2 சாமுவேல் 10

10 ¹பின்பு, அம்மோனியரின் ராஜா மரித்துப்போனான்; அவனுடைய மகனாகிய ஆனூன் அவனுக்குப் பதிலாக ராஜாவானான். ²தாவீது, “நாகாசின் மகனாகிய ஆனூனுடைய தகப்பன் எனக்குத் தயவு காட்டியதுபோல, நானும் அவனுக்குத் தயவு காட்டுவேன்” என்றான். அப்படியே அவனுடைய தகப்பனின் மரணத்தைக்குறித்து அவனுக்கு ஆறுதல் சொல்ல, தாவீது தன் ஊழியக்காரரை அனுப்பினான். ஆனால் தாவீதின் ஊழியக்காரர் அம்மோனியரின் தேசத்தை அடைந்தபோது, ³அம்மோனியரின் தலைவர்கள் தங்கள் ஆண்டவனாகிய ஆனூனை நோக்கி, “தாவீது உமக்கு ஆறுதல் சொல்ல மனிதரை அனுப்பியது, உம்முடைய தகப்பனைக் கனப்படுத்தும்பொருட்டு என்று மெய்யாகவே நினைக்கிறீரோ? இந்த நகரத்தைச் சோதித்து, உளவு பார்த்து, அதைக் கவிழ்த்துப்போடும்படிக்கு அல்லவோ தாவீது தன் ஊழியக்காரரை உம்மிடத்தில் அனுப்பியிருக்கிறான்?” என்றார்கள்.

⁴அப்பொழுது ஆனூன் தாவீதின் ஊழியக்காரரைப் பிடித்து, அவர்கள் ஒவ்வொருவருடைய தாடியிலும் பாதியைச் சிரைத்து, அவர்களுடைய வஸ்திரங்களை இடுப்பளவாய் அறுத்துப்போட்டு, அவர்களை அனுப்பிவிட்டான். ⁵இது தாவீதுக்கு அறிவிக்கப்பட்டபோது, அந்த மனிதர் மிகவும் வெட்கமடைந்திருந்தபடியால், அவன் அவர்களைச் சந்திக்கத் தூதர்களை அனுப்பினான். ராஜா, “உங்கள் தாடிகள் மறுபடியும் வளரும்வரைக்கும் எரிகோவிலே தங்கியிருந்து, பின்பு திரும்பி வாருங்கள்” என்று சொல்லச்சொன்னான்.

⁶தாங்கள் தாவீதுக்கு அருவருப்பாய்ப் போனதை அம்மோனியர் கண்டபோது, அவர்கள் ஆட்களை அனுப்பி, பெத்ரேகோபின் சீரியரையும் சோபாவின் சீரியரையும் இருபதாயிரம் காலாட்களாகவும், மாகாவின் ராஜாவை ஆயிரம் பேருடனும், தோப் தேசத்து மனிதரைப் பன்னீராயிரம் பேருடனும் கூலிக்கு அமர்த்திக்கொண்டார்கள். ⁷தாவீது இதைக் கேள்விப்பட்டபோது, யுத்தவீரரின் முழுச் சேனையோடும் யோவாபை அனுப்பினான். ⁸அம்மோனியர் புறப்பட்டு வந்து, நகர வாசலின் நுழைவிடத்தில் அணிவகுத்து நின்றார்கள்; சோபா, ரேகோப் என்பவைகளின் சீரியரும், தோப், மாகா என்பவைகளின் மனிதரும் வெளியிலே தனியாக நின்றார்கள்.

⁹யுத்தத்தின் அணிவகுப்புத் தனக்கு முன்பக்கத்திலும் பின்பக்கத்திலும் இருக்கிறதை யோவாப் கண்டு, இஸ்ரவேலிலே தெரிந்துகொள்ளப்பட்ட சிலரைத் தெரிந்தெடுத்து, அவர்களைச் சீரியருக்கு எதிராக அணிவகுத்து நிறுத்தினான். ¹⁰மற்றவர்களை அம்மோனியருக்கு எதிராக அணிவகுத்து நிறுத்தும்படி, தன் சகோதரனாகிய அபிசாயின் கையின்கீழ் ஒப்படைத்தான். ¹¹யோவாப், “சீரியர் என்னை மேற்கொண்டால், நீ எனக்கு உதவி செய்; அம்மோனியர் உன்னை மேற்கொண்டால், நான் உனக்கு உதவி செய்வேன். ¹²திடன்கொள், நம்முடைய ஜனத்துக்காகவும் நம்முடைய பிதாவின் நகரங்களுக்காகவும் தைரியமாயிருப்போம். எங்கள் பிதா தமது பார்வைக்கு நலமானதைச் செய்வாராக” என்றான். ¹³பின்பு யோவாபும் அவனோடிருந்த ஜனங்களும் சீரியரோடு யுத்தம்பண்ண நெருங்கினார்கள்; அவர்கள் அவனுக்கு முன்பாக ஓடிப்போனார்கள். ¹⁴சீரியர் ஓடிப்போனதை அம்மோனியர் கண்டபோது, அவர்களும் அபிசாய்க்கு முன்பாக ஓடி, நகரத்திற்குள் புகுந்தார்கள். அப்பொழுது யோவாப் அம்மோனியரைவிட்டுத் திரும்பி, எருசலேமுக்கு வந்தான்.

¹⁵தாங்கள் இஸ்ரவேலால் முறியடிக்கப்பட்டதைச் சீரியர் கண்டபோது, அவர்கள் மறுபடியும் ஒன்றுகூடினார்கள். ¹⁶ஆதாதேசர் ஆட்களை அனுப்பி, ஐபிராத்து நதிக்கு அப்பாலிருந்த சீரியரை வரவழைத்தான்; அவர்கள் ஏலாமுக்கு வந்தார்கள்; ஆதாதேசரின் சேனாதிபதியாகிய சோபாக் அவர்களை நடத்திக்கொண்டு வந்தான். ¹⁷தாவீது இதைக் கேள்விப்பட்டபோது, இஸ்ரவேலரெல்லாரையும் கூட்டிக்கொண்டு, யோர்தானைக் கடந்து, ஏலாமுக்கு வந்தான். சீரியர் தாவீதுக்கு எதிராக அணிவகுத்து, அவனோடு யுத்தம்பண்ணினார்கள். ¹⁸ஆனால் சீரியர் இஸ்ரவேலருக்கு முன்பாக ஓடிப்போனார்கள். தாவீது சீரியரின் ரதவீரரில் எழுநூறுபேரையும், குதிரைவீரரில் நாற்பதாயிரம் பேரையும் கொன்று, அவர்களுடைய சேனாதிபதியாகிய சோபாக்கையும் வெட்டினான்; அவன் அங்கே மரித்தான். ¹⁹ஆதாதேசருக்குக் கீழ்ப்பட்டிருந்த ராஜாக்களெல்லாரும் தாங்கள் இஸ்ரவேலரால் தோற்கடிக்கப்பட்டதைக் கண்டபோது, இஸ்ரவேலரோடு சமாதானம்பண்ணி, அவர்களைச் சேவித்தார்கள். அப்படியே சீரியர் இனி அம்மோனியருக்கு உதவிசெய்யப் பயந்தார்கள்.