ବିଚାରକର୍ତ୍ତା 20 FHB Father's Heart Bible™

20 ¹ସେତେବେଳେ ଦାନଠାରୁ ବେର୍ଶେବା ପର୍ଯ୍ୟନ୍ତ ସମଗ୍ର ଇସ୍ରାଏଲ-ସନ୍ତାନ ଗିଲୀୟଦ ଦେଶ ସହିତ ବାହାରି ଆସି ମିସ୍ପାରେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ଏକ ମନୁଷ୍ୟ ପରି ଏକତ୍ର ହୋଇ ସମାଜ ହେଲେ। ²ପୁଣି ସମସ୍ତ ଲୋକଙ୍କ ଅଧ୍ୟକ୍ଷଗଣ, ଅର୍ଥାତ୍‍ ଇସ୍ରାଏଲର ସମସ୍ତ ଗୋଷ୍ଠୀ ଆମ୍ଭମାନଙ୍କ ପିତାଙ୍କ ଲୋକଙ୍କ ସମାଜରେ ଉପସ୍ଥିତ ହେଲେ, ସେମାନେ ପଦାତିକ ଚାରି ଲକ୍ଷ ଖଡ୍ଗଧାରୀ ଲୋକ ଥିଲେ। ³ଆଉ ଇସ୍ରାଏଲ-ସନ୍ତାନ ମିସ୍ପାକୁ ଯାଇଅଛନ୍ତି ବୋଲି ବିନ୍ୟାମୀନ-ସନ୍ତାନ ଶୁଣିଲେ। ତହିଁରେ ଇସ୍ରାଏଲ-ସନ୍ତାନ ପଚାରିଲେ, “ଏହି ଦୁଷ୍କର୍ମ କିପରି ଘଟିଲା, ତାହା ଆମ୍ଭମାନଙ୍କୁ କୁହ।”

⁴ସେତେବେଳେ ସେହି ହତ ସ୍ତ୍ରୀର ସ୍ଵାମୀ, ସେହି ଲେବୀୟ ଲୋକ ଉତ୍ତର ଦେଲା, “ମୁଁ ଓ ମୋହର ଉପପତ୍ନୀ ରାତ୍ରି ଯାପନ କରିବା ନିମନ୍ତେ ବିନ୍ୟାମୀନର ଗିବୀୟାକୁ ଆସିଥିଲୁ। ⁵ତହିଁରେ ଗିବୀୟାର ଲୋକମାନେ ମୋʼ ବିରୁଦ୍ଧରେ ଉଠି ରାତ୍ରିରେ ମୋତେ ଘେରି ସେହି ଗୃହ ବେଷ୍ଟନ କଲେ ଓ ମୋତେ ବଧ କରିବାକୁ ମନସ୍ଥ କଲେ, ପୁଣି ମୋହର ଉପପତ୍ନୀକୁ ବଳାତ୍କାର କଲେ, ତହିଁରେ ସେ ମଲା। ⁶ତେଣୁ ମୁଁ ଆପଣା ଉପପତ୍ନୀକୁ ନେଇ ତାହାକୁ ଖଣ୍ଡ ଖଣ୍ଡ କରି କାଟି ଇସ୍ରାଏଲର ଅଧିକାରର ସମୁଦାୟ ଦେଶକୁ ପଠାଇଲି, କାରଣ ସେମାନେ ଇସ୍ରାଏଲ ମଧ୍ୟରେ କୁକର୍ମ ଓ ମୂଢ଼ତାର କାର୍ଯ୍ୟ କରିଥିଲେ। ⁷ଦେଖ, ହେ ଇସ୍ରାଏଲ-ସନ୍ତାନ ତୁମ୍ଭେ ସମସ୍ତେ, ଏହିଠାରେ ଏବେ ଆପଣାମାନଙ୍କ ବିବେଚନା ଓ ମନ୍ତ୍ରଣା ଦିଅ।”

