Seneibü Bou Tan To Aoyou Lotla Thükda
Aoyou müt shuongei Bou tan to lotla thükbü shanga ngühkhüm shuong, hoba kaneibü Bouei kan to sanoukei aishanga Balaameibü shedsikhau to haülabü la sepeibü damenbü. Haoei lasona haubü shanga kho ponpen phoan kilabü. Kokbü khangenbou che to leibakula athükkulabü. Jaisina to phopnam alotkujan; takletkubü kho kulabü.
23 1Aoyou müt tokkhet janyinbü ayingsi wapnyinbü kho seneibü Bou tan to alotlabü. 2Asangalan ka bukbü aoyou kho seneibü Bou tan to alotlabü; haoeibü thensilen si, meten anboubü sühko, seneibü Bou tan to alotlabü. 3Ammonbü ayingsi Moabbü kho seneibü Bou tan to alotlabü; meten anboubü sühkei haoen yoa kibü aoeikei seneibü Bou tan to ponpenje alotlabü. 4Aishanga Ijep ka longbü lama haoenei kan to wentek hoba dei yoa ahaüyokei, hoba kan khüklauokla shanga Mesopotamaia Pethora kibü Beoreibü shou Balaam jekthetkei. 5Lausikei kaneibü Bouei Balaameibü ngüh ditla athelet, hoba kan shanga shedsikhau kho haülabü la sepeikei, aishanga kaneibü Bouei kan to sanoukei. 6Kanei haoeneibü sangmai ayingsi haoeneibü yaangbü, kaneibü salang pendoua, ponpenje alamjan. 7Edombü temangsen; hao kaneibü na ki. Ijepbü temangsen; kan haoeibü kaodaka yenbou la kikei. 8Haoen la meten semboubüa bukbü shousi shuong kho seneibü Bou tan to lotla thükkei.
Shaishang Saopobü Kila
9Kaneibü dangbou khulimbo shaishang la lason to haulaje, amaibü peisilei pendou ka kaneibü jembü lomjan. 10Kan yoa aoyou müt nin jotdei longbüei asaopoko kilaje, hao shaishang tang to atlabü hoba nyibou khüto alotlabü. 11Chasem sühlaje, haoei deia mang yulabü; chanyu neplaje hao shaishang to longeilabü. 12Shaishang tang to kanei setla atla kaonyek che kijan. 13Kaneibü peisilei yoa thubü peisilei che phojan. Kanei tanga setlaje, khübüei khün che thujan hoba kaneibü longbü naangan apjan. 14Kaneibü Bouei kan khümenla hoba kaneibü dangbou kan ika thüngbou yeitila shanga kaneibü shaishang danthet paida; khoei kaneibü shaishang saopobü kilabü, hao kan yoa chühenbü peisilei aikei ahapko kan ka asepeila shanga.
Yoa Lemako Kila Ngühkhüm Shuong
15Haoeibü bunyu ka kan junga satenbü aao kho haoeibü bunyu to ayeitijan. 16Hao kan yoa, kan ka, haoei pienbü kaneibü sangnyu weko-a, hao kimangsühbü kaoena kilabü. Hao amaiko tejungei.
17Israelbü nouyangnyu aoeikei lemshang suonlamnyu ayeilabü, hoba Israelbü bousushou aoeikei lemshang suonlambou ayeilabü. a a v17 “Lemshang suonlamnyu” kho lubü mühghaü shuong ponbü-bukbü khangenbü yoa jiti kikei, kaangbüsekbü suonlam aying — ho kümsilei kho jam hoba heangsho ungshed jinyokukei, hoba seneibü Bouei ho jembü shousi shuong yoa theletda. 18Takletbü ai ong shanga asangalan saoeibü munam ayingsi keieibü phopnam kaibü Bou chem to tesungba; aishanga khübü haosi ham kaibü Bou thedanga mangsenlabü ki. b b v18 Hiko “keie” dogo laubü kho lemshang chema asangalan yeibü bousu shanga lenbü nyen ki; haoeibü phopnam, asangalan saoeibü tegü, lembü shanga noubüsoubü ki.
19Kaibü jaisina ka nam ka yingsikei, shausiyung ka yingsikei, ayingsi lentibü ai ong ka yingsikei phopnam teku. 20Yenbou ka phopnam hila thükkei, lausikei kaibü jaisina ka teku; khei no lela atan kibü kaonyeka kaibü ikei kümbü pendoua kaibü Bouei no haükulabü.
21Ladang no kaibü Bou shanga theletbü che theletlaje, kho kula tephai, aishanga kaibü Bouei maimaitham no ka kho hilabü; hoba kho no thüka shabü kilabü. 22Lausikei no atheletlonga, no thüka shabü akilabü. 23No kaibü Bou shanga theletbü laobou kho jungeijan hoba kümjan; aishanga no jembü sembungei maangmaiko laukei. 24Ladang no kaibü lepboueibü semlühlaak to louan kilaje, semlüh hek no mangsühbü tegütham shi shenko shaula thükkei; lausikei kaibü neimoka aikei tejinku. 25Ladang no kaibü lepboueibü loan kibü youshou to louan kilaje, youman kaibü ikei shenla thükkei; lausikei kaibü lepboueibü loan kibü youshou to bale teshing.
