ଦାଉଦଙ୍କ ଦ୍ଵାରା ବତ୍‌ଶେବାଙ୍କୁ ଗ୍ରହଣ

ଯେତେବେଳେ ରାଜାମାନେ ଯୁଦ୍ଧକୁ ଯାଆନ୍ତି, ଦାଉଦ ଘରେ ରହନ୍ତି, ବତ୍‌ଶେବାଙ୍କୁ ସ୍ନାନ କରୁଥିବା ଦେଖନ୍ତି, ତାହାଙ୍କୁ ଡକାଇ ପଠାନ୍ତି, ଏବଂ ସେ ଗର୍ଭବତୀ ହୁଅନ୍ତି। ସୈନ୍ୟଦଳ ପଡ଼ିଆରେ ଛାଉଣୀ କରିଥିବା ବେଳେ ଊରିୟ ନିଜ ଘରର ସୁଖ ଗ୍ରହଣ କରିବାକୁ ମନା କରେ, ତେଣୁ ଦାଉଦ ତାହାକୁ ଲେଖି ଯୁଦ୍ଧର ଆଗଧାଡ଼ିରେ ରଖାଇ ମରାଇ ଦିଅନ୍ତି। ଏହା ଆମ୍ଭମାନଙ୍କ ପିତାଙ୍କ ଦୃଷ୍ଟିରେ ମନ୍ଦ।

ଅଧ୍ୟାୟ 11।

ବସନ୍ତକାଳ ଉପସ୍ଥିତ ହୁଅନ୍ତେ, ଯେତେବେଳେ ରାଜାମାନେ ଯୁଦ୍ଧକୁ ଯାତ୍ରା କରନ୍ତି, ସେତେବେଳେ ଦାଉଦ ଯୋୟାବ, ଆପଣା ଲୋକମାନଙ୍କୁ ଓ ସମସ୍ତ ଇସ୍ରାଏଲଙ୍କୁ ପ୍ରେରଣ କଲେ। ସେମାନେ ଅମ୍ମୋନ-ସନ୍ତାନମାନଙ୍କୁ ବିନାଶ କରି ରବ୍ବା ଅବରୋଧ କଲେ। ମାତ୍ର ଦାଉଦ ଯିରୂଶାଲମରେ ରହିଲେ। ଦିନେ ସନ୍ଧ୍ୟାବେଳେ ଦାଉଦ ଆପଣା ଶଯ୍ୟାରୁ ଉଠି ରାଜଗୃହର ଛାତ ଉପରେ ବୁଲିବାକୁ ଲାଗିଲେ। ସେଠାରୁ ସେ ଜଣେ ସ୍ତ୍ରୀଙ୍କୁ ସ୍ନାନ କରୁଥିବା ଦେଖିଲେ; ସେ ସ୍ତ୍ରୀ ଅତ୍ୟନ୍ତ ସୁନ୍ଦରୀ ଥିଲେ। ତହୁଁ ଦାଉଦ ସେହି ସ୍ତ୍ରୀଙ୍କ ବିଷୟ ବୁଝିବା ନିମନ୍ତେ ଲୋକ ପଠାଇଲେ। ଜଣେ କହିଲା, “ଏ କʼଣ ହିତ୍ତୀୟ ଊରୀୟର ଭାର୍ଯ୍ୟା, ଇଲୀୟାମ୍‌ର କନ୍ୟା ବତ୍‌ଶେବା ନୁହେଁ?”

ତେବେ ଦାଉଦ ଦୂତମାନଙ୍କୁ ପଠାଇ ତାଙ୍କୁ ଅଣାଇଲେ। ସେ ତାଙ୍କ ନିକଟକୁ ଆସନ୍ତେ, ଦାଉଦ ତାଙ୍କ ସହିତ ଶୟନ କଲେ—ସେ ଆପଣା ଅଶୁଚିତାରୁ ସେହିମାତ୍ର ଶୁଚି ହୋଇଥିଲେ—ଆଉ ସେ ଆପଣା ଗୃହକୁ ଫେରିଗଲେ। ^a ପରେ ସେହି ସ୍ତ୍ରୀ ଗର୍ଭବତୀ ହୋଇ ଦାଉଦଙ୍କ ନିକଟକୁ କହି ପଠାଇଲେ, “ମୁଁ ଗର୍ଭବତୀ ହୋଇଅଛି।”