⁸ସେତେବେଳେ ସମସ୍ତ ଲୋକ ଏକ ମନୁଷ୍ୟ ପରି ଉଠି କହିଲେ, “ଆମ୍ଭମାନଙ୍କ ମଧ୍ୟରୁ କେହି ଆପଣା ତମ୍ବୁକୁ ଯିବ ନାହିଁ, କିଅବା ଆମ୍ଭମାନଙ୍କ ମଧ୍ୟରୁ କେହି ଆପଣା ଗୃହକୁ ଫେରିବ ନାହିଁ। ⁹ମାତ୍ର ଏବେ ଆମ୍ଭେମାନେ ଗିବୀୟା ପ୍ରତି ଏହି କର୍ମ କରିବା: ଆମ୍ଭେମାନେ ଗୁଲିବାଣ୍ଟ ଦ୍ଵାରା ତାହା ଆକ୍ରମଣ କରିବା। ¹⁰ଆଉ ବିନ୍ୟାମୀନର ଗିବୀୟାକୁ ଯାଉଥିବା ସୈନ୍ୟମାନଙ୍କ ପାଇଁ ଖାଦ୍ୟ ଆଣିବା ନିମନ୍ତେ ଆମ୍ଭେମାନେ ଇସ୍ରାଏଲର ସମସ୍ତ ଗୋଷ୍ଠୀ ମଧ୍ୟରୁ ଏକ ଶହରୁ ଦଶ ଜଣ, ଏକ ସହସ୍ରରୁ ଏକ ଶହ ଓ ଦଶ ସହସ୍ରରୁ ଏକ ସହସ୍ର ଲୋକ ନେବା, ଯେପରି ବିନ୍ୟାମୀନ ଇସ୍ରାଏଲ ମଧ୍ୟରେ ଯେଉଁ ମୂଢ଼ତାର କର୍ମ କରିଅଛି, ତହିଁର ପ୍ରତିଫଳ ଦିଆଯାଇ ପାରିବ।” ¹¹ଏହିରୂପେ ଇସ୍ରାଏଲର ସମସ୍ତ ଲୋକ ଏକ ମନୁଷ୍ୟ ପରି ଏକତ୍ର ହୋଇ ସେହି ନଗର ବିରୁଦ୍ଧରେ ସମବେତ ହେଲେ। ¹²ଆଉ ଇସ୍ରାଏଲର ଗୋଷ୍ଠୀସମୂହ ବିନ୍ୟାମୀନ ସମସ୍ତ ଗୋଷ୍ଠୀ ମଧ୍ୟକୁ ଲୋକ ପଠାଇ ପଚାରିଲେ, “ତୁମ୍ଭମାନଙ୍କ ମଧ୍ୟରେ ଏ କି ଦୁଷ୍କର୍ମ ଘଟିଅଛି? ¹³ଏହେତୁ ଏବେ ଗିବୀୟାସ୍ଥିତ ସେହି ପାପାଧମ ଲୋକମାନଙ୍କୁ ସମର୍ପଣ କର, ଯେପରି ଆମ୍ଭେମାନେ ସେମାନଙ୍କୁ ବଧ କରି ଇସ୍ରାଏଲ ମଧ୍ୟରୁ ଦୁଷ୍ଟତା ଦୂର କରିପାରିବା।” ମାତ୍ର ବିନ୍ୟାମୀନ-ସନ୍ତାନ ଆପଣାମାନଙ୍କ ଭ୍ରାତା ଇସ୍ରାଏଲ-ସନ୍ତାନଙ୍କ ବାକ୍ୟ ଶୁଣିବାକୁ ସମ୍ମତ ହେଲେ ନାହିଁ।

