உபாகமம் 22

22 ¹உன் சகோதரனுடைய மாடோ ஆடோ வழிதப்பிப் போவதைக் கண்டும் அசட்டைபண்ணாதே; அவைகளை உன் சகோதரனிடத்தில் நிச்சயமாய்த் திரும்பச் சேர்ப்பிக்கவேண்டும். ²உன் சகோதரன் உனக்கு அருகில் இல்லாவிட்டாலோ, அல்லது அவனை நீ அறியாதிருந்தாலோ, அதை உன் வீட்டிற்குக் கொண்டுவந்து, உன் சகோதரன் அதைத் தேடிவரும்வரைக்கும் உன்னிடத்தில் வைத்திரு; பின்பு அதை அவனிடத்தில் திரும்பக் கொடுத்துவிடு. ³அப்படியே அவனுடைய கழுதைக்கும் செய்; அப்படியே அவனுடைய வஸ்திரத்திற்கும் செய்; உன் சகோதரன் இழந்து நீ கண்டெடுக்கும் எந்தப் பொருளுக்கும் அப்படியே செய்; அதை அசட்டைபண்ணக்கூடாது. ⁴உன் சகோதரனுடைய கழுதையோ மாடோ வழியில் விழுந்துகிடப்பதைக் கண்டும் அசட்டைபண்ணாதே; அதைத் தூக்கிவிட அவனுக்கு நிச்சயமாய் உதவிசெய்யவேண்டும்.

⁵பெண் ஆண்களுடைய உடையை அணியக்கூடாது, ஆணும் பெண்ணுடைய உடையை அணியக்கூடாது; இப்படிச் செய்கிற எவனும் உங்கள் பிதாவுக்கு அருவருப்பானவன்.

⁶வழியில் ஒரு பறவையின் கூடு எந்த மரத்திலாவது தரையிலாவது காணப்பட்டு, அதில் குஞ்சுகளோ முட்டைகளோ இருந்து, தாய்ப்பறவை குஞ்சுகளின்மேலோ முட்டைகளின்மேலோ அடைகாத்திருந்தால், அந்தத் தாயைக் குஞ்சுகளோடேகூடப் பிடித்துக்கொள்ளாதே. ⁷தாயை அவசியம் விட்டுவிடு; குஞ்சுகளையோ உனக்கென்று எடுத்துக்கொள்; அப்பொழுது உனக்கு நன்மையுண்டாகி, உன் நாட்கள் நீடித்திருக்கும்.

⁸நீ ஒரு புதிய வீட்டைக் கட்டும்போது, யாராவது அதின்மேலிருந்து விழுந்து உன் வீட்டின்மேல் இரத்தப்பழி சுமராதபடிக்கு, உன் வீட்டின் மேல்தளத்திற்குச் சுற்றுச்சுவர் எழுப்பு.

⁹உன் திராட்சத்தோட்டத்தில் கலப்பான விதையை விதைக்காதே; விதைத்த விதையும் திராட்சத்தோட்டத்தின் பலனும் ஆகிய முழு விளைச்சலும் பறிமுதலாகிப்போகும். ¹⁰மாட்டையும் கழுதையையும் ஒன்றாய்ப் பூட்டி உழக்கூடாது. ¹¹ஆட்டுரோமமும் சணல்நூலும் கலந்து நெய்யப்பட்ட வஸ்திரத்தை அணியக்கூடாது.

¹²நீ போர்த்திக்கொள்ளும் மேலங்கியின் நான்கு ஓரங்களிலும் தொங்கல்களை வை.

விவாக உடன்படிக்கையைக் கனம்பண்ணுதல்

¹³ஒருவன் ஒரு பெண்ணை விவாகம்பண்ணி, அவளோடே சேர்ந்தபின்பு அவளை வெறுத்து, ¹⁴"இந்தப் பெண்ணை நான் விவாகம்பண்ணி, அவளிடத்தில் சேர்ந்தபோது அவளுடைய கன்னிமையின் அடையாளத்தை நான் காணவில்லை" என்று சொல்லி, அவள்மேல் வெட்கக்கேடான குற்றம் சாட்டி, அவளுக்கு துர்ப்பெயர் உண்டாக்கினால், ¹⁵அந்த வாலிபப் பெண்ணின் தகப்பனும் தாயும் அவளுடைய கன்னிமையின் அடையாளத்தை எடுத்து, நகர வாசலில் இருக்கிற மூப்பர்களிடத்தில் கொண்டுவரவேண்டும். ¹⁶அந்த வாலிபப் பெண்ணின் தகப்பன் மூப்பர்களை நோக்கி: "நான் என் மகளை இந்த மனுஷனுக்கு மனைவியாகக் கொடுத்தேன்; இவன் அவளை வெறுக்கிறான். ¹⁷இதோ, ‘உன் மகளிடத்தில் கன்னிமையின் அடையாளத்தை நான் காணவில்லை’ என்று சொல்லி, இவன் அவள்மேல் வெட்கக்கேடான குற்றம் சாட்டியிருக்கிறான்; ஆனாலும், என் மகளுடைய கன்னிமையின் அடையாளம் இதோ இருக்கிறது" என்று சொல்லி, நகர மூப்பர்களுக்கு முன்பாக அந்த வஸ்திரத்தை விரிக்கக்கடவர்கள். ¹⁸அப்பொழுது அந்த நகர மூப்பர்கள் அந்த மனுஷனைப் பிடித்து, அவனைத் தண்டித்து, ¹⁹அவன் இஸ்ரவேலின் ஒரு கன்னிகைக்கு துர்ப்பெயர் உண்டாக்கினபடியால், அவனிடத்தில் ஏறக்குறைய ஒரு வருஷ சம்பளத்திற்குச் சரியான வெள்ளியை அபராதமாக வாங்கி, அந்த வாலிபப் பெண்ணின் தகப்பனுக்குக் கொடுக்கக்கடவர்கள்; அவள் அவனுக்கு மனைவியாயிருக்கவேண்டும்; அவன் உயிரோடிருக்கும் நாளெல்லாம் அவளைத் தள்ளிவிடக்கூடாது.

