Kĩhooto Kĩhingoinĩ
Iboko itingĩkĩra mĩrongo ĩna, nĩguo mũrũ wa ithe waku ndakaconorithio maithoinĩ maku. Ndegwa ndĩohagwo kanua ĩkĩranga ngano. Rĩĩtwa rĩa mũthuuri wa mũtumia wa ndigwa rĩtũũragio nĩ mũrũ wa ithe wake, kana mũrũ wa ithe ũcio aconorithio kĩhingoinĩ. Ithimi na mĩthimo no mũhaka ikorwo irĩ cia ma.
25 1Angĩkorwo andũ nĩ marĩ na ngarari magathiĩ gũtuĩrwo ciira, nao atuĩri a ciira arĩa maratua ciira gatagatĩ kao nĩmagatua ũrĩa ũtehĩtie atĩ nĩ mũthingu, na matuĩre ũrĩa mwĩhia ciira, 2Na angĩkorwo mũndũ ũcio mwĩhia aagĩrĩirwo nĩkũhũũrwo, mũtuanĩri-ciira nĩakamũkomia thĩ, na ahũũrwo mbere yake, iboko igĩtarwo kũringana na wĩhia wake. 3No ahũũrwo iboko mĩrongo ĩna, itigakĩre ũguo; nĩgũkorwo angĩmũhũũra agakĩria macio, mũrũ wa ithe waku nĩangĩconorithio maithoinĩ maku.
4Ndũkanoohe ndegwa kanua rĩrĩa ĩkũranga ngano.
5Angĩkorwo aariũ a ithe ũmwe nĩmatũũranagia, na ũmwe wao agĩkua atarĩ na mũriũ, mũtumia wa ũrĩa ũkuĩte ndakanahikĩre mũndũ wa nja. Mũrũ wa ithe wa mũthuuriwe nĩwe ũkũmũhikia atuĩke mũtumia wake, akome nake, na amũhingĩrie wĩra wa ũramu. 6Nake irigithaathi rĩrĩa mũtumia ũcio akaaciara, nĩrĩgeetanio na rĩĩtwa rĩa mũrũ ũcio wa ithe ũkuĩte, nĩgeetha rĩĩtwa rĩake rĩtikaaniinwo kuuma Isiraeli.
7No angĩkorwo mũndũ ũcio ndakwenda kũhikia mũtumia wa mũrũ wa ithe, mũtumia ũcio nĩakaambata athiĩ kũrĩ athuuri kĩhingoinĩ, oige atĩrĩ, “Mũramu wakwa nĩaregete gũtũũria rĩĩtwa rĩa mũrũ wa ithe thĩinĩ wa Isiraeli; ndangwenda kũhingia wĩra wa ũramu harĩ niĩ.” 8Nao athuuri a itũũra rĩake nĩmakamwĩta mamwĩre ũhoro ũcio. No angĩkorwo akaarũgama ekĩrĩire, akiuga atĩrĩ, “Ndikwenda kũmũhikia,” 9mũtumia ũcio wa mũrũ wa ithe nĩakamũkuhĩrĩria mbere ya athuuri, aruute kĩraatũ gĩake kuuma kũgũrũinĩ gwake, amũtuĩre mata ũthiũinĩ, oige atĩrĩ, “Ũũ nĩguo mũndũ ũrĩa ũregaga gwaka nyũmba ya mũrũ wa ithe ekagwo.” 10Nayo nyũmba yake nĩĩgeetagwo thĩinĩ wa Isiraeli, “Nyũmba ya ũrĩa warutĩirwo kĩraatũ.”
11Angĩkorwo arũme eerĩ nĩmararũa, naguo mũtumia wa ũmwe wao ookie gũteithũra mũthuuriwe kuuma kũrĩ ũrĩa ũramũhũũra, agĩtambũrũkia guoko gwake, akanyiita mũndũ ũcio ciĩga ciake cia hitho, 12hĩndĩ ĩyo nĩũkamũtinia guoko gwake. Ndũkamũiguĩre tha.
13Ndũkagĩe na mahiga meerĩ ma gũthima matahaanaine mondoinĩ yaku, rĩmwe inene na rĩrĩa rĩngĩ inini. 14Ndũkagĩe na ithimi igĩrĩ itahaanaine nyũmbainĩ yaku, kĩmwe kĩnene na kĩrĩa kĩngĩ kĩnini. 15Gĩa na ihiga rĩa gũthima rĩrĩa rĩiganĩire na rĩa ma; gĩa na gĩthimi kĩrĩa kĩiganĩire na kĩa ma, nĩgeetha matukũ maku maingĩhe bũrũriinĩ ũrĩa Ithe waku arakũhe. 16Nĩgũkorwo mũndũ o wothe wĩkaga maũndũ ta macio, o wothe wĩkaga maũndũ matarĩ ma kĩhooto, nĩ kĩndũ kĩrĩ magigi harĩ Ithe waku.
17Ririkana ũrĩa Amaleki aakwĩkire njĩrainĩ rĩrĩa woimaga bũrũri wa Misiri, 18ũrĩa aagũtũngire njĩrainĩ, akĩũraga arĩa oothe maatigaraga na thuutha waku rĩrĩa waarĩ mũnogu na mũhũthĩru, nake ndeetigĩrĩte Ithe witũ. 19Rĩrĩa Ithe waku agaakũhe ũhurũko kuuma kũrĩ thũ ciaku ciothe iria ikũrigiicĩirie, bũrũriinĩ ũrĩa Ithe waku arakũhe ũtuĩke igai rĩaku rĩa kwĩgwatĩra, nĩũkaaniina kĩririkano kĩa Amaleki gĩthire kuuma rungu rwa igũrũ. Ndũkariganĩrwo.