¹⁴ବରଂ ବିନ୍ୟାମୀନ-ସନ୍ତାନ ଇସ୍ରାଏଲ-ସନ୍ତାନଙ୍କ ସଙ୍ଗେ ଯୁଦ୍ଧ କରିବାକୁ ଯିବା ନିମନ୍ତେ ଆପଣାମାନଙ୍କ ନଗରସମୂହରୁ ଗିବୀୟାରେ ଏକତ୍ର ହେଲେ। ¹⁵ପୁଣି ସେହି ଦିନ ବିନ୍ୟାମୀନ-ସନ୍ତାନ ଆପଣାମାନଙ୍କ ନଗରସମୂହରୁ ଛବିଶ ସହସ୍ର ଖଡ୍ଗଧାରୀ ଲୋକ ଗଣନା କଲେ, ତାʼ ଛଡ଼ା ଗିବୀୟା ନିବାସୀ ସାତ ଶହ ବଛା ଲୋକ ଗଣନା କଲେ। ¹⁶ଏହି ସମସ୍ତ ସୈନ୍ୟ ମଧ୍ୟରେ ସାତ ଶହ ବଛା ବାମହସ୍ତ ଲୋକ ଥିଲେ, ସେମାନଙ୍କ ପ୍ରତ୍ୟେକେ ଏକ କେଶ ଲକ୍ଷ୍ୟ କରି ଛାଟିଣୀରେ ପଥର ଫିଙ୍ଗି ଲକ୍ଷ୍ୟଭ୍ରଷ୍ଟ ହୁଅନ୍ତି ନାହିଁ। ¹⁷ଆଉ ବିନ୍ୟାମୀନ ଛଡ଼ା ଇସ୍ରାଏଲର ଲୋକମାନେ ଚାରି ଲକ୍ଷ ଖଡ୍ଗଧାରୀ ଲୋକ ଗଣନା କଲେ, ସେମାନେ ସମସ୍ତେ ଯୋଦ୍ଧା ଥିଲେ।

¹⁸ପୁଣି ଇସ୍ରାଏଲ-ସନ୍ତାନ ଉଠି ବେଥେଲ‍କୁ ଯାଇ ଆମ୍ଭମାନଙ୍କ ପିତାଙ୍କୁ ପଚାରିଲେ, “ବିନ୍ୟାମୀନ-ସନ୍ତାନଙ୍କ ବିରୁଦ୍ଧରେ ଯୁଦ୍ଧ କରିବା ନିମନ୍ତେ ଆମ୍ଭମାନଙ୍କ ମଧ୍ୟରୁ କିଏ ପ୍ରଥମେ ଯିବ?” ତହିଁରେ ଆମ୍ଭମାନଙ୍କ ପିତା କହିଲେ, “ଯିହୁଦା ପ୍ରଥମେ ଯିବ।”

¹⁹ଅନନ୍ତର ଇସ୍ରାଏଲ-ସନ୍ତାନ ପ୍ରଭାତରେ ଉଠି ଗିବୀୟା ନିକଟରେ ଛାଉଣି ସ୍ଥାପନ କଲେ। ²⁰ପୁଣି ଇସ୍ରାଏଲର ଲୋକମାନେ ବିନ୍ୟାମୀନ ସଙ୍ଗେ ଯୁଦ୍ଧ କରିବାକୁ ବାହାରିଗଲେ ଓ ଗିବୀୟାରେ ସେମାନଙ୍କ ବିରୁଦ୍ଧରେ ଯୁଦ୍ଧାର୍ଥେ ସୈନ୍ୟ ସଜାଇଲେ। ²¹ତହିଁରେ ବିନ୍ୟାମୀନ-ସନ୍ତାନ ଗିବୀୟାରୁ ବାହାରି ଆସି ସେହି ଦିନ ଇସ୍ରାଏଲର ବାଇଶ ସହସ୍ର ଲୋକଙ୍କୁ କ୍ଷେତ୍ରରେ ଭୂମିଶାୟୀ କଲେ। ²²ମାତ୍ର ଇସ୍ରାଏଲର ଲୋକମାନେ ଆପଣାମାନଙ୍କୁ ଆଶ୍ଵାସ୍ତ କରି, ପ୍ରଥମ ଦିନ ଯେଉଁ ସ୍ଥାନରେ ସେମାନେ ସୈନ୍ୟ ସଜାଇଥିଲେ, ସେହି ସ୍ଥାନରେ ପୁନର୍ବାର ଯୁଦ୍ଧାର୍ଥେ ସୈନ୍ୟ ସଜାଇଲେ।

