Hanunei Dawideibü sambü shuong himou kukei
Dawidei Ammonbü lubü Choba to onou ngüh hautikei, lausikei haoeibü leiyeibü shuongei sambü shuong kho kao shuchühbü ki dogo hao la maikukei. Haoeneibü kaoshang jamde shavekei hoba neisimei shenjang ka wapan apbei. Ammonbüei Aram sepai tan lekei; Joabei haoeibü sepai Abishai yoa janletkei, kheijinei ai ongkei kho seneibü Bou la apbei.
10 1Latetche Ammon mütshuongbü Choba haikei, hoba hao jeila haoeibü shou Hanunei Choba yeikei. 2Dawidei laukei, “Haoeibü bouei kü to sanou lenbü tegü, Nahasheibü shou Hanun to ngei sanou lenenlabü.” Kheijinei haoei hao boueibü haibü shanga hao lolo hakso kula sambü shuong hautikei. Lausikei ladang Dawideibü sambü shuong Ammonbü kaodak to loukei, 3Ammonbü leiyeibü shuongei haoeneibü bunyu Hanun to laukei, “No lolo hakso kula Dawidei no jungto müt shuong hautibü, haoei kaibü bou to soumo kuda dogo nyi tükde damda lo? Sangnyu shuchühla, kho pheila hoba kho mautila shanga Dawidei haoeibü sambü shuong no jungto ahautiku lo?”
4Hanunei Dawideibü sambü shuong lapbei, hoba mütpem wekoeibü sembung jamde shuan apbei, hoba haoeneibü neisimei shenjang ka wapan apbei, hoba haoen sattikei. 5Ladang kho Dawid la ngetikei, haoei haoen haüyola müt shuong hautikei, aishanga müt shuong aeibou himouko kikei. Chobaei laukei, “Kaneibü sembung nyibou yemla khangbü shongko Jerikhoa kiteiashi, hoba phaia sepeiashi.”
6Ladang Ammonbüei haoen Dawid to mangsenyobü yeikei dogo chühkei, haoenei künan Beth-rehob ka Siriabü shuong hoba Zoba ka Siriabü shuong, youeibü sepai hajar saoto, hoba Maaka Choba müt hajar che yoa, hoba Tob ka müt hajar anthüknyi yoa jekthetkei. 7Ladang Dawidei kho ditkei, haoei wapyobü müt pendou hoba lakjaibü tan pendou yoa Joab hautikei. 8Ammonbüei longan sangnyu bakhün koukhüna wapyo lothetko lokei, lausikei Zoba hoba Rehob ka Siriabü shuong, hoba Tob hoba Maaka ka müt shuong seka lulu lokei.
9Joabei lason thedang hoba phai aenei hao khulimbo kibü hapbei, kheijinei haoei Israelbü pienbü atei pienkei, hoba Siriabü khulimbo lin küman phokei. 10Ammonbü khulimbo lin küman shanga, haoei joubü müt shuong haoeibü na Abishaieibü ik phanga phokei. 11Joabei laukei, “Siriabüei ngo thükalonga, nyi ngo khümenashi; lausikei Ammonbüei no thükalonga, ngei no khümenlabü. 12Seneibü mütshuong hoba seneibü Bou sangnyu shuong shanga, hau kiashi, hoba sen maang kaangko. Seneibü Bouei haoeibü thea ai maibou dogo chühenda kho kümshima.” 13Kheijinei Joab hoba hao yoa kibü mütshuong Siriabü to wapyola nyangko loukei, hoba haoen hao thedanga satkei. 14Ladang Ammonbüei Siriabü satkei kho hapbei, haoen kei Abishai thedanga satkei hoba sangnyu to atkei. Kheijinei Joab Ammonbü ka sepeian Jerusalem to loukei.
15Ladang Siriabüei haoen Israelbü thedanga lintikei kho hapbei, haoen nyibou leishaikei. 16Hadadezerei Eufrates danjung kibü Siriabü shuong ngakei; haoen Helam to loukei, hoba Hadadezereibü lakjaibü tan leiyeibü Shobakei haoen shaangbei. 17Ladang Dawidei kho ditkei, haoei Israelbü pendou yoshaitikei, hoba Jordan danko louan Helam to loukei. Siriabüei Dawid khulimbo lin küman kikei hoba hao to wapyokei. 18Lausikei Siriabü Israel thedang ka satkei. Dawidei haoeneibü kailong sepai saongao nyet hoba koli sepai hajar saonyi haitikei, hoba haoeneibü sepai tan leiyeibou Shobak to ngümbei hoba hao khünei haikei. 19Ladang Hadadezereibü khangenbü Choba shuong pendouei Israelei haoen thükkei dogo hapbei, haoenei Israel to sangmai kümbei hoba haoen khangenkei. Kheijinei Siriabü Ammonbü to nyibou thuila hatkei.
