Kalewenetap kamet ne po laitoryat
Kateunei kametap laitoryat weeriinnyi laitoryat kole igoochi divaik laitorinik komaas osotigap che kisastae, si ng'alaalji icheeget che matinyei kutit. Yeityo kaboorunetap kwony ne tinyei kimnateet ne alei imbarenik, kou melisyegap chemung'arainik, poisyei agoi kemeut, ak kelasunegei eng' kurgetap nganaseet.
31 1Ng'aleegap Laitoryat Lemuel—kalewenet ne ki koneeti kamennyi: 2Nee, weeriinnyu? Nee, weeriitap moennyu? Nee, weeriitap kaarortaosyekyuk? 3Mat igoochi kwonyiik kimnateeng'ung', anan ooreeguk icheeget che ng'emei laitorinik. 4Ma po laitorinik, Lemuel—ma po laitorinik koe divaik, anan po kiptainik komach maiyek. 5Amu ngo oe, ko mabwaat ng'atuutyet, ak komaas osotigap tugul che kisastae. 6Goochi maiyek chiito ne pwonei, ak divaik icheeget che mi nyalilda ne ng'wan. 7Ingoe ak koma bwaat rubeennywa, ak mabwaat kogeny nyalildanywa. 8Yat kuting'ung' agobo icheeget che ma tinyei kutit, agobo osotigap tugul che kibagaakta kobonondos. 9Yat kuting'ung', irwookyi eng' imanda, ak itoret osotigap pooryeet ak kibananook.
Kwony ne tinyei kimnateet
10Kwony ne tinyei kimnateet—ng'oo ne imuuchi konyoorun? Po kamanuutyet ne oo miising' ineendet kosiir koik che kiguure peninim. 11Iyani muguleldap manong'otyondennyi eng' ineendet, ak ma mararwi kiy age tugul ne po kamanuutyet. 12Yaei ineendet ne myee ak ma ne ya, eng' peetuusyek tugul che po saboondanyi. 13Cheeng'ei koroorigap keechiirek ak mabuteek, ak yaei poisyet eng' eunek che chamei. 14Kou melisyegap chemung'arainik, koibu amitwogikyik eng' ole loo. 15Ng'eetei kota ko po kemeut, kogoochi amitwogik piigap koonnyi, ak kebeberwek tiibiik che otwogikyik. 16Bwaatei mbareet ak koal; eng' logoegap eunekyik komin mbareetap sabibuk. 17Igermegei eng' kimnateet ak kogimit eunekyik. 18Naei kole chemung'arenatennyi ko mi kamanuutyet; ma leny taityennyi eng' kemeut. 19Inde eunekyik keetitap kuuryet, ak nam eunekyik chepkuuryet. 20Ing'aang'ji eunekyik pooryeet, ak kiile eunekyik kibananook. 21Ma iywei agobo piigap koonnyi ye nyoo teluji, amu kilaakyi piigap koonnyi tugul ngoroik che piriireen. 22Napchigei ngoroik che itucheei; ngoroikyik ko katanit ne myee ak ne piriiriir. 23Kingen manong'otyondennyi eng' tugatugik, ye tebee among boisiegap emet. 24Yaei ngoroigap katanit ak koalda, ak kogoochi mosibisyek chemung'arainik. 25Kimnateet ak toroorindo ko ngoroikyik, ak ng'ololoe agobo peetuusyek che nyonei. 26Yaatei kutit eng' ng'omnateet, ak mi kaneetisyet ne po iman eng' ng'elyeptanyi. 27Riibei ooreetap piigap koonnyi, ak ma amei amitwogigap kipsongolindo. 28Ng'eetyee lagokyik ak kole koberurotin; ak manong'otyondennyi kora, ak kolasei: 29“Kagoyai tiibiik che chaang' eng' kimnateet, ago isiir icheek tugul.” 30Charunee ko po ebeetyet, ak korooronindo ko po peetuusyek che matya, ago kwony ne iywei Kwandanyo—kilasei. 31Goochi ineendet logoegap eunekyik, ak ingolas poisyonikyik ineendet eng' tugatugik.