ତେବେ ଦାଉଦ ଯୋୟାବ ନିକଟକୁ କହି ପଠାଇଲେ, “ହିତ୍ତୀୟ ଊରୀୟକୁ ମୋʼ ନିକଟକୁ ପଠାଅ।” ତହିଁରେ ଯୋୟାବ ଊରୀୟକୁ ଦାଉଦଙ୍କ ନିକଟକୁ ପଠାଇଲା। ଊରୀୟ ତାଙ୍କ ନିକଟକୁ ଆସନ୍ତେ, ଦାଉଦ ଯୋୟାବର ମଙ୍ଗଳ, ସୈନ୍ୟମାନଙ୍କ ମଙ୍ଗଳ ଓ ଯୁଦ୍ଧ କିପରି ଚାଲୁଅଛି, ତାହା ପଚାରିଲେ। ଆଉ ଦାଉଦ ଊରୀୟକୁ କହିଲେ, “ତୁମ୍ଭେ ଆପଣା ଗୃହକୁ ଯାଇ ପାଦ ପ୍ରକ୍ଷାଳନ କର।” ତହୁଁ ଊରୀୟ ରାଜଗୃହରୁ ବାହାରିଗଲା, ପୁଣି ରାଜା ତାହା ପଛେ ଉପହାର ପଠାଇଲେ। ମାତ୍ର ଊରୀୟ ଆପଣା ଗୃହକୁ ନ ଯାଇ ଆପଣା ପ୍ରଭୁଙ୍କ ସମସ୍ତ ଦାସଙ୍କ ସହିତ ରାଜଗୃହର ଦ୍ଵାର ନିକଟରେ ଶୟନ କଲା। ଊରୀୟ ଆପଣା ଗୃହକୁ ଯାଇ ନାହିଁ ବୋଲି ଦାଉଦଙ୍କୁ ଜଣାନ୍ତେ, ଦାଉଦ ଊରୀୟକୁ ପଚାରିଲେ, “ତୁମ୍ଭେ କʼଣ ଯାତ୍ରାରୁ ଆସି ନାହଁ? ତେବେ କାହିଁକି ଆପଣା ଗୃହକୁ ଗଲ ନାହିଁ?”

ତହିଁରେ ଊରୀୟ ଦାଉଦଙ୍କୁ କହିଲା, “ସିନ୍ଦୁକ, ଇସ୍ରାଏଲ ଓ ଯିହୁଦା ତମ୍ବୁରେ ବାସ କରୁଅଛନ୍ତି, ପୁଣି ମୋʼ ପ୍ରଭୁ ଯୋୟାବ ଓ ମୋʼ ପ୍ରଭୁଙ୍କ ଲୋକମାନେ ମୁକ୍ତ କ୍ଷେତ୍ରରେ ଛାଉଣି କରିଅଛନ୍ତି; ଏପରି ସମୟରେ ମୁଁ କʼଣ ଭୋଜନପାନ କରିବାକୁ ଓ ଆପଣା ଭାର୍ଯ୍ୟା ସହିତ ଶୟନ କରିବାକୁ ଆପଣା ଗୃହକୁ ଯିବି? ଆପଣଙ୍କ ଜୀବନ ଓ ଆପଣଙ୍କ ପ୍ରାଣର ଜୀବନ ସାକ୍ଷାତ୍‌ରେ ମୁଁ ଏ କର୍ମ କରିବି ନାହିଁ।”

