Kirwooget eng' Kurgeet
Keiti pireet rabutik artam kityo si ma king'aanegitu tupcheng'ung' eng' taing'ung'. Mat irat kutit eito ye tyechei peek. Keriibei kainetap chii ne kame eng' tupchonooto, anan king'aanegitu tupchonooto eng' kurgeet. Kanyool koek ratilisyek ak karogutik che po iman.
25 1Ngo tinyei murenik tiyet ak kobwa kapkirwook, ko ingobesyechi kirwoogik kwenunnywa, koityi imanda ineendet ne po iman ak kogikyi ineendet ne kalel, 2ngo nyoljin chiito ne kalel korabei, ko ingomwachi kirwoogindet koruiyo ng'wony ak kerabat eng' tainnyi, rabutik che kiit ko uu chalwoktanyi. 3Rabutik artam, matesak; ngo rabei kosiir choochu, ko king'aanegitu ng'eetap kamenng'ung' eng' taing'ung'.
4Amat irat kutit eito kota kobil ngano.
5Ngo menye tupchosyek kaagenge ak kome agenge ne matinyei weeriit, ko amat kotun chebyosetap chiito ne kame kipsagarin ne po saang'. Ingonam ng'eetap manong'otyondennyi koek osotyonnyi, ak koruiyo ak ineendet, ak koyachi poisyet ne po imbomuret. 6Weeriit ne tai ne kisich, ko ingonam kainetap tupchonooto ne kame, si ma pet kainennyi eng' Israel.
7Ngo ma mach chiito konam chebyosetap ng'eetap kamennyi, ko kotogosta kwonyooto ole mi poisyek eng' kurgeet ak kole, “Eesyo ng'eetap manong'otyondennyu kong'eetun kainetap tupchennyi eng' Israel; maache koyaiywo poisyet ne po imbomuret.” 8Yeityo koguur poisyegap nganasennyi ak kong'alaalji. Ngo otonone kole, “Ma amach anam ineendet,” 9ko ingoriikyi chebyosetap ng'eetap kamennyi eng' taitap poisyek, ak koicher sandet eng' keldennyi, ak kong'utyi togeennyi, ak kole, “Kiyachin kou ni chiito ne maache koteech kootap ng'eetap kamennyi.” 10Ak keguure kaanyi eng' Israel, “Kootap chiito ne kigeicher sandet.”
11Ngo baregei murenik aeng ak konyo chebyosetap age kosar manong'otyondennyi eng' chiito ne baret, ak koiyogoi eunnyi ak konam kiit ne ung'ot, 12ko itil eunnyi. Ama ye igeer, iriiree.
13Amat itinye eng' loletng'ung' koik che weigei che teerchiin aeng, age ne oo ak age ne ming'in. 14Amat itinye eng' kaang'ung' kerutik che teerchiin aeng, age ne oo ak age ne ming'in. 15Itinye koito ne nyiit ak ne po iman; itinye keruut ne nyiit ak ne po iman, si koloo peetuusyekung'ung' eng' emet ne koonin Kwandang'ung'. 16Amu chii age tugul ne yae tuguuchooto, chii age tugul ne yae ne ma po iman, ko kiwechei eng' Kwandang'ung'.
17Ibwaat ne ki yaiwok Amelek eng' ooreet ye ipunu Misiri, 18ye ki tuiyowok eng' ooreet, ak kobar piik tugul che punjin let kota onyaluli ak ong'etat, ak ma koiywei Kwandanyo. 19Ye koonin Kwandang'ung' kaalyeet eng' puunik tugul che koigoor, eng' emet ne koonin Kwandang'ung' koek poroteet si ipoortoi, ko ibuuktoi kabwaatetap Amelek kobet eng' kurereetap kipsengwet. Amat iuren.