²⁰ஆனாலும், அந்தக் குற்றச்சாட்டு உண்மையாயிருந்து, அந்த வாலிபப் பெண்ணின் கன்னிமையின் அடையாளம் காணப்படாமற்போனால், ²¹அந்த வாலிபப் பெண்ணை அவளுடைய தகப்பன் வீட்டு வாசலுக்கு முன்பாகக் கொண்டுவரவேண்டும்; அவள் தன் தகப்பன் வீட்டில் வேசித்தனம்பண்ணி, இஸ்ரவேலிலே இழிவான காரியத்தைச் செய்தபடியால், அவளுடைய நகர மனுஷர் அவளைக் கல்லெறிந்து கொல்லக்கடவர்கள். இப்படியே தீமையை உன் நடுவிலிருந்து அகற்றிப்போடு.

²²ஒருவன் மற்றொருவனுடைய மனைவியோடே சயனித்திருக்கக் கண்டுபிடிக்கப்பட்டால், அவளோடே சயனித்த மனுஷனும் அந்தப் பெண்ணும் ஆகிய இருவரும் சாகவேண்டும். இப்படியே இஸ்ரவேலிலிருந்து தீமையை அகற்றிப்போடு. ²³ஒரு புருஷனுக்கு நியமிக்கப்பட்ட கன்னிகையான ஒரு வாலிபப் பெண்ணை, வேறொருவன் நகரத்திலே கண்டு, அவளோடே சயனித்தால், ²⁴அவ்விருவரையும் அந்த நகர வாசலுக்குக் கொண்டுவந்து கல்லெறிந்து கொல்லக்கடவர்கள்; அந்த வாலிபப் பெண் நகரத்தில் இருந்தும் உதவிக்காகக் கூப்பிடாதபடியாலும், அந்த மனுஷன் தன் அயலானுடைய மனைவியைக் கற்பழித்தபடியாலும் தான். இப்படியே தீமையை உன் நடுவிலிருந்து அகற்றிப்போடு. ²⁵ஆனாலும், நியமிக்கப்பட்ட அந்த வாலிபப் பெண்ணை ஒருவன் வெளியிலே கண்டு, அவளைப் பிடித்து, அவளோடே சயனித்தால், அவன்மாத்திரம் சாகவேண்டும். ²⁶அந்த வாலிபப் பெண்ணுக்கு ஒன்றும் செய்யாதே; அவளுக்கு மரணத்திற்குரிய பாவம் இல்லை; ஒருவன் தன் அயலான்மேல் பாய்ந்து அவனைக் கொலைசெய்கிற காரியத்திற்கு இது ஒப்பாயிருக்கிறது. ²⁷ஏனெனில், அவன் அவளை வெளியிலே கண்டான்; நியமிக்கப்பட்ட அந்த வாலிபப் பெண் கூப்பிட்டும், அவளை இரட்சிப்பார் ஒருவரும் இல்லாதிருந்தது. ²⁸நியமிக்கப்படாத ஒரு கன்னிகையான வாலிபப் பெண்ணை ஒருவன் கண்டு, அவளைப் பிடித்து, அவளோடே சயனித்திருக்கையில், அவர்கள் கண்டுபிடிக்கப்பட்டால், ²⁹அவளோடே சயனித்த அந்த மனுஷன் அந்த வாலிபப் பெண்ணின் தகப்பனுக்கு ஏறக்குறைய அரை வருஷ சம்பளத்திற்குச் சரியான வெள்ளியைக் கொடுக்கவேண்டும்; அவன் அவளைக் கற்பழித்தபடியால், அவள் அவனுக்கு மனைவியாவாள்; அவன் உயிரோடிருக்கும் நாளெல்லாம் அவளைத் தள்ளிவிடக்கூடாது. ³⁰ஒருவன் தன் தகப்பனுடைய மனைவியை விவாகம்பண்ணக்கூடாது; தன் தகப்பனுடைய விவாக மஞ்சத்தைக் கனவீனப்படுத்தக்கூடாது.