Koukhüna Matjembü
Ngümbü kho lashuok saonyia kümkaleika, aishanga jaisina kho nyi jembü mütli yuktibü aying. Masu youshou nakjinei haoeibü hakhin akapjan. Latnyueibü haibü laoeibü nyen haoeibü naei langlabü, ayinglonga na kho koukhüna shamtikulabü. Seret laang hoba kam shuong honeibü kijan.
25 1Ladang müt shuongei lemenbü kilaje hoba matjembo haulaje, haoen kanglanga matjembü shuongei ngühmaanglanbü matmaitiko amaibü yuktilabü, 2Hobaje amaibü müt ngümla mubü yingalonga, matjembouei hao yeptian hao thedanga haoeibü shabü tegü lashuok wela ngümlabü. 3Lashuok saonyi ngüman, kho to juong tekün; haoei khübü to juong ngümalonga, kaibü na kaibü nyek thedanga aweasüngbü yeilabü.
4Masu nyak nakjinei nyi haoeibü hakhin akapjan.
5Ladang jaisina shuong chela longalonga hoba cheei shou akiko haialonga, haitibü müteibü yak küksithang müt to ayakjan. Saoeibü laoeibü naei sao yakla lejan hoba sao to yepan laoeibü janbü kümsilei kümjan. 6Sao ngeanbü shaang bukbü shouei haitibü kaeibü nyen langlabü, aingenyu haoeibü nyen Israel ka aapjan.
7Hobaje müt kho kajaieibü yak lela amangsühlonga, sao koukhüna leiyeibü shuong jungto anglabü hoba laulabü, “Kü laoeibü naei haoeibü na nyen Israel ka longtila maangüangda; haoei kü to laoeibü janbü kümsilei kümla amangsühda.” 8Kheijinei haoeibü sangnyu leiyeibü shuongei hao ngaan hao to lenlabü. Haoei maangangan laualonga, “Ngei sao lela amangsühda,” 9kajaieibü yakei leiyeibü shuong thedanga hao jungto nyangko louan, haoeibü you ka ngok hangletnyu apan, haoeibü thenyek to eok thoan hoba laulabü, “Kajaieibü chem adangbou müt to ho tegü kümtilabü.” 10Hoba haoeibü chempen Israel ka, “Ngok hangletnyu apbü müteibü chem,” dogo nyenlabü.
11Ladang müt nyi wapyoalonga, hoba cheeibü yakei saoeibü lao hao to hau kibou ik ka khümenla louan, sao ikei haoeibü jambü maang hatlepalonga, 12kheijinei nyi saoeibü ik thükenjan. Kaibü nyekei phokeiko achühjan.
13Nyi kaibü nyingkoua hauan chühbü phang lulu penyi, yaangbü che hoba hanbü che, akijan. 14Nyi kaibü chema efa phang lulu penyi, yaangbü che hoba hanbü che, akijan. 15Pen hoba tükde hauan chühbü kijan; pen hoba tükde efa kijan; kheijinei kaibü Bouei ka la kubü kaodaka kaibü chalou longlabü. 16Aishanga ho tegübü kümsilei kümbü pendou, dishon kümbü pendou, kaibü Bou shanga shalabü ki.
17Nyi Ijep ka leiyenjinei lama Amalekbüei ka to ai kümbei kho damenashi, 18Haoei lama no haüyokei, hoba no semthetan hoba mangan kijinei kaibü phaito loubü shuong pendou haitikei, hoba haoei seneibü Bou to soumo ahatkei. 19Kaibü Bouei no kaijembo kibü dangbou pendou ka no la hakso kulaje, kaibü Bouei no la phetphan lela shanga kubü kaonyeka, mühnyu phang ka Amalek damenbü haman apashi. Tema.
