Chem hoba Lepbou shangabü Ngühkhüm shuong
Müt shuong himou phanga hapbü chalou ka lomla shanga ngühkhüm shuong: yaksa haanbü lebou po che lason to ahaujan, shemshi laang thesilan shanga alelabü, shalebü müteibü ngühchung chanyu neplep yepan leibaka, hoba eikbüla munam khünyettham kulabü. Sunglanga maalabü youthep hoba oliv si bamang hekmanbü shuong kho yenbou, bou akibü hoba latnyu shanga kilabü.
24 1Müt cheei yaksa che lealonga, hao jungka aikei asaopobü denche hapbü shanga sao to apienlonga, haoei sao la bangbü ngühchung le chenei doan, saoeibü ika jinan, hoba jembü chem ka sao sattila, a a v1 Müteibü maangpon kaangbü shanga Mosaei bangbü senetkei; lausikei Jisuei shaang ka seneibü Bouei lamleettibü, langkei salang sünga chela yeibü phai ngetikei (Matthew 19:8). 2hoba sao jembü chem ka longan hauan, lubü müt cheeibü yak la yeialonga, 3hoba saoeibü nyiboubü laoei sao amangsühda, sao la bangbü ngühchung le chenei doan, saoeibü ika jinan, hoba jembü chem ka sao sattila; ayingsi sao yak la lebü nyiboubü lao ho ühailonga, 4kheijinei sao sattibü saoeibü shaangbü laoei, sao asaopoko yeijinei phaia, tongde sao alelabü; kho seneibü Bou thedanga mangsenlabü ki, hoba Bouei kanei phetphanla kubü kaonyek to kanei shed asungjan.
5Müt cheei yaksa haanbü che lealonga, haoei sepai tan to ahaujan, ayingsi hao la kümsilei aikei akujan; hao lebü yak to olinyola shanga, po che jembü chema kümkaleika kilabü.
6Aoyouei shemshi dang, ayingsi khübü shangabü laang ong, thesilan shanga alelabü; aishanga kho müteibü langkei kho thesilan shanga sungbü ki.
7Müt atei jembü jaisina Israelbü che kokan, hao aao la yeian ayingsi yaaklaje, kho tekokbou tükde haitilabü. Khoei müt amaibü kho nyi ka yo ka apjan.
8Imbü mou baubü shanga nyi maimai maangsangashi, hoba Levi phang ungshedbou shuongei ka la lenbü pendou tegütham, ngei haoen la sakkubü tegü, nyi maimai kümashi. 9Kan Ijep kaodak ka longjinei lamnyua kaneibü Bouei Miriam to kümbü kho damenashi.
10Nyi kaibü lepbou la ajanjan lotkualonga, hao thesilan sungla shanga hao chem khüto aatjan. 11Nyi tang aenei lojan, hoba lotbü mütei thesilan tang ka nyi jungto sungbalabü. 12Hoba hao shalebü müt kialonga, nyi hao thesilan nyibounyet ngeyang sühko aphojan. 13Chanyu nepan phaia hao la thesilan kungaijan, hao jembü neisimeia yepan no haükula shanga; hoba Bouei kho no la saopobü tegü yeitikulabü.
14Kaibü jaisina yingsikei, kaibü kaoa kaibü sangnyua louan kibü yenbou yingsikei, shalebü khambü mulambü eikbou to nyi telepetti. 15Hao munam chaloutham, chanyu anepjineitham kujan; aishanga hao shalebü ki, hoba kho phai hao maanglemda. Khei aying longa hao no khulimbo seneibü Bou to ngeklabü, hoba kho no shanga shed yeilabü.
16Nyusibou shuong shousi shuong shanga ahaitijan, ayingsi shousi shuong nyusibou shuong shanga ahaitijan; mütpem weko jembü shabü shanga ong haitilabü.
17Nyi yenbou ayingsi bou akibü to ngühmai akhüpeilangei, ayingsi latnyu neisimei thesilan shanga alejan. 18Kankei Ijepa aaola lean kikei, hoba kaneibü Bouei khüka kan khümenkei dogo damenashi; khoei ngei kan la ho kümla sakkuda.
19Ladang kanei kaneibü sek latlaje, hoba youshang che amaalonga, kho lela nyibou asepeijan. Kho yenbou, shoujit hoba latnyu la apyokushi, khei kaneibü Bouei kaneibü ikkümiklei pendoua kan haükulabü. 20Ladang kanei kaneibü oliv bu helaje, bhek shuong nyibou tedanjan; jouan kibü kho yenbou, shoujit hoba latnyu la apyokushi.
21Ladang kanei kaneibü semlühlaak ka semlüh kheilaje, ai joulaje kho nyibou athanjan; kho yenbou, shoujit hoba latnyu la apyokushi. 22Kankei Ijep kaodaka aaola lean kikei dogo damenashi; khoei ngei kan la ho kümla sakkuda.
