Riibet Kiy ne Ibeeti Tupchiing'ung'
Iweekyini tupcheng'ung' eitennyi ne petoti, ak amat iger sigiryennyi ne kagobut taban iung'egei. Iteech ndoget eng' koong'ung' parak. Yeityo ng'atuutyetap tuunet: murenik ne mererchini osotyonnyi, kigerchini ak ma imuuchi kooon ineendet agoi, ak kwony ne kinam eng' poroteet ne tuon, kigeere ko uu ne kagiwech eng' pireet.
22 1Amat iger eito tupcheng'ung' anan keechiiryennyi koombenoti ak iit ile kiy; kanyool iweekyini tupcheng'ung'. 2Ngot koma neegitee tupcheng'ung', anan ngo ma ingen ineendet, iip koong'ung' ak iriip agoi kosoom ineendet, yeityo iweekyini. 3Iyai ko uu nooto sigiryennyi, ak ko uu nooto ngoryennyi, ak ko uu nooto kiy age tugul ne ibeeti tupcheng'ung' ak inyooru; amat iit ile kiy. 4Amat iger sigiryetap tupcheng'ung' anan eito kagobut eng' ooreet ak iit ile kiy; kanyool itoret ing'eetyi.
5Mat kolach kwony ngoroigap muren, ak mat kolach muren ngoroigap kwony, amu age tugul ne yae tuguuchu ko wechei Kwandang'ung'.
6Ngot inyooru aaregap toriit eng' ooreet, eng' keetit age tugul anan eng' ng'wony, ne tinyei lagok anan koitap ingok, ak kotebee kamet paragutap lagok anan koitap ingok, amat inam kamet kobooto lagok. 7Kanyool iyookte kamet, ago inam lagok ineeng'ung', si komyeeit eng' inyee ak koingoi peetuusyeguk.
8Ngo iteech koot ne leel, inde ndoget eng' koot parak, si ma koip koong'ung' tengektap korotiik ngo but chii kong'eetyo.
9Amat imin mbareeng'ung' ne po sabibuk ak kesweek che terter, si ma kitabaanat tuguuk tugul, kesweek che kigol ak logoegap mbareetap sabibuk. 10Amat ibat ak eito ak sigiryet che kirate togeennyi. 11Amat ilach ngoryeet ne po koroorigap keechiirek ak katanit che kitoor togeennyi.
12Inde sawoik eng' tabanwek ang'wan che po ngoryeeng'ung' ne ilachei.
Kotoreet Arorutyetap Tunisiet
13Ngo tun chii kwony, ak ye kagoruiyo ak ineendet koweech, 14ak kocharunee ineendet tengekto, ak kogoochi kainet ne ya, kole, “Kaanam kwonyooto, ago ye kaanyoonji maanyoor paornateetap pergeinatennyi,” 15konam anyun kwandap chepto ak kamennyi koibu paornateetap pergeinatennyi koba poisyegap nganaseet eng' ormariichet. 16Koleenji kwandap chepto poisyek, “Kaagoochi cheptonyu chiini koek osotyot, ak kowechei ineendet. 17Ak nguno kocharunee ineendet tengekto, kole, ‘Maanyoor paornateetap pergeinatetap cheptong'ung'.’ Ago mi yu paornateetap pergeinatetap cheptonyu.’ Ingoyaar anyun ngoryeet eng' taitap poisyegap nganaseet.” 18Konam anyun poisyegap nganasanooto chiito ak kobir, 19ak kogandoi ineendet fedha che uu melekto ne po kenyiit, ak kogoochi kwandap chepto, amu kogoochi kainet ne ya pergeiyatap Israel. Imenye koek osotyonnyi; ma komuuch kooni agoi kosabei.
20Ago ngot ko iman ng'olyoonooto, ak maanyoorji paornateetap pergeinatetap chepto, 21koibu chepto koba kurgeetap kootap kwandanyi, ak koisee murenigap nganasennyi koony kome amu koyai sogornateet eng' Israel, kosoksoei eng' kootap kwandanyi. Iste yaityet eng' kwenung'ung'.
22Ngo nyoor chii koruiyo ak osotyotap chii age, ko nyoljin kopek aeng' tugul, chii ne ki ruiyo ak ineendet, ak kwonyooto. Iste yaityet eng' Israel. 23Ngot ko chepto, pergeiyat ne ki kebwatererchi muren, ak konyoor chii age eng' nganaseet ak koruiyo ak ineendet, 24oibu aeng' tugul koba ormariichetap nganasanooto ak oiisye koony kome: chepto, amu ma koriir eng' nganaseet; chii, amu kagong'aany osotyotap chiitap kokwennyi. Iste yaityet eng' kwenung'ung'. 25Ago ngo nyoor chii chepto ne ki kebwatererchi eng' mbar, ak konam, ak koruiyo ak ineendet, ko ineendet kityo ne me. 26Amat iyachi chepto kiy; ma tinyei tengek ne nyolu meet. Ng'olyoonooto ko uu chii ne kong'eetyi chiitap kokwennyi ak kobar: 27amu kinyoor ineendet eng' mbar; kiriir chepto ne ki kebwatererchi, ago ma mi chii ne sarei. 28Ngo nyoor chii chepto pergeiyat ne tomo kebwatererchi, ak konam, ak koruiyo ak ineendet, ak kenyoor icheek, 29kogoochi chii ne ki ruiyo ak ineendet kwandap chepto fedha che uu robeetap melekto ne po kenyiit; koek osotyonnyi amu kang'aany, ak ma komuuch kooni eng' saboondanyi tugul. 30Mat kotun chii osotyotap kwandanyi; mat kong'aany aach ngoryeetap kwandanyi.