Hanuni Dawid kilirtem maksü agütsü
Dawidi Ammon nunger melena chuba dang pa tebu asü asoshi sünepdaktsü o yok, saka pa tanishirtemi osangbenertem senzürtem lir ta pa bilemer. Parnok teküm tesadang mejeptok aser parnok sü teperem tsütsü leptok. Ammoni Aram temeranger teloktem aar ayu; Yoabi pei temeranger telok Abishai den ana noktaka, idangji temaitsü Tebu dang tok.
10 1Iba sülen Ammon nunger chuba asü, aser pa chir Hanun pa melena chuba. 2Dawidi ashi, “Pa tebui kü dang temeim sayuba ama, ni Nahas chir Hanun dang temeim sayutsü.” Anungji pai pa tebu asü asoshi pa sünepdaktsü asoshi pei kilirtem yok. Saka kodang Dawid kilirtem Ammon nunger lima nung aru, 3Ammon nunger tanishirtemi pei kibur Hanun dang ashi, “Dawidi na dang sünepdaktsü asoshi nisungtem ne dangi yokba ya, nai pa ne tebu dang akhüm tsübur ta atangji bilemer? Yimti ladangtsü aser senzütsü aser aji raksatsütsü asoshi Dawidi pei kilirtem ne dangi yoker masü?”
4Hanuni Dawid kilirtem apu, aser nisung shia pei teküm tesadang mejeptok, aser parnok sü teperem nung leptok, aser parnok yokadok. 5Kodang Dawid dang metetdaktsü, nisungtem kanga akseta liasü asoshi pai parnok den ajurutsü osangbenertem yok. Chubai ashi, “Nenok teküm tanaben meyitsü tashi Yeriko nung liang, idangji meyipa arung.”
6Parnok Dawid dang tsübur kümogo ta anguba nungi, Ammon nungeri osangbener yoka Beth-rehob nunger Siria nunger aser Zoba nunger Siria nunger, tetsüng temeranger meyi metsü, aser Maak chuba nisung meyi ka den, aser Tob nunger nisung meyi terana den aar ayu. 7Kodang Dawidi aji angashi, pai Yoab aser raraba temeranger telok ajak yok. 8Ammon nungeri adoka, yimti süngkhüm kikümbang nung tongbang sendanga noktak, aser Zoba aser Rehob Siria nunger, aser Tob aser Maak nisungtem moapu nung tejak noktak.
9Yoabi jakdang aser külemi pa jitepa tongbang noktak ta angu, anungji pai Israel teshimtet nisung kar shim aser Siria nunger anema tongbang sendanga noktak. 10Ammon nunger anema tongbang sendanga noktaktsü asoshi, tanüngbatem pai pa tenu Abishai ket nung yu. 11Yoabi ashi, “Siria nungeri kü dang tashi taitba lira, nai ni kümzükang; Ammon nungeri ne dang tashi taitba lira, nai na kümzüktsü. 12Tashi itang, asenok nübur aser asen Tebu yimti asoshi tasü itang. Asen Tebui pa madang tajungba aji inyakangma.” 13Idangji Yoab aser pa den aliba temeranger telok Siria nunger raratsü anasa aru, aser parnok pa nokbang nungi ajen. 14Kodang Ammon nungeri Siria nunger ajenba angu, parnoka Abishai nokbang nungi ajena yimti nung ai. Anungji Yoab Ammon nunger nungi aenshia Yirusalemi aru.
15Kodang Siria nungeri Israeli parnok akokogo ta angu, parnok tanaben atenshi. 16Hadadezeri Eufrata ayong ajanger aliba Siria nunger aja; aser Hadadezer temeranger telok tir Shobaki parnok jakdang aodang, parnok Helami aru. 17Kodang Dawidi aji angashi, pai Israel ajak sentepdaktsü, aser Yordan ajanga Helami aru. Siria nungeri Dawid anema tongbang sendanga noktak aser pa den rara. 18Saka Siria nunger Israel nokbang nungi ajen. Dawidi Siria nunger kor talungtsü nung amenertem noklang tenet, aser kor temeranger meyi lir tepset, aser parnok temeranger telok tir Shobak koka, pai yangji asü. 19Kodang Hadadezer kübok aliba chuba ajaki Israeli parnok akokogo ta angu, parnok Israel den yimjung yangluteta parnok tenzük. Anungji Siria nunger tanaben Ammon nunger yaritsü tsübu.