ହାନୂନ ଦାଉଦଙ୍କ ଦାସମାନଙ୍କୁ ଅପମାନିତ କଲା

ଦାଉଦ ଅମ୍ମୋନର ନୂତନ ରାଜାଙ୍କ ନିକଟକୁ ସମବେଦନା ପଠାନ୍ତି, ଯାହାର ପରାମର୍ଶଦାତାମାନେ ତାହାକୁ ବିଶ୍ୱାସ କରାନ୍ତି ଯେ ଦୂତମାନେ ଗୁପ୍ତଚର। ସେମାନଙ୍କ ଦାଢ଼ି ଅଧା କାଟି ଦିଆଯାଏ ଓ ବସ୍ତ୍ର କଟିଦେଶ ପର୍ଯ୍ୟନ୍ତ କାଟି ଦିଆଯାଏ। ଅମ୍ମୋନ ଅରାମୀୟ ସୈନ୍ୟଦଳଙ୍କୁ ଭଡ଼ାରେ ଆଣେ; ଯୋୟାବ ଅବୀଶୟଙ୍କ ସହିତ ନିଜ ସୈନ୍ୟ ଭାଗ କରନ୍ତି, ତାପରେ ପରିଣାମ ଆମ୍ଭମାନଙ୍କ ପିତାଙ୍କ ଉପରେ ଛାଡ଼ି ଦିଅନ୍ତି।

ଅଧ୍ୟାୟ 10।

ଏହା ପରେ ଅମ୍ମୋନ-ସନ୍ତାନମାନଙ୍କ ରାଜା ମଲା, ଆଉ ତାହାର ପୁତ୍ର ହାନୂନ ତାହାର ପଦରେ ରାଜା ହେଲା। ଦାଉଦ କହିଲେ, “ନାହଶର ପୁତ୍ର ହାନୂନର ପିତା ଯେପରି ମୋ ପ୍ରତି ଦୟା ଦେଖାଇଥିଲା, ସେହିପରି ମୁଁ ତାହା ପ୍ରତି ଦୟା ଦେଖାଇବି।” ତେଣୁ ଦାଉଦ ତାହାର ପିତାର ମୃତ୍ୟୁ ବିଷୟରେ ତାହାକୁ ସାନ୍ତ୍ଵନା ଦେବା ନିମନ୍ତେ ଆପଣା ଦାସମାନଙ୍କୁ ପଠାଇଲେ। କିନ୍ତୁ ଦାଉଦଙ୍କ ଦାସମାନେ ଅମ୍ମୋନ-ସନ୍ତାନମାନଙ୍କ ଦେଶରେ ଉପସ୍ଥିତ ହୁଅନ୍ତେ, ଅମ୍ମୋନ-ସନ୍ତାନମାନଙ୍କ ସେନାପତିମାନେ ଆପଣାମାନଙ୍କ ପ୍ରଭୁ ହାନୂନକୁ କହିଲେ, “ଦାଉଦ ତୁମ୍ଭ ନିକଟକୁ ସାନ୍ତ୍ଵନାକାରୀମାନଙ୍କୁ ପଠାଇବା ଦ୍ଵାରା ସେ ତୁମ୍ଭ ପିତାକୁ ସମାଦର କରୁଅଛି ବୋଲି କʼଣ ତୁମ୍ଭେ ବାସ୍ତବରେ ମନେ କରୁଅଛ? ନଗର ଅନୁସନ୍ଧାନ କରିବାକୁ, ତାହା ଅନୁଚର କରିବାକୁ ଓ ତାହା ଉଚ୍ଛିନ୍ନ କରିବାକୁ ହିଁ ଦାଉଦ ତୁମ୍ଭ ନିକଟକୁ ଆପଣା ଦାସମାନଙ୍କୁ ପଠାଇ ନାହିଁ କି?”

