ^a in kuma ta bar gidansa ta tafi ta zama matar wani mutum, in kuma mijinta na biyu ya ƙi ta, ya rubuta mata takardar saki, ya ba ta a hannunta, ya kuma kore ta daga gidansa—ko kuwa in mijin nan na biyu da ya aure ta ya mutu, to, mijinta na farko, wanda ya kore ta, ba zai sāke auren ta ba bayan an ƙazantar da ita; wannan abin ƙyama ne a gaban Ubanmu, kada kuma ka jawo laifi a kan ƙasar da Ubanka yake ba ka gādo.

Sa'ad da mutum ya auri sabuwar mata, kada ya shiga soja ko a ɗora masa wani aiki; zai zauna 'yantacce a gida shekara guda, domin yă faranta wa matar da ya auro rai.

Kada wani yă karɓi dutsen niƙa biyu, ko ma na sama kaɗai, matsayin jingina don bashi—gama da haka ya jingina abin rayuwar mutum ke nan.

In an sami wani mutum yana satar wani ɗan'uwansa Ba'isra'ile, ya mai da shi bawa ko ya sayar da shi, dole wannan ɓarawo yă mutu. Saboda haka ka kawar da mugunta daga cikinku.

Game da cutar fata mai ƙazantarwa, ka mai da hankali sosai ka yi daidai yadda firistoci Lawiyawa suka koya maka, kamar yadda na umarce su. Ka tuna abin da Ubanka ya yi wa Miriyam a hanya sa'ad da kuka fito daga Masar.

Sa'ad da ka ba maƙwabcinka rance wani abu, kada ka shiga gidansa ka karɓi jinginarsa. Ka tsaya a waje, mutumin da ka ba rance kuwa yă fito maka da jinginar. In kuwa matalauci ne, kada ka kwana da jinginarsa. Ka mayar masa da jinginarsa kafin fāɗuwar rana, domin yă kwana da mayafinsa yă kuma albarkace ka; Ubanka kuwa zai lissafta maka wannan adalci.

Kada ka zalunci ɗan ƙodago matalauci, mabuƙaci, ko ɗan'uwa ne ko baƙo da yake zama a ƙasarka, cikin garuruwanka. Ka biya shi albashinsa a ranar, kafin fāɗuwar rana—gama matalauci ne yana kuma dogara ga albashin. In ba haka ba, zai yi kuka ga Ubanmu a kanka, yă kuma zama maka zunubi.

Kada a kashe iyaye saboda 'ya'yansu, ko a kashe 'ya'ya saboda iyayensu; kowa za a kashe shi saboda zunubin kansa.

Kada ka hana baƙo ko maraya adalci, kada kuma ka karɓi mayafin gwauruwa matsayin jingina. Ka tuna kai bawa ne a Masar; Ubanka kuwa ya fanshe ka daga can—shi ya sa nake umartarka ka yi haka.

Sa'ad da kake girbin gonarka ka manta da wani dami, kada ka koma ka ɗauke shi. Ka bar shi domin baƙo, da maraya, da gwauruwa, domin Ubanka yă albarkace ka cikin dukan aikin hannuwanka. Sa'ad da kake kaɗa itacen zaitunka, kada ka sāke bin reshe-reshensa; ka bar abin da ya rage domin baƙo, da maraya, da gwauruwa.

Sa'ad da kake tattara 'ya'yan inabin gonar inabinka, kada ka tsinke abin da ya rage; ka bar shi domin baƙo, da maraya, da gwauruwa. Ka tuna kai bawa ne a ƙasar Masar; shi ya sa nake umartarka ka yi haka.