²³ଆଉ ଇସ୍ରାଏଲ-ସନ୍ତାନ ଉପରକୁ ଯାଇ ସନ୍ଧ୍ୟା ପର୍ଯ୍ୟନ୍ତ ଆମ୍ଭମାନଙ୍କ ପିତାଙ୍କ ସମ୍ମୁଖରେ ରୋଦନ କରି ପଚାରିଲେ, “ଆମ୍ଭେମାନେ ପୁନର୍ବାର ଆପଣାମାନଙ୍କ ଭ୍ରାତା ବିନ୍ୟାମୀନ-ସନ୍ତାନଙ୍କ ସଙ୍ଗେ ଯୁଦ୍ଧ କରିବା କି?” ତହିଁରେ ଆମ୍ଭମାନଙ୍କ ପିତା କହିଲେ, “ସେମାନଙ୍କ ବିରୁଦ୍ଧରେ ଯାଅ।”

²⁴ଏହେତୁ ଇସ୍ରାଏଲ-ସନ୍ତାନ ଦ୍ଵିତୀୟ ଦିନ ବିନ୍ୟାମୀନ-ସନ୍ତାନଙ୍କ ବିରୁଦ୍ଧରେ ଅଗ୍ରସର ହେଲେ। ²⁵ତହିଁରେ ବିନ୍ୟାମୀନ ଦ୍ଵିତୀୟ ଦିନ ଗିବୀୟାରୁ ସେମାନଙ୍କ ବିରୁଦ୍ଧରେ ବାହାରି ଆସି ପୁନର୍ବାର ଇସ୍ରାଏଲ-ସନ୍ତାନଙ୍କ ଅଠର ସହସ୍ର ଲୋକଙ୍କୁ ଭୂମିଶାୟୀ କଲେ, ସେମାନେ ସମସ୍ତେ ଖଡ୍ଗଧାରୀ ଥିଲେ।

²⁶ସେତେବେଳେ ଇସ୍ରାଏଲ-ସନ୍ତାନ ସମସ୍ତେ, ଅର୍ଥାତ୍‍ ସମଗ୍ର ସୈନ୍ୟ ଉପରକୁ ଯାଇ ବେଥେଲ‍କୁ ଆସି ସେଠାରେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ବସି ରୋଦନ କଲେ, ପୁଣି ସେହି ଦିନ ସନ୍ଧ୍ୟା ପର୍ଯ୍ୟନ୍ତ ଉପବାସ କରି ତାହାଙ୍କ ସମ୍ମୁଖରେ ହୋମବଳି ଓ ମଙ୍ଗଳାର୍ଥକ ବଳି ଉତ୍ସର୍ଗ କଲେ। ²⁷ଆଉ ଇସ୍ରାଏଲ-ସନ୍ତାନ ଆମ୍ଭମାନଙ୍କ ପିତାଙ୍କୁ ପଚାରିଲେ। (ସେହି କାଳରେ ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ସେଠାରେ ଥିଲା,

²⁸ଆଉ ହାରୋଣଙ୍କ ପୌତ୍ର, ଇଲୀୟାସରଙ୍କ ପୁତ୍ର ପୀନହସ୍‍ ସେହି କାଳରେ ତାʼ ସମ୍ମୁଖରେ ସେବା କରୁଥିଲେ।) ସେମାନେ ପଚାରିଲେ, “ଆମ୍ଭେମାନେ ଆପଣାମାନଙ୍କ ଭ୍ରାତା ବିନ୍ୟାମୀନ-ସନ୍ତାନଙ୍କ ସଙ୍ଗେ ଯୁଦ୍ଧ କରିବା ନିମନ୍ତେ ପୁନର୍ବାର ଯିବା, ଅବା ନିବୃତ୍ତ ହେବା?” ତହିଁରେ ଆମ୍ଭମାନଙ୍କ ପିତା କହିଲେ, “ଯାଅ, କାରଣ କାଲି ଆମ୍ଭେ ସେମାନଙ୍କୁ ତୁମ୍ଭମାନଙ୍କ ହସ୍ତରେ ସମର୍ପଣ କରିବା।”

