ሃኑን ንባሮት ዳዊት የዋርድ

ዳዊት ናብ ሓድሽ ንጉስ ደቂ ኣሞን መፅናንዒ ለኣኸ፥ መኻርቱ ግና እቶም ልኡኻት ሰለይቲ ኸም ዝኾኑ ኣእመንዎ። ፍርቂ ፅሕሞም ተላፀየ፥ ክዳውንቶም ድማ ክሳዕ ሕቘኦም ተቘርፀ። ደቂ ኣሞን ሰራዊት ሶርያውያን ዓስቡ፤ ኢዮኣብ ድማ ሰራዊቱ ምስ ኣቢሳይ ከፋፈለ፥ መወዳእታኡ ኸዓ ንኣቦና ሓደጎ።

ምዕራፍ 10።

ድሕሪዙይ ንጉስ ደቂ ኣሞን ሞተ፤ ወዱ ሃኑን ድማ ኣብ ክንድኡ ነገሰ። ዳዊት ድማ “ከምቲ ኣቦኡ ንኣይ ሰናይ ዝገበረለይ፥ ኣነ ድማ ንሃኑን ወዲ ናዖስ ሰናይ ክገብረሉ እየ” በለ። ስለዙይ ብዛዕባ ሞት ኣቦኡ ከፅናንዖ ኢሉ ባሮቱ ሰደደ። ባሮት ዳዊት ግና ናብ ምድሪ ደቂ ኣሞን ምስ በፅሑ፥ እቶም ኣሕሉቕ ደቂ ኣሞን ድማ ንጐይታኦም ሃኑን ከምዙይ በልዎ፦ “ዳዊት ሰባት ልኢኹ ዘፅናንዓካ ዘሎ፥ ንኣቦኻ ስለ ዘኽብሮ ድዩ ኢሉ ብሓቂዶ ይመስለካ? ዳዊት ነዛ ኸተማ ኽምርምራን ክስልያን ክግልብጣን ኢሉ ዲዩ ባሮቱ ናባኻ ዝሰደደ?”

ሃኑን ድማ ንባሮት ዳዊት ሒዙ፥ ናይ ነፍሲ ወከፍ ፍርቂ ፅሕሞም ላፀዮም፥ ክዳውንቶም ድማ ክሳዕ ሕቘኦም ቈሪፁ ሰደዶም። ነዙይ ንዳዊት ምስ ነገርዎ፥ እቶም ሰባት ብዙሕ ሓፊሮም ስለ ዝነበሩ፥ ክቕበልዎም ልኡኻት ሰደደ። እቲ ንጉስ ድማ “ፅሕምኩም ክሳዕ ዝበቍል ኣብ ኢያሪኮ ፅንሑ፤ ድሕሪኡ ተመለሱ” በሎም።

ደቂ ኣሞን ድማ ንዳዊት ጨና ከም ዝኾኑ ምስ ረአዩ፥ ልኢኾም ንሶርያውያን ቤት ረሖብን ንሶርያውያን ሱባን፥ ዕስራ ሽሕ ኣጋር፥ ንጉስ መዓካ ምስ ሽሕ ሰብኣይ፥ ሰብ ጦብ ድማ ምስ ዓሰርተ ኽልተ ሽሕ ሰብኣይ ዓስቡ። ዳዊት ድማ ነዙይ ምስ ሰምዐ፥ ንኢዮኣብን ንዅሉ እቲ ሰራዊት ሓያላትን ሰደደ። ደቂ ኣሞን ድማ ወፂኦም ኣብ ኣፍ ደገ እታ ኸተማ ተሰለፉ፤ ሶርያውያን ሱባን ረሖብን ሰብ ጦብን መዓካን ድማ በበይኖም ኣብ ጐልጐል ደው በሉ።

ኢዮኣብ ድማ እቲ ሰልፊ ውግእ ብቕድሚኡን ብድሕሪኡን ከም ዘሎ ምስ ረኣየ፥ ካብ ኵሎም ሕሩያት እስራኤል ሓርዩ፥ ኣብ ቅድሚ ሶርያውያን ሰለፎም። ነቶም ዝተረፉ ሰባት ድማ ኣብ ኢድ ኣቢሳይ ሓዉ ሂቡ፥ ኣብ ቅድሚ ደቂ ኣሞን ክስለፉ ገበረ። ኢዮኣብ ድማ “ሶርያውያን እንተ በርትዑኒ ኣድሕነኒ፤ ደቂ ኣሞን እንተ በርትዑኻ ድማ ኣነ ከድሕነካ እየ። ፅንዑ፥ ምእንቲ ህዝብናን ምእንቲ ከተማታት ኣቦናን ድማ ንትባዕ። ኣቦና ከዓ እቲ ፅቡቕ ኮይኑ ዝተርኣዮ ይግበር።” ሽዑ ኢዮኣብን እቶም ምስኡ ዝነበሩ ህዝብን ንሶርያውያን ክዋግኡ ቐረቡ፤ ንሳቶም ድማ ካብ ቅድሚኡ ሃደሙ። ደቂ ኣሞን ድማ ሶርያውያን ከም ዝሃደሙ ምስ ረአዩ፥ ንሳቶምውን ካብ ቅድሚ ኣቢሳይ ሃዲሞም ናብታ ኸተማ ኣተዉ። ኢዮኣብ ከዓ ኻብ ደቂ ኣሞን ተመሊሱ ናብ ኢየሩሳሌም መፀ።

ሶርያውያን ድማ ብእስራኤል ከም እተሳዕሩ ምስ ረአዩ፥ ተኣከቡ። ሃዳድዔዘር ድማ ነቶም ማዕዶ ኤፍራጥስ ዝነበሩ ሶርያውያን ፀውዖም፤ ንሳቶም ከዓ ናብ ሔላም መፁ፤ ሾባክ ሓለቓ ሰራዊት ሃዳድዔዘር ድማ መርሖም። ነዙይ ንዳዊት ምስ ነገርዎ፥ ንዅሉ እስራኤል ኣኪቡ ዮርዳኖስ ተሳጊሩ ናብ ሔላም መፀ። ሶርያውያን ድማ ኣብ ቅድሚ ዳዊት ተሰሊፎም ተዋግእዎ። ሶርያውያን ግና ካብ ቅድሚ እስራኤል ሃደሙ። ዳዊት ድማ ሾብዓተ ሚእቲ ሰረገለኛታቶምን ኣርብዓ ሽሕ ፈረሰኛታቶምን ቀተለ፤ ንሾባክ ሓለቓ ሰራዊቶም ድማ ወቒዑ ኣብኡ ሞተ። ኵሎም እቶም ኣብ ትሕቲ ሃዳድዔዘር ዝነበሩ ነገስታት ድማ ብእስራኤል ከም እተሳዕሩ ምስ ረአዩ፥ ምስ እስራኤል ዕርቂ ገይሮም ተገዝእዎ። ስለዙይ ሶርያውያን ንደቂ ኣሞን ደጊሞም ክሕግዝዎም ፈርሑ።