ዘዳግም 25

25 ¹ሰዎች በመካከላቸው ክርክር ቢኖርና ለፍርድ ቢቀርቡ፣ በመካከላቸው የሚፈርዱት ዳኞች ንጹሑን ነጻ ያወጣሉ፤ በደለኛውንም ይኰንናሉ፤ ²በደለኛውም መገረፍ የሚገባው ቢሆን፣ ዳኛው በፊቱ አስተኝቶ እንዲገረፍ ያደርጋል፤ ግርፋቱም እንደ በደሉ መጠን በቍጥር ይሆናል። ³አርባ ግርፋት ይሁን እንጂ ከዚህ አይብዛ፤ ከዚህ አልፎ ቢገርፈው ወንድምህ በዓይኖችህ ፊት ይዋረዳል።

⁴በሬ እኽሉን ሲረግጥ አፉን አትሰር።

⁵ወንድማማቾች አብረው ቢኖሩ አንዱም ወንድ ልጅ ሳይወልድ ቢሞት፣ የሟቹ ሚስት ከባዕድ ሰው ጋር አትጋባ። የባሏ ወንድም ሚስት አድርጎ ይውሰዳት፤ ይተኛት፤ የባል ወንድም ግዴታውንም ይወጣላት። ⁶የምትወልደውም በኵር ልጅ የሟቹን ወንድም ስም ይይዛል፤ ስሙም ከእስራኤል እንዳይጠፋ ነው።

⁷ሰውዬውም የወንድሙን ሚስት መውሰድ ባይፈልግ፣ ሚስቲቱ በበሩ ወዳሉት ሽማግሌዎች ወጥታ፣ “የባሌ ወንድም የወንድሙን ስም በእስራኤል ለማስነሣት እምቢ ብሏል፤ የባል ወንድም ግዴታውን ሊወጣልኝ አልፈቀደም” ትላለች። ⁸የከተማውም ሽማግሌዎች ጠርተው ይነጋገሩታል። እርሱም፣ “ልወስዳት አልፈልግም” ብሎ ጸንቶ ቢቆም፣ ⁹የወንድሙ ሚስት በሽማግሌዎች ፊት ወደ እርሱ ቀርባ ጫማውን ከእግሩ ታወልቅ፤ በፊቱም ትተፋ፤ “የወንድሙን ቤት ለማይሠራ ሰው እንዲህ ይደረግበታል” ትላለች። ¹⁰ቤተ ዘመዱም በእስራኤል ውስጥ፣ “ጫማው የተወለቀበት ሰው ቤት” ተብሎ ይጠራል።

¹¹ሁለት ሰዎች ቢጣሉ የአንዱም ሚስት ባሏን ከሚመታው ለማዳን መጥታ እጇን ዘርግታ ብልቱን ብትይዝ፣ ¹²እጇን ትቈርጣለህ፤ አትራራላት።

¹³በከረጢትህ ውስጥ ትልቅና ትንሽ፣ ሁለት ዐይነት ሚዛን አይኑርህ። ¹⁴በቤትህ ውስጥ ትልቅና ትንሽ፣ ሁለት ዐይነት መስፈሪያ አይኑርህ። ¹⁵ሙሉና ትክክለኛ ሚዛን ይኑርህ፤ ሙሉና ትክክለኛ መስፈሪያ ይኑርህ፤ አባትህ በሚሰጥህ ምድር ላይ ዘመንህ እንዲረዝም ነው። ¹⁶እንደዚህ የሚያደርግ ሁሉ፣ ዐመፃን የሚፈጽም ሁሉ በአባትህ ዘንድ የተጠላ ነውና።

¹⁷ከግብፅ በወጣህ ጊዜ በመንገድ ላይ ዓማሌቅ ያደረገብህን ዐስብ፤ ¹⁸ደክመህና ዝለህ ሳለ፣ በመንገድ ላይ እንዴት እንደ ተገናኘህ፣ ከኋላህም የቀሩትን ደካሞች ሁሉ እንዴት እንደ ጨረሰ፣ አባታችንንም እንዳልፈራ ዐስብ። ¹⁹አባትህ በዙሪያህ ካሉት ጠላቶችህ ሁሉ ዕረፍት በሚሰጥህ ጊዜ፣ አባትህ ትወርሰው ዘንድ ርስት አድርጎ በሚሰጥህ ምድር ላይ፣ የዓማሌቅን መታሰቢያ ከሰማይ በታች ደምስስ። አትርሳ።