申命記 25

25 ¹如果人與人之間有爭執，去到公堂，審判官斷案，判無罪嘅人冇罪，判有罪嘅人有罪。 ²如果有罪嘅人抵受鞭打，審判官就要叫佢趴低，喺自己面前照佢嘅罪按數目打佢。 ³最多打四十下，唔可以再多；如果打多過呢個數，你嘅弟兄就會喺你眼前受辱。

⁴牛喺度踹穀嘅時候，你唔可以籠住佢個嘴。

⁵如果兄弟住埋一齊，其中一個死咗又冇仔，死者嘅妻子唔可以嫁畀外人。佢丈夫嘅兄弟要娶佢做妻子，同佢同房，盡到小叔對佢嘅本分。 ⁶佢生嘅頭胎要歸喺死咗嗰個兄弟名下，咁佢個名就唔會喺以色列中被塗抹。

⁷如果嗰個男人唔想娶佢兄弟嘅妻子，佢就要上到城門口嘅長老嗰度，話：「我丈夫嘅兄弟唔肯喺以色列中為佢兄弟立名，唔願意盡小叔對我嘅本分。」 ⁸本城嘅長老就要召佢嚟同佢講。如果佢企硬，話：「我唔想娶佢。」 ⁹佢兄弟嘅妻子就要喺長老面前行埋去，脫甩佢腳上嘅鞋，向佢面上吐口水，話：「唔肯為自己兄弟建立家室嘅人，就要咁樣對待佢。」 ¹⁰佢嘅家族喺以色列中就會叫做「畀人甩咗鞋嗰個人嘅家」。

¹¹如果兩個男人打交，其中一個嘅妻子走嚟救佢丈夫脫離打佢嗰個人，佢伸手抓住嗰個人嘅下體， ¹²你就要斬斷佢隻手，唔可以憐惜佢。

¹³你袋裏面唔可以有兩種法碼，一大一細。 ¹⁴你屋企裏面唔可以有兩種量器，一大一細。 ¹⁵你要用十足、公道嘅法碼；要用十足、公道嘅量器，咁你就可以喺你嘅父賜畀你嘅地上長久。 ¹⁶因為凡做呢啲事、凡行事不公道嘅人，都係你嘅父所憎惡嘅。

¹⁷你要記住你哋出埃及嘅時候，亞瑪力喺路上點樣對待你， ¹⁸佢喺路上遇到你，趁你疲乏困倦嘅時候，喺你後面砍殺所有落後嘅人，佢一啲都唔敬畏我哋嘅父。 ¹⁹當你嘅父使你脫離四圍所有仇敵得享安息，喺你嘅父賜畀你為業、要你去得嘅地上嘅時候，你要喺天下塗抹亞瑪力嘅名號。唔好唔記得。