ତେବେ ଦାଉଦ ଊରୀୟକୁ କହିଲେ, “ତୁମ୍ଭେ ଆଜି ମଧ୍ୟ ଏଠାରେ ରୁହ, କାଲି ମୁଁ ତୁମ୍ଭକୁ ପଠାଇଦେବି।” ତହୁଁ ଊରୀୟ ସେଦିନ ଓ ତହିଁ ଆରଦିନ ଯିରୂଶାଲମରେ ରହିଲା। ପୁଣି ଦାଉଦ ତାହାକୁ ନିମନ୍ତ୍ରଣ କରନ୍ତେ, ସେ ତାହାଙ୍କ ସମ୍ମୁଖରେ ଭୋଜନପାନ କଲା, ଆଉ ଦାଉଦ ତାହାକୁ ମତ୍ତ କରାଇଲେ। ମାତ୍ର ସନ୍ଧ୍ୟାବେଳେ ଊରୀୟ ଆପଣା ପ୍ରଭୁଙ୍କ ଦାସମାନଙ୍କ ସହିତ ଆପଣା ଶଯ୍ୟାରେ ଶୟନ କରିବାକୁ ବାହାରିଗଲା; ସେ ଆପଣା ଗୃହକୁ ଗଲା ନାହିଁ।

ପ୍ରଭାତରେ ଦାଉଦ ଯୋୟାବ ନିକଟକୁ ଗୋଟିଏ ପତ୍ର ଲେଖି ଊରୀୟ ହାତରେ ପଠାଇଦେଲେ। ସେ ସେହି ପତ୍ରରେ ଲେଖିଲେ, “ତୁମ୍ଭେମାନେ ଘୋର ଯୁଦ୍ଧ ହେଉଥିବା ସମ୍ମୁଖ ଭାଗରେ ଊରୀୟକୁ ରଖ, ତହୁଁ ତାହା ନିକଟରୁ ପଛକୁ ହଟିଯାଅ, ଯେପରି ସେ ଆଘାତ ପାଇ ମରିଯାଏ।”

ତହୁଁ ଯୋୟାବ ନଗର ଅବରୋଧ କରିବା ସମୟରେ, ଯେଉଁ ସ୍ଥାନରେ ବୀର ଯୋଦ୍ଧାମାନେ ଅଛନ୍ତି ବୋଲି ସେ ଜାଣିଥିଲା, ସେହି ସ୍ଥାନରେ ଊରୀୟକୁ ନିଯୁକ୍ତ କଲା। ଆଉ ନଗରର ଲୋକମାନେ ବାହାରି ଯୋୟାବ ସହିତ ଯୁଦ୍ଧ କଲେ, ତହିଁରେ ଦାଉଦଙ୍କ ଦାସମାନଙ୍କ ମଧ୍ୟରୁ କେତେକ ଜଣ ପତିତ ହେଲେ; ହିତ୍ତୀୟ ଊରୀୟ ମଧ୍ୟ ମଲା। ତେବେ ଯୋୟାବ ଲୋକ ପଠାଇ ଯୁଦ୍ଧର ସମସ୍ତ ବୃତ୍ତାନ୍ତ ଦାଉଦଙ୍କୁ ଜଣାଇଲା। ଆଉ ସେ ଦୂତକୁ ଆଜ୍ଞା ଦେଇ କହିଲା, “ତୁମ୍ଭେ ରାଜାଙ୍କୁ ଯୁଦ୍ଧର ସମସ୍ତ ବୃତ୍ତାନ୍ତ କହିବା ସମାପ୍ତ କଲା ଉତ୍ତାରେ, ଯଦି ରାଜାଙ୍କ କ୍ରୋଧ ଉତ୍‌ପନ୍ନ ହୁଏ ଓ ସେ ପଚାରନ୍ତି, ‘ତୁମ୍ଭେମାନେ କାହିଁକି ଯୁଦ୍ଧ କରିବା ନିମନ୍ତେ ନଗରର ଏତେ ନିକଟକୁ ଗଲ? ସେମାନେ ପ୍ରାଚୀର ଉପରୁ ତୀର ଫିଙ୍ଗିବେ ବୋଲି କʼଣ ତୁମ୍ଭେମାନେ ଜାଣି ନ ଥିଲ? ଯିରୁବ୍ବେଶତ୍‌ର ପୁତ୍ର ଅବୀମେଲକ୍‌କୁ କିଏ ବଧ କଲା? ଜଣେ ସ୍ତ୍ରୀ କʼଣ ପ୍ରାଚୀର ଉପରୁ ତାହା ଉପରେ ଗୋଟିଏ ଚକିର ଉପର ପଥର ପକାଇ ନ ଥିଲା, ତହିଁରେ ସେ ତେବେସରେ ମଲା? ତୁମ୍ଭେମାନେ କାହିଁକି ପ୍ରାଚୀରର ଏତେ ନିକଟକୁ ଗଲ?’—ତେବେ ତୁମ୍ଭେ କହିବ, ‘ଆପଣଙ୍କ ଦାସ ହିତ୍ତୀୟ ଊରୀୟ ମଧ୍ୟ ମରିଅଛି।’” ^b

