Konyekisyen Hanun otwogigap Daudi
Koyookto Daudi piik kobaigaigai laitoryatap Ammon ne leel agobo meetap kwandanyi, ak kaleenji otwogikyik ineendet kole piik che ki kiyookto ko che segei nganaseet. Kocher tabandap tamnokwak, ak kotil ngorinnywa agoi kubesoikwak. Konyooru Ammon lugosyegap Aram eng' melekto; koril Joab lugennyi kobooto Abisai, yeityo koboita kiit ne egu eng' Kwandanyo.
10 1Kingo pata niito, kobek laitoryatap lagogap Ammon, ak konam Hanun weeriinnyi laitornatennyi. 2Ki le Daudi, “Ayachi myeeindo Hanun weeriitap Nahas, ko uu ye ki koyachi kwandanyi myeeindo anee.” Ki iyookto anyun otwogik kobaigaigai ineendet agobo meetap kwandanyi. Ago kingo it otwogigap Daudi emetap lagogap Ammon, 3ki leenji otwogigap lagogap Ammon Hanun kiptaiyandennywa, “Tos iboiboi eng' muguleldang'ung' ile teechei Daudi kwandang'ung' ye kaiyookwun piik kobaigaigain? Tos ma kaiyookwun Daudi otwogikyik si kosegei nganaseet, ak kouny, ak kong'em?”
4Ki nam Hanun otwogigap Daudi, ak kocher tabandap tamnetap chii age tugul, ak kotil ngorinnywa agoi kubesoikwak, ak kiisto icheek. 5Kingo kemwachi Daudi, koyookto piik kometen icheek, amu ki koliilandos pichooto miising'. Ki le laitoryat, “Otebi Jeriko kot koit opiityo tamnokwak, yeityo oweege.”
6Kingo keer lagogap Ammon kole ki koek che kiwechei Daudi, koyookto ak konyooru melekto piigap Syria che po Beth-rehob ak piigap Syria che po Soba, piik eliphuusyek tiptem che punei keelyek, ak laitoryatap Maaka kobooto piik eliphuut agenge, ak piigap Tob piik eliphuusyek taman ak aeng'. 7Kingo kas niito Daudi, koyookto Joab kobooto lugeet tugul ne po murenik che kiimeen. 8Ki manda lagogap Ammon ak kitet lugeet eng' kurgeetap oriit ne po nganaseet, ago ki tonone komosta age piigap Syria che po Soba ak Rehob ak piigap Tob ak Maaka eng' koronooto.
9Ki keer Joab kole kotokyigei lugeet ineendet eng' tai ak eng' let, kingo yeityo kolewen alage che po Israel che karaaran, ak kitet lugeennywa kotokyigei piigap Syria. 10Ki konde pichooto che kong'et eutap Abisai ng'eetap kamet, si kitet lugeet kotokyigei lagogap Ammon. 11Ki le Joab, “Ngot koterterwo Syria, isarwo; ago ngot koterterok lagogap Ammon, asarwok. 12Kimitu, inyiganitu agobo piikyok ak nganasoogap Kwandanyo. Ingoyai Kwandanyo kiit ne igeere ile myee.” 13Ki riikyi Joab kobooto piik che ki mi kobooto ineendet si kobargei ak piigap Syria, ak ki mwei icheek eng' tainnyi. 14Kingo keer lagogap Ammon kole ki komwei piigap Syria, komwei agine icheek eng' taitap Abisai, ak kochut nganaseet. Ki togosta anyun Joab ko mata koosup lagogap Ammon, ak kwo Jerusalem.
15Kingo keer piigap Syria kole ki iseer Israel icheek, koyumgei kogeny. 16Ki guur Hadadeser piigap Syria che po loolindap aineet; ki pwa Helam, kobooto Shobach, kiptaiyatap lugeetap Hadadeser, komi icheek kondoe. 17Kingo kas Daudi, koyumji Israel tugul, ak kolanda Jordan, ak koit Helam. Kitet lugeet piigap Syria kotokyigei Daudi, ak kobargei ak ineendet. 18Ago ki mwei piigap Syria eng' taitap Israel. Ki par Daudi piigap charunee pogolusyek tisap ne po Syria, ak piik che ketei paraisisyek eliphuusyek artam, ak kobar Shobach kiptaiyatap lugeennywa, ne ki kobek yooto. 19Kingo keer laitorinik tugul che ki mi eunegap Hadadeser kole ki kogobar icheek Israel, koyomiisyen ak Israel ak koot icheek. Ki iywei anyun piigap Syria kotoret lagogap Ammon kogeny.