Süngkhüm nung Obendang
Dak azüktsüji lirben dak tali tashi, anungji ne adianu ne nükdang maludaktsü. Nashi pungchi mo anetdang tebang mashibangtsü. Amitsür kinungpu tasüba tenüngji pei adianui maidoktsü, mesüra adianuji süngkhüm nung lushidaktsütsü. Touzükba aser tasazük ochiba alitsü.
25 1Nisungtem tsüngda nung mangatettep lia obendangdak noktaktsü arudir, obendangertemi parnok ana tsüngda nung o bendanga, tai makaba temeshi ta metenja, tai alibaji aitsütsü, 2Tai aliba nisungji maoktsü tetemsü süra, obendangeri pa madang pa mejangdak, pa tai yin agi lasha küma maoktsütsüla. 3Lasha lir, aji dang tulu masü; pai aji ajanga maokra, ne nenu ne tenük madang maksü alitsü.
4Nai tsük metedakba nashi pungchi tebang mashibangtsüla.
5Nedi-nenutem külemi lia, kari jabaso mekümi südokra, tasüba nisung kinungtsüi tangar nisung kibutsü magitsüla. La kinungpu nenui la agitsü, la den mejangtsü, aser la dang kinungpu nenu mapaji inyaktsüla. 6Lai asotsü mezüng jabasoi, tasüba nenu tenüng Israel nungi maidoktsü asoshi, pa tenüng agitsüla.
7Nisungi pei nenu kinungtsü agitsü memulungra, lai süngkhüm nung tambur dangi tua ashi, “Kü kinungpu nenui Israel nung pei nenu tenüng adoktsü memulunger; pai kü dang kinungpu nenu mapa inyaktsü memulunger.” 8Anungji pa yimti tamburtemi pa jaa pa den o jembitsü. Saka pai nenshia ashi, “Ni la agitsü memulunger,” 9pa nenu kinungtsüi tambur madang pa anasa arua, pa tsüng nungi pa tsüngsem semzüka agütsü, pa jak nung metsü metsüloktsü, aser ashitsü, “Pei nenu ki mayangluba nisung dang yamai inyaktsü.” 10Aser pa kinunger Israel nung, “Tsüngsem semzüka agütsüba ki,” ta jartsütsü.
11Nisung ana rarara, kari kinungtsüi pei kinungpu dak maokba nisung ket nungi kümzüktsü arua, lai teka songtoka pa tesemdak ameta, 12anungji nai la teka leptoktsüla. Taochi mesayutsüla.
13Nai ne juli nung toudangba balala ana, tulu ka aser tila ka, magitsüla. 14Nai ne ki nung tasadangba balala ana, tulu ka aser tila ka, magitsüla. 15Ochiba menemtsü toudangba agitsüla; Tebui ne nem agütsüba linük nung ne anogotem longlonga alitsü asoshi, ochiba menemtsü tasadangba agitsüla. 16Kechiaser yamala mapa inyaker ajak, tasa agi inyaker ajak, ne Tebu dang tesempatsü lir.
17Ijip nungi ne adoktsüdang lenmang nung Amalek nungeri ne dang kechi inyak, aji bilemtetang; 18pai lenmang nung ne ajuru, ne lula aser aniseta alidang, ne tesülen toktem ajakji laodaktsü, aser pai asen Tebu dang metsübu liasü. 19Ne Tebui ne meketa aliba ne tsükchirtem ajak nungi ne nem anisüngzük agütsüdang, ne Tebui ne nem senmang ta agütsüba, agia amangtsü linük nung, anüng kübok Amalek nunger indang mebilemtettsüsa samatsü. Nai mamatsüla.