دروازادا عدالت
کؤتک قیرخ قامچی ائله محدودلانیر کی، قارداش گؤزلرئنئن قاباغیندا خار اولماسین. خرمن دؤیَن اؤکوزون آغزی باغلانماز. دول بئر آروادین اؤلن اَرئنئن آدی اونون قارداشی ائله ساخلانیر، یوخسا قارداش دروازادا خجالتلی اولور. چکی داشلاری و اؤلچولر دوز اولمالیدیر.
25 1اگر آداملارین آراسیندا داعوا دوشسه و محکمه‌یه گتسه‌لر، اونلارین آراسیندا قضاوت ادن قاضی‌لار صالح آداما بَرائت ورئب، تقصئرکار آدامی محکوم اتسئنلر. 2اگر تقصئرکار آدام دؤیولمه‌یه لایئق اولسا، قاضی اونو یره یاتیریب، گوناهینا مووافئق سایدا قامچی ائله اؤز قاباغیندا دؤیدورسون. 3قیرخ قامچی وورسون، آرتیق یوخ؛ اگر بوندان آرتیق اونو وورسا، قارداشین سنئن گؤزلرئنئن قاباغیندا خار اولار.
4خرمن دؤیَن اؤکوزون آغزینی باغلاما.
5اگر قارداشلار بئرلئکده یاشاییب، اونلاردان بئری اوغلو اولمادان اؤلسه، اؤلن آدامین آروادی اؤزگه بئر آداما اَره گتمه‌سئن. اَرئنئن قارداشی اونو اؤزونه آرواد آلسین، اونونلا یاخینلیق اتسئن و اونا قایینلیق وظئفه‌سئنی یرئنه یتئرسئن. 6اونون دوغاجاغی ائلک اوغول، اؤلن قارداشین آدینی گؤتورسون کی، اونون آدی ائسرایئلدن سئلئنمه‌سئن.
7اگر او آدام قارداشینین آروادینی آلماق ائستمه‌سه، آرواد دروازادا اولان آغساقّاللارین یانینا چیخیب دسئن: «قاینیم قارداشینین آدینی ائسرایئلده یاشاتماقدان بویون قاچیردیر؛ منه قایینلیق اتمک ائسته‌مئر.» 8اوندا اونون شهرئنئن آغساقّاللاری اونو چاغیریب اونونلا دانیشسینلار. اگر او ثابئت دوروب دسه: «اونو آلماق ائسته‌مئرم»، 9قارداشینین آروادی آغساقّاللارین قاباغیندا اونا یاخینلاشیب، آیاغیندان چاریغینی چیخاردیب، اوزونه توپوروب دسئن: «قارداشینین اِوئنی تئکمک ائسته‌مه‌ین آداما بله اولونور.» 10اونون عایئله‌سی ده ائسرایئلده «چاریغی چیخاریلان آدامین اِوی» آدلاناجاق.
11اگر ائکی آدام ووروشوب، اونلاردان بئرئنئن آروادی اَرئنی اونو وورانین اَلئندن قورتارماق اوچون گلسه و الئنی اوزادیب اونون عورت یرلرئندن یاپیشیب، 12اوندا اونون الئنی کس. اونا رحم اتمه.
13تورباندا ائکی جور چکی داشی اولماسین، بئری بؤیوک، بئری کئچئک. 14اِوئنده ائکی جور اؤلچو اولماسین، بئری بؤیوک، بئری کئچئک. 15تام و دوز چکی داشین اولسون؛ تام و دوز اؤلچون اولسون کی، آتانین سنه وردئیی تورپاقدا گونلرئن اوزون اولسون. 16چونکی بله ائشلر گؤرن هرکس، حئیله ائله رفتار ادن هرکس، آتانا ائیرنجدئر.
17مئصئردن چیخاندا یولدا عَمالِقئن سنه نه اتدئیئنی یاددا ساخلا. 18او، یولدا سنئن قاباغینا چیخیب، سن یورغون و طاقتسئز اولاندا آرخادا قالان ضعئف‌لرئنی قیردی و آتامیزدان قورخمادی. 19آتان سنی اطرافینداکی بوتون دوشمنلرئندن راحات ادنده، آتانین سنه مئراث اولاراق صاحئب اولماغا وردئیی تورپاقدا، عَمالِقئن خاطئره‌سئنی گؤیون آلتیندان محو ات. یاددان چیخارتما.