ତହିଁରେ ହାନୂନ ଦାଉଦଙ୍କ ଦାସମାନଙ୍କୁ ଧରି ପ୍ରତ୍ୟେକର ଅର୍ଦ୍ଧ ଦାଢ଼ି କ୍ଷୌର କରି ସେମାନଙ୍କ ବସ୍ତ୍ର ନିତମ୍ବ ପର୍ଯ୍ୟନ୍ତ ମଧ୍ୟରୁ କାଟି ସେମାନଙ୍କୁ ବିଦାୟ କଲା। ପୁଣି ଦାଉଦଙ୍କୁ ଜଣାଯା‍ଉ, ସେ ସେମାନଙ୍କୁ ଭେଟିବା ପାଇଁ ଦୂତ ପଠାଇଲେ, କାରଣ ସେହି ଲୋକମାନେ ଅତ୍ୟନ୍ତ ଲଜ୍ଜିତ ହୋଇଥିଲେ। ରାଜା କହିଲେ, “ତୁମ୍ଭମାନଙ୍କ ଦାଢ଼ି ପୁନର୍ବାର ନ ବଢ଼ିବା ପର୍ଯ୍ୟନ୍ତ ଯିରୀହୋରେ ରୁହ, ତହିଁ ଉତ୍ତାରେ ଫେରିଆସ।”

ଆପଣାମାନେ ଦାଉଦଙ୍କ ନିକଟରେ ଦୁର୍ଗନ୍ଧସ୍ଵରୂପ ହୋଇଅଛନ୍ତି, ଏହା ଅମ୍ମୋନ-ସନ୍ତାନମାନେ ଦେଖି ଲୋକ ପଠାଇ ବେଥ୍-ରହୋବର ଅରାମୀୟମାନଙ୍କୁ ଓ ସୋବାର ଅରାମୀୟମାନଙ୍କୁ, ଅର୍ଥାତ୍‍ କୋଡ଼ିଏ ହଜାର ପଦାତିକ, ପୁଣି ଏକ ହଜାର ଲୋକ ସହିତ ମାଖାର ରାଜାକୁ ଓ ବାର ହଜାର ଲୋକ ସହିତ ଟୋବର ଲୋକମାନଙ୍କୁ ବେତନ ଦେଇ ରଖିଲେ। ଦାଉଦ ଏହା ଶୁଣି ଯୋୟାବକୁ ଓ ବୀର ଯୋଦ୍ଧାମାନଙ୍କ ସମଗ୍ର ସୈନ୍ୟଦଳକୁ ପଠାଇଲେ। ତହିଁରେ ଅମ୍ମୋନ-ସନ୍ତାନମାନେ ବାହାରି ନଗର-ଦ୍ଵାର ପ୍ରବେଶ ସ୍ଥାନରେ ସୈନ୍ୟ ସଜାଇଲେ, ମାତ୍ର ସୋବା ଓ ରହୋବର ଅରାମୀୟମାନେ ଆଉ ଟୋବ ଓ ମାଖାର ଲୋକମାନେ ପୃଥକ୍‍ ଭାବରେ ଖୋଲା ପଦାରେ ଠିଆ ହେଲେ।

ଯୋୟାବ ଦେଖିଲା ଯେ, ତାହାର ଆଗରେ ଓ ପଛରେ ଉଭୟ ଦିଗରେ ସୈନ୍ୟଶ୍ରେଣୀ ସଜ୍ଜିତ ଅଛି, ତେଣୁ ସେ ଇସ୍ରାଏଲର ମନୋନୀତ ଲୋକମାନଙ୍କ ମଧ୍ୟରୁ କେତେକଙ୍କୁ ବାଛି ଅରାମୀୟମାନଙ୍କ ବିରୁଦ୍ଧରେ ସଜାଇଲା। ପୁଣି ଅବଶିଷ୍ଟ ଲୋକମାନଙ୍କୁ ସେ ଆପଣା ଭ୍ରାତା ଅବୀଶୟର ହସ୍ତରେ ସମର୍ପଣ କଲା, ଯେପରି ସେ ଅମ୍ମୋନ-ସନ୍ତାନମାନଙ୍କ ବିରୁଦ୍ଧରେ ସୈନ୍ୟ ସଜାଇବ। ପୁଣି ଯୋୟାବ କହିଲା, “ଯଦି ଅରାମ ମୋʼ ଅପେକ୍ଷା ପ୍ରବଳ ହୁଏ, ତେବେ ତୁମ୍ଭେ ମୋତେ ଉଦ୍ଧାର କରିବ; ଆଉ ଯଦି ଅମ୍ମୋନ-ସନ୍ତାନମାନେ ତୁମ୍ଭ ଅପେକ୍ଷା ପ୍ରବଳ ହୁଅନ୍ତି, ତେବେ ମୁଁ ତୁମ୍ଭକୁ ଉଦ୍ଧାର କରିବି। ବଳବାନ ହୁଅ, ଆସ, ଆପଣା ଲୋକମାନଙ୍କ ନିମନ୍ତେ ଓ ଆମ୍ଭମାନଙ୍କ ପିତାଙ୍କ ନଗରସମୂହ ନିମନ୍ତେ ଆମ୍ଭେମାନେ ସାହସୀ ହେବା। ଆମ୍ଭମାନଙ୍କ ପିତା ଆପଣା ଦୃଷ୍ଟିରେ ଯାହା ଭଲ, ତାହା କରନ୍ତୁ।” ଏଥିଉତ୍ତାରେ ଯୋୟାବ ଓ ତାହା ସଙ୍ଗେ ଥିବା ସୈନ୍ୟମାନେ ଅରାମୀୟମାନଙ୍କ ବିରୁଦ୍ଧରେ ଯୁଦ୍ଧ କରିବାକୁ ଅଗ୍ରସର ହେଲେ, ତହିଁରେ ସେମାନେ ତାହା ସମ୍ମୁଖରୁ ପଳାଇଲେ। ପୁଣି ଅମ୍ମୋନ-ସନ୍ତାନମାନେ ଅରାମୀୟମାନଙ୍କ ପଳାୟନ ଦେଖି ଆପେମାନେ ମଧ୍ୟ ଅବୀଶୟ ସମ୍ମୁଖରୁ ପଳାଇ ନଗରରେ ପ୍ରବେଶ କଲେ। ତହିଁରେ ଯୋୟାବ ଅମ୍ମୋନ-ସନ୍ତାନମାନଙ୍କଠାରୁ ଫେରି ଯିରୂଶାଲମକୁ ଆସିଲା।

