Tumar Pitri Diya Desh
Kheti laga poila phol ani kene, aradhana kora manuh tai nijor itihas jur pora kobo — moi laga baba ekjon ghuri phura Aramean asele, amikhan chilaise, amar Pitri pora hunise aru amikhan ke bahar loi anise — tetiya Levi aru bidesi logot di kene anondo kore. Aji Tai tumikhan ke Tai laga manuh koi kene ghoshona korise.
26 1Jitia tumar Pitri pora tumi ke uttoradhikar hisebe diya desh te tumi ghusi jabo, eitu ke adhikar koribi, aru ta te thakibi, 2tumar Pitri pora tumi ke diya desh pora tumi kata sob mati laga phol pora olop prothom phol loi kene, eitu ke ekta tukri te rakhibi, aru tumar Pitri pora Tar nam rakhibole basa jaga te jabi. 3Hei somoite kaam kori thaka purohit logot te jai kene kobi, “Amar Pitri pora amar baba khan ke dibole kosom kha desh te moi ghusi jaise koi kene, moi aji tumar Pitri age te koi ase.” 4Purohit pora tumar hath pora tukri tu loi kene tumar Pitri laga bedi age te rakhibo. 5Tumar Pitri age te kobi: “Moi laga baba ekjon eri-beri phura Aramean manuh thakise, kun Misor te namise aru ta te bidexi hisebe thakise, ginti te olop thakise, aru ta te ekta dangor, takotiya, bisi manuh laga desh hoise.” 6Kintu Misor laga manuh khan pora amikhan ke biya bebohar korise aru dukh dise aru tan kaam te amikhan ke zoborjosti lagai dise. 7Amikhan amar Pitri ke kandi kene mati se; amar Pitri pora amikhan laga mati huni se aru amikhan laga dukh, tan kaam, aru atyachar dikhise. 8Etu karne amar Pitri pora takotiya hath, lamba kora bahu, dangor bhoi, aru chihna aru asurit kaam khan pora amikhan ke Misor pora bahar ulai anise. 9Tai amikhan ke yate anise aru amikhan ke etu desh dise, gakhir aru mou boi thaka ekta desh. 10“Etiya, Apuni, amar Pitri pora moi ke diya mati laga prothom phol moi anise.” Titia eitu ke Tar age te rakhibi aru Tar age te aradhana koribi. 11Tumar Pitri pora tumi ke aru tumar ghor manuh khan ke diya sob bhal jinis khan te khushi koribi—tumi, Levi manuh, aru tumar majote thaka bidexi manuh.
12Tisra saal te, doshom bhag laga saal te, tumar phol laga pura doshom bhag ana khotom hoile, aru eitu ke Levi manuh, bidexi, anath, aru bidhowa ke dile, titia tarkhan tumar sheher khan te khai kene bhorta hobo, 13titia tumar Pitri age te kobi: Moi laga ghor pora pobitro bhag ulai dise aru Apuni moi ke hukum diya nisina Levi manuh, bidexi, anath, aru bidhowa ke dise. Moi Apuni laga hukum khan ke ulta kora nai aru pahora bhi nai. 14Moi dukh kori thaka somoite eitu pora eku khua nai, letera thaka somoite eku ulai diya nai, mora manuh ke eku diya nai. Moi moi laga Pitri laga awaj mani se; Apuni moi ke hukum diya sob moi korise. 15Sorgo te thaka Apuni laga pobitro ghor pora nichete sabi, Apuni laga manuh Israel ke aru Apuni amikhan ke diya desh ke asirbad koribi, amar baba khan ke kosom kha nisina—gakhir aru mou boi thaka ekta desh.
Pura Mon aru Atma pora Kotha Mana
16Aji tumar Pitri pora tumi ke etu niyom aru niti khan koribole hukum di ase, pura mon pora aru pura atma pora eitu khan ke rakhibi aru koribi. 17Aji tumi tumar Pitri ke tumar Pitri hobole koise—Tar rasta khan te berabole, Tar niyom, Tar hukum, aru Tar niti khan rakhibole, aru Tar kotha manibole. 18Aji tumar Pitri pora tumi ke Tar manuh, Tar daam thaka dhun, Tai tumi ke vachan diya nisina koise, aru tumi Tar sob hukum khan rakhibo lage koise, 19aru Tai bona sob desh khan pora uporte Tai tumi ke uthai dibo, stuti, naam, aru sonman nimite, aru Tai vachan diya nisina, tumi tumar Pitri nimite ekta pobitro manuh hobo.