Deuteronomi 25

25 ¹Bí àwọn ọkùnrin bá ní aáwọ̀ tí wọ́n sì lọ sí ilé ẹjọ́, àwọn onídàájọ́ tí ń dájọ́ láàrin wọn yóò dá aláre láre, wọn yóò sì dá ẹlẹ́bi lẹ́bi, ²bí ọkùnrin ẹlẹ́bi náà bá tọ́ sí nínà, onídàájọ́ yóò mú un dùbúlẹ̀ kí a sì nà án níwájú rẹ̀, iye ẹgba tí yóò bá ẹ̀ṣẹ̀ rẹ̀ mu. ³Ogójì ẹgba, kì í ṣe ju bẹ́ẹ̀ lọ; bí ó bá nà án ju ìwọ̀nyí lọ, arákùnrin rẹ yóò di ẹni ìtẹ́ńbẹ́lú níwájú rẹ.

⁴Ìwọ kò gbọdọ̀ dí màlúù lẹ́nu nígbà tí ó bá ń tẹ ọkà.

⁵Bí àwọn arákùnrin bá ń gbé pọ̀ tí ọ̀kan nínú wọn sì kú láìní ọmọkùnrin, aya ọkùnrin tí ó kú náà kò gbọdọ̀ fẹ́ àjèjì. Arákùnrin ọkọ rẹ̀ gbọdọ̀ fi í ṣe aya rẹ̀, kí ó bá a sùn, kí ó sì ṣe ojúṣe àna sí i. ⁶Àkọ́bí tí obìnrin náà bá bí yóò jogún orúkọ arákùnrin tí ó kú, kí a má baà pa orúkọ rẹ̀ rẹ́ kúrò ní Israẹli.

⁷Bí ọkùnrin náà kò bá fẹ́ fẹ́ aya arákùnrin rẹ̀, obìnrin náà yóò gòkè lọ sí ọ̀dọ̀ àwọn àgbà ní ẹnu ibodè, yóò sì wí pé, “Arákùnrin ọkọ mi kọ̀ láti gbé orúkọ arákùnrin rẹ̀ ró ní Israẹli; kò fẹ́ ṣe ojúṣe àna sí mi.” ⁸Nígbà náà ni àwọn àgbà ìlú rẹ̀ yóò pè é, wọn yóò sì bá a sọ̀rọ̀. Bí ó bá dúró ṣinṣin, tí ó wí pé, “Èmi kò fẹ́ fẹ́ ẹ,” ⁹aya arákùnrin rẹ̀ yóò súnmọ́ ọn níwájú àwọn àgbà, yóò bọ́ bàtà rẹ̀ kúrò ní ẹsẹ̀ rẹ̀, yóò tutọ́ sí i lójú, yóò sì wí pé, “Báyìí ni a ń ṣe sí ọkùnrin tí kò fẹ́ kọ́ ilé arákùnrin rẹ̀.” ¹⁰Idílé rẹ̀ yóò sì máa jẹ́ ní Israẹli pé, “Ilé ẹni tí a bọ́ bàtà rẹ̀.”

¹¹Bí àwọn ọkùnrin méjì bá ń jà tí aya ọ̀kan nínú wọn sì wá láti gba ọkọ rẹ̀ lọ́wọ́ ẹni tí ń lù ú, tí ó na ọwọ́ rẹ̀ tí ó sì di abẹ́ ọkùnrin náà mú, ¹²nígbà náà ìwọ yóò gé ọwọ́ rẹ̀ kúrò. Má ṣàánú.

¹³Ìwọ kò gbọdọ̀ ní ìwọ̀n oríṣi méjì nínú àpò rẹ, èyí ńlá àti èyí kékeré. ¹⁴Ìwọ kò gbọdọ̀ ní òṣùwọ̀n oríṣi méjì nínú ilé rẹ, èyí ńlá àti èyí kékeré. ¹⁵Kí o ní ìwọ̀n kíkún tí ó sì tọ́; kí o ní òṣùwọ̀n kíkún tí ó sì tọ́, kí ọjọ́ rẹ lè pẹ́ ní ilẹ̀ tí Baba rẹ ń fún ọ. ¹⁶Nítorí ẹnikẹ́ni tí ó bá ṣe irú nǹkan bẹ́ẹ̀, ẹnikẹ́ni tí ó bá hùwà àìṣòótọ́, jẹ́ ìríra sí Baba rẹ.

¹⁷Rántí ohun tí Amaleki ṣe sí ọ ní ọ̀nà nígbà tí o jáde kúrò ní Ejibiti, ¹⁸bí ó ti pàdé rẹ ní ọ̀nà, tí ó sì pa gbogbo àwọn tí ń rẹ̀yìn lẹ́yìn rẹ nígbà tí àárẹ̀ àti ìrẹ̀wẹ̀sì mú ọ, tí kò sì bẹ̀rù Baba wa. ¹⁹Nígbà tí Baba rẹ bá fún ọ ní ìsinmi kúrò lọ́wọ́ gbogbo àwọn ọ̀tá rẹ tí ó yí ọ ká, ní ilẹ̀ tí Baba rẹ ń fún ọ gẹ́gẹ́ bí ìní láti ni í, pa ìrántí Amaleki rẹ́ kúrò lábẹ́ ọ̀run. Má gbàgbé.