ତେଣୁ ଦୂତ ଯାତ୍ରା କରି ଉପସ୍ଥିତ ହୋଇ, ଯୋୟାବ ତାହାକୁ ଯାହା କହିବାକୁ ପଠାଇଥିଲା, ସେହିସବୁ ଦାଉଦଙ୍କୁ ଜଣାଇଲା। ଆଉ ଦୂତ ଦାଉଦଙ୍କୁ କହିଲା, “ସେହି ଲୋକମାନେ ଆମ୍ଭମାନଙ୍କ ଅପେକ୍ଷା ପ୍ରବଳ ହୋଇ କ୍ଷେତ୍ରକୁ ଆମ୍ଭମାନଙ୍କ ବିରୁଦ୍ଧରେ ବାହାରି ଆସିଲେ, ମାତ୍ର ଆମ୍ଭେମାନେ ସେମାନଙ୍କୁ ଫିରାଇ ନଗର-ଦ୍ଵାର ପର୍ଯ୍ୟନ୍ତ ତଡ଼ିଦେଲୁ। ପୁଣି ଧନୁର୍ଦ୍ଧରମାନେ ପ୍ରାଚୀର ଉପରୁ ଆପଣଙ୍କ ଦାସମାନଙ୍କ ଉପରେ ତୀର ନିକ୍ଷେପ କଲେ, ତହିଁରେ ରାଜାଙ୍କ ଦାସମାନଙ୍କ ମଧ୍ୟରୁ କେତେକ ଜଣ ମଲେ; ଆପଣଙ୍କ ଦାସ ହିତ୍ତୀୟ ଊରୀୟ ମଧ୍ୟ ମରିଅଛି।”

ତେବେ ଦାଉଦ ଦୂତକୁ କହିଲେ, “ତୁମ୍ଭେ ଯୋୟାବକୁ କହିବ, ‘ଏ କଥା ତୁମ୍ଭ ଦୃଷ୍ଟିରେ ମନ୍ଦ ବୋଧ ନ ହେଉ, କାରଣ ଖଡ଼୍‌ଗ ଯେପରି ଜଣକୁ, ସେପରି ଅନ୍ୟ ଜଣକୁ ମଧ୍ୟ ଗ୍ରାସ କରେ; ତୁମ୍ଭେ ନଗର ବିରୁଦ୍ଧରେ ଆହୁରି ଦୃଢ଼ ଯୁଦ୍ଧ କରି ତାହା ବିନାଶ କର।’ ଏହିପରି ତୁମ୍ଭେ ତାହାକୁ ସାହସ ଦେବ।”

ଆପଣା ସ୍ଵାମୀ ଊରୀୟ ମରିଅଛି ବୋଲି ଊରୀୟର ଭାର୍ଯ୍ୟା ଶୁଣନ୍ତେ, ସେ ଆପଣା ସ୍ଵାମୀ ନିମନ୍ତେ ବିଳାପ କଲେ। ପୁଣି ଶୋକ ସମାପ୍ତ ହୁଅନ୍ତେ, ଦାଉଦ ଲୋକ ପଠାଇ ତାଙ୍କୁ ଆପଣା ଗୃହକୁ ଅଣାଇଲେ, ଆଉ ସେ ତାଙ୍କ ଭାର୍ଯ୍ୟା ହୋଇ ତାଙ୍କ ନିମନ୍ତେ ଗୋଟିଏ ପୁତ୍ର ପ୍ରସବ କଲେ। ମାତ୍ର ଦାଉଦ ଯେଉଁ କର୍ମ କରିଥିଲେ, ତାହା ଆମ୍ଭମାନଙ୍କ ପିତାଙ୍କ ଦୃଷ୍ଟିରେ ମନ୍ଦ ଥିଲା।