Hanuni Wáheka Basadi ba Tavidi Tsoni
Tavidi wátuma babadidisa kyamvu wa pha wa bisi Amoni, kaasi bapfumu bandi bámuzimbula ni bambambala benina ba kitsweki. Bávuka ndefu za bawu kati-kati amana bázenga miledi tii yi ha matako. Bisi Amoni báfuta basuta ba Balami; Yowabi wákabula kibuka kyandi yi Abisayi, buna wásisa tsuka mu moku ma Tata wetu.
10 1Kunima, kyamvu wa bisi Amoni wáfwa, amana mwana wandi Hanuni wákituka kyamvu mu kifulu kyandi. 2Tavidi wuzimbudi: «Yimúsongila buweti kwena Hanuni mwana wa Nahasi, bwosu tata wandi kásongila buweti kwena meni.» Amana wátuma basadi mu kumbadidisa kikuma kya lufwa lwa tata wandi. Kaasi buna basadi ba Tavidi bátula mu kinzunga kya bisi Amoni, 3Amana bapfumu ba bisi Amoni bázimbula kwena Hanuni pfumu wa bawu: «Keti, mu kyedika, wisi banza ni Tavidi wisi zitisa tata waku bwosu kakutumina bayakala mu kukubadidisa? Keti Tavidi kátuma basadi bandi kwena ngeyi mu kuzaya mbanza, mu kutala mu kitsweki amana mu kutotisa?»
4Hanuni wákwata basadi ba Tavidi, wávuka kati-kati dya ndefu ya kosu mutu, wázenga miledi mya bawu tii yi ha matako, amana wábatinisina. 5Buna bázimbula kwena Tavidi, wátuma bambambala mu kubatundakana, mukuma bayakala bina báyuka tsoni za lawu. Kyamvu wuzimbudi: «Kalenu mu Yediko tii yi kuna ndefu za benu zakula, buna lwavutuka.»
6Buna bisi Amoni bámona ni bakitukini nsudi ya mbi kwena Tavidi, bátuma amana bafuta Balami ba Beti-Lehobu yi Balami ba Zoba—baphumbulu ba malu mafunda makumi modi—yi kyamvu wa Maaka yi bayakala funda dimosi, amana bayakala ba Tobu, mafunda kumi na modi. 7Buna Tavidi káyuka mama, wátuma Yowabu kumosi yi kibuka kyosu kya baphumbulu ba mvita. 8Bisi Amoni bálubuka amana báyilama mu kunwana ku mwelu wa mbanza, bwosu Balami ba Zoba yi ba Lehobu yi bayakala ba Tobu yi ba Maaka bátelama kwa bawu mu nganga.
9Yowabu wámona ni mvita yakala ku thwala yandi yi ku manima mandi, buna wásola bakwawu ha kati dya bayakala ba Kiseledi ba theti amana wábayilamisa mu kunwana yi Balami. 10Batu bahika wábatula ku kiyeka kya phangi wandi Abisayi, ndangu bayilama mu kunwana yi bisi Amoni. 11Yowabu wuzimbudi: «Yuka ni Balami banungini meni, buna umphulula; yuka ni bisi Amoni bakunungini ngeyi, buna yikakuphúlula. 12Kalenu ngolu, tukalenu batu ba kikesa kikuma kya batu betu yi kikuma kya mbanza za Tata wetu. Yambula Tata wetu kasala mana masi monika mamboti kwena yandi.» 13Amana Yowabu yi baphumbulu bana bakala yi yandi báfinama mu kunwana yi Balami, amana bawu bátina ku thwala yandi. 14Buna bisi Amoni bámona ni Balami bátina, bawu phi bátina ku thwala Abisayi amana bákota mu mbanza. Buna Yowabu wáyombuka kwena bisi Amoni amana wísa ku Yelusalemi.
15Buna Balami bámona ni bana ba Kiseledi bábanunga, bákutakana mbala yikwawu. 16Hadadezeli wátedisa Balami bana bakala ku sambwa dikwawu dya nzadi Efalata; bísa ku Hela, kumosi yi Shobaki, pfumu wa kibuka kya baphumbulu ba Hadadezeli, wuna wakala kubanatina. 17Buna Tavidi káyuka mama, wákutakanisa bana ba Kiseledi boosu, wásabuka nzadi Yolutani amana wátula ku Hela. Balami báyilama mu kunwana yi Tavidi amana bánwana yi yandi. 18Kaasi Balami bátina ku thwala bana ba Kiseledi. Tavidi wáhonda bakwa makalu ma mvita khama tsambwadi yi bakwa baphunda mafunda makumi ya, amana wábeta Shobaki pfumu wa kibuka kya baphumbulu ba bawu, wuna wáfwa kwakuna. 19Buna bakyamvu boosu bana bakala ku kiyeka kya Hadadezeli bámona ni bana ba Kiseledi bábanunga, báhanga ngemba yi bana ba Kiseledi amana bábasadila. Buna Balami báyuka bweya mu kusadisa hika bisi Amoni.
