Kumbukumbu la Torati 22

22 ¹Usimwone ng'ombe au kondoo wa ndugu yako akipotea njiani halafu ujifanye hukuona; hakika umrudishe kwa ndugu yako. ²Kama ndugu yako hayuko karibu, au humfahamu, uilete nyumbani kwako na uitunze mpaka atakapoiuliza, kisha umrudishie. ³Fanya vivyo hivyo kwa punda wake, vivyo hivyo kwa vazi lake, na vivyo hivyo kwa kila kitu ndugu yako akipotezacho nawe ukakikuta; huna ruhusa ya kujifanya hukuona. ⁴Usimwone punda wa ndugu yako au ng'ombe wake ameanguka njiani halafu ujifanye hukuona; hakika umsaidie kumwinua.

⁵Mwanamke asivae mavazi ya mwanamume, wala mwanamume asivae mavazi ya mwanamke, kwa maana kila afanyaye mambo haya ni chukizo kwa Baba yako.

⁶Ukikutana na kioto cha ndege njiani, katika mti wowote au juu ya ardhi, chenye makinda au mayai, na mama ameatamia makinda au mayai, usimchukue mama pamoja na makinda. ⁷Hakika umwache mama aende zake, lakini uyachukue makinda kwa ajili yako, ili upate heri na siku zako ziwe nyingi.

⁸Ujengapo nyumba mpya, weka ukingo juu ya dari yake, ili nyumba yako isije ikawa na hatia ya damu mtu akianguka kutoka humo.

⁹Usipande shamba lako la mizabibu kwa mbegu za aina mbili, ili mavuno yote—mbegu uliyoipanda na matunda ya shamba la mizabibu—yasije yakachukuliwa. ¹⁰Usilime kwa ng'ombe na punda waliofungwa nira pamoja. ¹¹Usivae nguo iliyofumwa kwa sufu na kitani pamoja.

¹²Weka vishada katika pembe nne za vazi ulivaalo.

Kuliheshimu Agano la Ndoa

¹³Mtu akioa mke, kisha baada ya kulala naye akaanza kumchukia, ¹⁴na akamshtaki kwa tabia ya aibu, akimwharibia jina, akisema, "Nilimwoa mwanamke huyu, lakini nilipomkaribia sikupata uthibitisho wa ubikira wake," ¹⁵ndipo baba na mama wa yule mwanamwali watakapochukua na kuutoa uthibitisho wa ubikira wake mbele ya wazee wa mji langoni. ¹⁶Baba wa yule mwanamwali atawaambia wazee, "Nilimtoa binti yangu kwa mtu huyu awe mke wake, naye anamchukia. ¹⁷Sasa amemshtaki kwa tabia ya aibu, akisema, 'Sikupata uthibitisho wa ubikira wa binti yako.' Lakini huu hapa uthibitisho wa ubikira wa binti yangu." Nao wataitandaza nguo mbele ya wazee wa mji. ¹⁸Ndipo wazee wa mji ule watakapomchukua mtu yule na kumrudi, ¹⁹nao watamtoza faini ya vipande vya fedha kama ujira wa mwaka mzima, na kumpa baba wa yule mwanamwali, kwa sababu amemwaribia jina bikira wa Israeli. Naye atabaki kuwa mke wake; hana ruhusa ya kumwacha siku zote za maisha yake.

²⁰Lakini kama shtaka ni la kweli, na uthibitisho wa ubikira wa yule mwanamwali haukupatikana, ²¹watamleta yule mwanamwali mlangoni pa nyumba ya baba yake, na watu wa mji wake watampiga mawe hata afe kwa kufanya jambo la aibu katika Israeli—kufanya uzinzi katika nyumba ya baba yake. Ondoa uovu kati yenu.

²²Mtu akikutwa amelala na mke wa mtu mwingine, wote wawili watakufa—mwanamume aliyelala naye, na yule mwanamke. Ondoa uovu katika Israeli. ²³Kama mwanamwali, bikira aliyeposwa na mtu, na mwanamume mwingine akamkuta mjini na kulala naye, ²⁴waleteni wote wawili langoni pa mji ule na kuwapiga mawe hata wafe: yule mwanamwali, kwa sababu hakupiga kelele za kuomba msaada mjini; na yule mwanamume, kwa sababu alimtenda dhuluma mke wa jirani yake. Ondoa uovu kati yenu. ²⁵Lakini kama mwanamume atamkuta yule mwanamwali aliyeposwa kondeni, akamshika na kulala naye, yeye peke yake ndiye atakayekufa. ²⁶Msimfanye lolote yule mwanamwali; hana dhambi inayostahili kifo. Jambo hili ni kama mtu amshambuliaye jirani yake na kumwua: ²⁷kwa maana alimkuta kondeni; yule mwanamwali aliyeposwa alipiga kelele, lakini hakuwako wa kumwokoa. ²⁸Kama mwanamume atamkuta mwanamwali bikira ambaye hajaposwa, akamshika, akalala naye, nao wakagunduliwa, ²⁹yule mwanamume aliyelala naye atampa baba wa mwanamwali vipande vya fedha kama ujira wa nusu mwaka; naye atakuwa mke wake kwa sababu alimtenda dhuluma, wala hana ruhusa ya kumwacha maisha yake yote. ³⁰Mtu asimwoe mke wa baba yake; asiliaibishe kitanda cha ndoa cha baba yake.