Hanunna Davidwui Raobingli Maishi Ngasakmi
Davidna Ammon-wui varo katharli ngaronga kaphāo, kha awui khangāl mithumna vangkhamayarava khaphāmi da ali ngasakhai. Athumwui khamui akha-akhai kashor, kala phi mangkai-li kakhuikhai. Ammonna Aram-wui ralungmi khuira; Joabna Abishai eina awui ralung kani sāk, kala khamathānga ithumwui Avāli kasāk.
10 1Khaleilaga Ammonnaobingwui awunga thihaowa, kala anaomayara Hanunna awui mahut thuishina. 2Davidna hānga, "Awui avāna ili lukhamashan sāhaira thāda, inala Nahashwui naomayara Hanunli lukhamashan sāra." Chieina ana awui avā thikahaiwui vang ali ninglum ngasak khavai raobing chihovai. Kha Davidwui raobingna Ammonnaobingwui ngaleili vākashung tharan, 3Ammonwui wungnaobingna athumwui khamung Hanunli hānga, "Ninglum ngasak khavai Davidna nawuili mi chihokharā hi navāli khayākashina da phaningla? Keinung chi phākhui khavai, ra̱yang khavai, kala sākhaimi khavai Davidna awui raobing nawuili chihokharā maningmala?"
4Hanunna Davidwui raobing chi tukkhuilaga, mi ava̱va̱wui morhā tangkhai simiserhaowa, kala athumwui kachon chi shaksha̱ eina tangda tāmihaida, shiunserhaowa. 5Pao chi Davidli hāng tharan, ana mi chihovāda angarok ngasaka, kaja mibing chi khayakshunhaowa. Awungana hānga, "Nathumwui morhā maphoranglakha tang Jericholi pamsālu, chieina ungnaolu."
6Ammonnaobingna Davidli yangkharing khavai ot sāhaira da theilaga, athumna chihoda Beth-rehobwui Syrianaobing eina Zobahwui Syrianaobingwui phei eina kazat raimibing thingmaga̱, Maacahwui awunga mi thingkha eina, kala Tobwui mibing mi thing tharāda khani masākhui. 7Chi kashā eina Davidna Joabli ngasoda raimi katonga chihoi. 8Ammonnaobingna raisāri shaksāriplaga keinungwui ngavei zangkhavaili ngaher eina vānganinga, kala Zobah eina Rehobwui Syrianaobing kala Tob eina Maacahwui mibing khamashā pamli pama.
9Mangāshongla khanukshongla eina rai ali rāhaira da Joabna kathei tharan, ana Israelwui khamathāthā mibing kapangkhui eina Syrianaobingli ngarar khavai sāhaowa. 10Awui mi kateibing chi ana achinā Abishaiwui pāngli horsangmilaga, Ammonnaobingli ngarar khavai ngaher ngasaka. 11Joabna hānga, "Syriawui mibingna ili singyuihaiakha, nana ili rāngachonlu; nali Ammonnaobingna singyuihaiakha, ina nali rāngachonra. 12Pingda pangda sāsa, kala ithumwui mibing eina ithumwui Avāwui keinungbingwui vang malung zangmeilu. Ithumwui Avāna awui mangāli kaphā jikahaina chi sāranu." 13Chieina Joab kala awui khangaso raimibingna Syrianaobingli ngarar khavai anganinga, kala Syrianaobing awui mangāli yāmhaowa. 14Syrianaobing yāmhaira kaji Ammonnaobingna kathei tharan, athumla Abishaiwui mangāli yāmhaida keinung chi zanghaowa. Chieina Joabna Ammonnaobingwui eina ngareithuida, Jerusalemli unguwa.
15Israelnaobingna athumli yuihaira kaji Syrianaobingna kathei tharan, athum latluida kazipkhui. 16Hadadezerna Euphrates makānda khalei Syrianaobingli hokhui; athum Helemli vai, kala Hadadezerwui raimi kathāna Shobachna athumwui mangāli ngaso. 17Chi kashā eina Davidna Israel katonga kazipkhuilaga Jordan makānda Helemli vai. Syrianaobingna Davidli ngarar khavai ngaher eina nganinga, kala ali rai ngarara. 18Kha Syrianaobing Israelwui mangāli yāmhaowa; Davidna Syriawui siguigari mi kathao shāshini, sigui katong raimi thinghangmati sāthata; kala athumwui raimi kathāna Shobachli sāthatta, ala chili thihaowa. 19Hadadezerwui otram ngatha̱kasā awungabing saikorana Israelna yuihaira da kathei eina, athumna Israelli hamsangda athumwui mi sāhaowa. Chiwui vang eina Syrianaobing Ammonnaobingli latluida ngachonmi khavai ngacheehaowa.
