UHlaziyo-mnqophiso 26 FHB Father's Heart Bible™

26 ¹Wothi wakufika ezweni uBawo wakho akunika lona libe lilifa, ulidle, uhlale kulo, ²uthabathe inxalenye yentlahlela yongeniselo lonke lomhlaba, oluvuna ezweni uBawo wakho akunika lona, uyibeke engobozini, uye kuloo ndawo uBawo wakho aya kuyinyula ukuba abeke khona igama lakhe. ³Uze uye kumbingeleli obingelela ngaloo mihla, uthi kuye: “Ndiyaxela namhlanje kuBawo wakho ukuba ndingenile ezweni uBawo wethu awalifungela oobawo bethu ukuba uya kusinika lona.” ⁴Umbingeleli wothabatha ingobozi esandleni sakho, ayibeke phambi kwesibingelelo sikaBawo wakho. ⁵Wandule ukuxela phambi koBawo wakho uthi: “Ubawo wayengumAram obhadulayo, owehla waya eYiputa, wahlala khona engowasemzini, embalwa ngenani, waza waba luhlanga olukhulu, olunamandla, oluninzi khona.” ⁶Kodwa amaYiputa asiphatha kakubi, asicinezela, asifaka ekukhonzeni okulukhuni. ⁷Sakhala kuBawo wethu; uBawo wethu wakuva ukukhala kwethu, wasibona isixhaxho sethu, nokubulaleka kwethu, nokucinezelwa kwethu. ⁸Waza uBawo wethu wasikhupha eYiputa ngesandla esithe nkqi, nangengalo eyolukileyo, nangonkwantyiso olukhulu, nangemiqondiso nezimanga. ⁹Wasizisa apha, wasinika eli lizwe, ilizwe elibaleka amasi nobusi. ¹⁰“Ngoku ndizisile intlahlela yomhlaba wena, Bawo wethu, ondinike wona.” Wandule ukuyibeka phambi kwakhe, uqubude phambi kwakhe. ¹¹Uvuye ngazo zonke izinto ezilungileyo uBawo wakho akuphe zona wena nendlu yakho, wena, nomLevi, nowasemzini ophakathi kwakho.

¹²Wothi wakugqiba ukuzisa isishumi esipheleleyo songeniselo lwakho ngomnyaka wesithathu, umnyaka wesishumi, uza usinike umLevi, nowasemzini, nenkedama, nomhlolokazi, ukuze badle emasangweni akho, bahluthe, ¹³wandule ukuthi phambi koBawo wakho: Ndiwususile umsitho ongcwele endlwini yam, ndawunika umLevi, nowasemzini, nenkedama, nomhlolokazi, njengako konke owandiwisela umthetho ngako. Andiyigqithanga nenye kwimithetho yakho, andiyilibalanga. ¹⁴Andidlanga nto kuwo ndisenza isijwili, andisusanga nto kuwo ndiyinqambi, andinikanga nto kuwo kwabafileyo. Ndiliphulaphule izwi likaBawo wam; ndenza konke owandiwiselayo. ¹⁵Khangela phantsi usendlwini yakho engcwele esezulwini, ubasikelele abantu bakho amaSirayeli, nelizwe owasinika lona, njengoko wawufungele oobawo bethu—ilizwe elibaleka amasi nobusi.

Ukuthobela ngeNtliziyo nangoMphefumlo

¹⁶Namhlanje uBawo wakho ukuwisele umthetho ukuba uyenze le mimiselo namasiko, uwagcine, uwenze ngentliziyo yakho yonke, nangomphefumlo wakho wonke. ¹⁷Namhlanje uvumile ukuba uBawo wakho nguBawo wakho—ukuba uhambe ngeendlela zakhe, ugcine imimiselo yakhe, nemithetho yakhe, namasiko akhe, umphulaphule. ¹⁸Namhlanje uBawo wakho uvumile ukuba ungabantu bakhe, ube yinqobo yakhe, njengoko wakuthembisayo, nokuba umelwe kuyigcina yonke imithetho yakhe, ¹⁹aze akumise phezulu ngaphezu kwazo zonke iintlanga awazenzayo, ukuba udunyiswe, udume, ube nozuko, nokuba ube ngabantu abangcwele kuBawo wakho, njengoko wathembisayo.