Kaibü Bouei Kubü Kaodak
Kao langleeibü shaangbü buhek at louan, hombü mütei haoeibü meten alouko lenlabü—kübou kho sateibü Arambü che kikei, künei ngekkei, seneibü Bouei ditan sen khüka leian loukei—kheijinei Levi si yenbou yoa kuan olinyolabü. Tat haoei no haoeibü mütli ki dogo lenkei.
26 1Ladang kaibü Bouei phetphan shanga ka la kubü kaodak to no atlaje, kho phet phanan, hoba khünei settiashi, 2kaibü Bouei ka la kubü kaodak ka no shaula latbü kao langle pendou ka shaangbü buhek at louan, kam che ka jinan, hoba kaibü Bouei haoeibü nyen phola pienbü kaoena haushi. 3Kho jiha khangenbü ungshedbou jungto no louan laushi, “Tat ngei kaibü Bou to ngetida, seneibü Bouei seneibü pisibou la sen la kula theyolanyobü kaodak to ngei atkei.” 4Ungshedbouei kaibü ik ka kam kho lean, kaibü Bou lemshang thedanga pholabü. 5Kaibü Bou thedanga no hai laushi, “Kübou kho sateibü Arambü che kikei, hao Ijep to louyenkei hoba khünei yen la lean kikei, lühbak shisho ong, hoba khünei phang yaangbü, hau kibü hoba juongbü che la yeikei.” 6Lausikei Ijepbüei sen to amaiko jungeikei, hoba sen khonkutikei, hoba shieikoeko sen khangentikei. 7Künei seneibü Bou to ngekkei; seneibü Bouei seneibü ngek ditkei, hoba seneibü khonku, hüanmang, hoba shieikoe hapbei. 8Kheijinei seneibü Bouei hau kibü ikei, phem shingbüei, hatbü yaangei, hoba tetsida si seikümseilei shuongei sen Ijep ka khüka leian loukei. 9Haoei sen hanei leian loukei, hoba ho kaodak, sendei si naodei kouko kibü kaodak, sen la kukei. 10“Tou, O seneibü Abou, nyi kü la kubü kao ka shaangbü buhek ngei jungbü.” Kheijinei kho hao thedanga phoan, hao thedanga lemashi. 11No, Levibü, hoba ka yoa louan kibü yenbou shuongei, kaibü Bouei no hoba kaibü chemdang la kubü maibü pendoua olinashi.
12Sembou po, an phejan po ka, kaibü langle an phejan pendou künan khümtijaje, hoba kho Levibü, yenbou, aao müt, hoba latnyu la kuan, haoen kaibü sangnyua shauan senyühshemlabü shanga, 13kheijinei kaibü Bou thedanga laushi: Ngei saopobü phejan kü chem ka apbukei, hoba kho Levibü, yenbou, aao müt, hoba latnyu la kukei, nyi kü la sakkubü tegütham. Ngei kaibü sakkubü shuong alulimti, ayingsi amaada. 14Ngei kho ka mang haapbo aishaukua, asaopoko kijinei aikei aapbukua, haibü shanga aikei akuko. Ngei kü Bou ngüha lekei; nyi kü la sakkubü pendou ngei kümbü. 15Khuthüka kibü kaibü saopobü chem ka no the chühan, kaibü mütli Israel hoba nyi sen la kubü kaodak, seneibü pisibou la nyi theyolanyobü tegü, sendei si naodei kouko kibü kaodak, haükushi.
Maangpon hoba Soushou Pendouei Ngüha Lebü
16Tat kaibü Bouei ho ngühkhüm hoba matjem kümla ka la sakkuda; kaibü maangpon pendouei hoba kaibü soushou pendouei khübü kho jungeian kümashi. 17Tat nyi kaibü Bou kho kaibü Bou yinglabü dogo lenkei, hoba haoeibü lamnyua paila, haoeibü ngühkhüm, haoeibü sakkubü, hoba haoeibü matjem jungeila, hoba hao to ngüha lela. 18Tat kaneibü Bouei haoei kan la thekubü tegü, kan haoeibü jembü mütli, haoeibü phangche ki, hoba kanei haoeibü sakkubü pendou jungeilabü dogo ngetikei; 19hoba haoei kümbü phang pendou thüka kan phokulabü, nyensang, nyenhaang hoba nyenhang shanga, hoba haoei thekubü tegü, kan kaneibü Bou shanga saopobü mütli che yeilabü.