ପୁଣି ଆପଣାମାନେ ଇସ୍ରାଏଲ ସମ୍ମୁଖରେ ପରାସ୍ତ ହୋଇଅଛନ୍ତି, ଏହା ଦେଖି ଅରାମୀୟମାନେ ପୁନର୍ବାର ଏକତ୍ର ହେଲେ। ହଦଦେଷର ଲୋକ ପଠାଇ ଫରାତ୍‍ ନଦୀର ସେପାରିସ୍ଥିତ ଅରାମୀୟମାନଙ୍କୁ ଆଣିଲା; ତହିଁରେ ସେମାନେ ହେଲମକୁ ଆସିଲେ, ଆଉ ହଦଦେଷରର ସେନାପତି ଶୋବକ ସେମାନଙ୍କର ଆଗୁଆ ହୋଇ ଗଲା। ଦାଉଦ ଏହା ଶୁଣି ସମଗ୍ର ଇସ୍ରାଏଲକୁ ଏକତ୍ର କରି ଯର୍ଦ୍ଦନ ପାର ହୋଇ ହେଲମରେ ଉପସ୍ଥିତ ହେଲେ। ତହିଁରେ ଅରାମୀୟମାନେ ଦାଉଦଙ୍କ ବିରୁଦ୍ଧରେ ସୈନ୍ୟ ସଜାଇ ତାହାଙ୍କ ସଙ୍ଗେ ଯୁଦ୍ଧ କଲେ। ମାତ୍ର ଅରାମୀୟମାନେ ଇସ୍ରାଏଲ ସମ୍ମୁଖରୁ ପଳାଇଲେ; ଆଉ ଦାଉଦ ଅରାମୀୟମାନଙ୍କର ସାତ ଶହ ରଥାରୋହୀ ଓ ଚାଳିଶ ହଜାର ଅଶ୍ଵାରୋହୀକୁ ବଧ କଲେ, ପୁଣି ସେମାନଙ୍କ ସେନାପତି ଶୋବକକୁ ଆଘାତ କଲେ, ତହିଁରେ ସେ ସେଠାରେ ମଲା। ପୁଣି ଆପଣାମାନେ ଇସ୍ରାଏଲ ସମ୍ମୁଖରେ ପରାସ୍ତ ହୋଇଅଛନ୍ତି, ଏହା ହଦଦେଷରର ସମସ୍ତ କରଦ ରାଜାମାନେ ଦେଖି ଇସ୍ରାଏଲ ସହିତ ସନ୍ଧି କରି ସେମାନଙ୍କର ଦାସ ହେଲେ। ତେଣୁ ଅରାମୀୟମାନେ ଅମ୍ମୋନ-ସନ୍ତାନମାନଙ୍କୁ ପୁନର୍ବାର ସାହାଯ୍ୟ କରିବାକୁ ଭୟ କଲେ।