Hanuni atuka abasavyi ba Dawidi

Dawidi arungikira umwami musha w'Abamoni intumwa zo kumwihanganisha, mugabo abajanama biwe bamwemeza ko izo ntumwa ari abatasi. Baziyogosha igice c'ubwanwa, n'impuzu zabo bazicira ku matako. Abamoni bakodesha ingabo z'Abaramu; Yowabu agabanya ingabo ziwe na Abishayi, hanyuma iherezo arisigira Data.

Igice 10.

Mu nyuma, umwami w’Abamoni arapfa, maze umuhungu wiwe Hanuni amusubirira ku ngoma. Dawidi aravuga ati: “Nzogirira neza Hanuni mwene Nahashi, nk’uko se yangiriye neza.” Nuko arungika abasavyi kugira ngo bamuhoze ku rupfu rwa se. Ariko abasavyi ba Dawidi bashitse mu gihugu c’Abamoni, abakuru b’Abamoni babwira Hanuni shebuja, bati: “Mbega wibaza vy’ukuri ko Dawidi ashima so, ni co gituma akurungikiye abantu bo kukuhoza? Mbega Dawidi ntakurungikiye abasavyi biwe kugira ngo batohoze igisagara, bagicatse, maze bakigwanye?”

Hanuni afata abasavyi ba Dawidi, amwa umwe wese ubwanwa bw’uruhande rumwe, abaca impuzu mu kiyago, maze abasezerera. Dawidi abimenyeshejwe, arungika intumwa kubasanganira, kuko abo bantu bari bamaramaye cane. Umwami avuga ati: “Mugume i Yeriko gushika ubwanwa bwanyu bumeze, maze muze mugaruke.”

Abamoni babonye ko bagizwe ikinuka na Dawidi, barungika bagura Abanyasiriya bo i Beti-Rehobu n’Abanyasiriya bo i Soba, abasirikare b’amaguru ibihumbi mirongo ibiri, n’umwami wa Maaka n’abantu igihumbi, n’abantu bo i Tobu bangana ibihumbi cumi na bibiri. Dawidi avyumvise, arungika Yowabu n’ingabo zose z’abasirikare b’intwari. Abamoni baza basohoka maze batondeka ingabo ku muryango w’igisagara, mu gihe Abanyasiriya bo i Soba n’i Rehobu n’abantu bo i Tobu n’i Maaka bahagaze ukwabo mu gahinga.

Yowabu abonye ko ingabo zimushikiye imbere n’inyuma, atora bamwe mu bahizi ba Isiraheli, maze abatondekeza Abanyasiriya. Abasigaye abashinga mukuru wiwe Abishayi, kugira ngo batondekere Abamoni. Yowabu aravuga ati: “Nimba Abanyasiriya bandushije inkomezi, uze unyokore; nimba Abamoni bakurushije inkomezi, nanje nzokwokora. Komera, tube abanyamutima ku bw’abantu bacu no ku bw’ibisagara vya Data wa twese. Data wa twese akore ico abona ko ari ciza.” Nuko Yowabu n’abantu bari kumwe nawe biyegereza kurwanya Abanyasiriya, maze barahunga imbere yiwe. Abamoni babonye ko Abanyasiriya bahunze, na bo barahunga imbere ya Abishayi, maze binjira mu gisagara. Nuko Yowabu ava ku Bamoni, aza i Yeruzalemu.

Abanyasiriya babonye ko batsinzwe na Isiraheli, barisubiramwo. Hadadezeri atumako Abanyasiriya bari hakurya ya Efurate; baza i Helamu, Shobaki umukuru w’ingabo za Hadadezeri abarongoye. Dawidi abimenyeshejwe, akoranya Isiraheli yose, aca Yorodani, maze ashika i Helamu. Abanyasiriya batondekera Dawidi, maze baramurwanya. Ariko Abanyasiriya barahunga imbere ya Isiraheli. Dawidi yica abagendesha amakarwa amajana indwi n’abagendera ku mafarasi ibihumbi mirongo ine, maze atsinda Shobaki umukuru w’ingabo zabo, aho nyene arapfira. Abami bose bari bagamburukira Hadadezeri babonye ko batsinzwe na Isiraheli, bagiranira amahoro na Isiraheli, maze barabakorera. Nuko Abanyasiriya batinya gusubira gufasha Abamoni.