²⁹ଏଥିରେ ଇସ୍ରାଏଲ ଗିବୀୟାର ଚତୁର୍ଦ୍ଦିଗରେ ଲୋକ ଘଡ଼ି ବସାଇଲେ। ³⁰ଆଉ ଇସ୍ରାଏଲ-ସନ୍ତାନ ତୃତୀୟ ଦିନ ବିନ୍ୟାମୀନ-ସନ୍ତାନଙ୍କ ବିରୁଦ୍ଧରେ ଅଗ୍ରସର ହୋଇ ପୂର୍ବ ପରି ଗିବୀୟା ବିରୁଦ୍ଧରେ ସୈନ୍ୟ ସଜାଇଲେ। ³¹ତହିଁରେ ବିନ୍ୟାମୀନ-ସନ୍ତାନ ଲୋକମାନଙ୍କ ବିରୁଦ୍ଧରେ ବାହାରି ଆସି ନଗରଠାରୁ ଆକର୍ଷିତ ହେଲେ, ପୁଣି ପୂର୍ବ ପରି ଲୋକମାନଙ୍କୁ ବଧ କରିବାକୁ ଆରମ୍ଭ କରି ବେଥେଲ‍କୁ ଉଠିଯିବା ଏକ ସଡ଼କ ଓ ଗିବୀୟାକୁ ଯିବା ଅନ୍ୟ ସଡ଼କ, ଏହି ରାଜପଥମାନଙ୍କରେ ଓ କ୍ଷେତ୍ରରେ ଇସ୍ରାଏଲର ପ୍ରାୟ ତିରିଶ ଜଣ ଲୋକଙ୍କୁ ବଧ କଲେ।

³²ତହିଁରେ ବିନ୍ୟାମୀନ-ସନ୍ତାନ କହିଲେ, “ସେମାନେ ପୂର୍ବ ପରି ଆମ୍ଭମାନଙ୍କ ସମ୍ମୁଖରେ ପରାସ୍ତ ହେଉଅଛନ୍ତି।” ମାତ୍ର ଇସ୍ରାଏଲ-ସନ୍ତାନ କହିଥିଲେ, “ଆସ, ଆମ୍ଭେମାନେ ପଳାଇ ସେମାନଙ୍କୁ ନଗରଠାରୁ ରାଜପଥମାନଙ୍କ ପର୍ଯ୍ୟନ୍ତ ଆକର୍ଷଣ କରିବା।”

³³ଅନନ୍ତର ଇସ୍ରାଏଲର ସମସ୍ତ ଲୋକ ଆପଣାମାନଙ୍କ ସ୍ଥାନରୁ ଉଠି ବାଲ‍-ତାମରରେ ସୈନ୍ୟ ସଜାଇଲେ ଓ ଘଡ଼ି ବସିଥିବା ଇସ୍ରାଏଲୀୟ ଲୋକମାନେ ଗେବାର ପଶ୍ଚିମସ୍ଥିତ ଆପଣାମାନଙ୍କ ସ୍ଥାନରୁ ଉଚ୍ଛୁଳି ପଡ଼ିଲେ। ³⁴ପୁଣି ସମଗ୍ର ଇସ୍ରାଏଲ ମଧ୍ୟରୁ ବଛା ଦଶ ସହସ୍ର ଲୋକ ଗିବୀୟା ବିରୁଦ୍ଧରେ ଅଗ୍ରସର ହେଲେ, ତହିଁରେ ଘୋର ଯୁଦ୍ଧ ହେଲା; ମାତ୍ର ଆପଣାମାନଙ୍କ ଉପରେ ବିପଦ ସନ୍ନିକଟ ବୋଲି ବିନ୍ୟାମୀନ-ସନ୍ତାନ ଜାଣିଲେ ନାହିଁ। ³⁵ପୁଣି ଆମ୍ଭମାନଙ୍କ ପିତା ଇସ୍ରାଏଲ ସମ୍ମୁଖରେ ବିନ୍ୟାମୀନକୁ ପରାସ୍ତ କଲେ; ତହିଁରେ ସେହି ଦିନ ଇସ୍ରାଏଲ-ସନ୍ତାନ ବିନ୍ୟାମୀନର ପଚିଶ ସହସ୍ର ଏକ ଶହ ଲୋକଙ୍କୁ ବଧ କଲେ, ସେମାନେ ସମସ୍ତେ ଖଡ୍ଗଧାରୀ ଥିଲେ। ³⁶ଏହିରୂପେ ବିନ୍ୟାମୀନ-ସନ୍ତାନ ଆପଣାମାନଙ୍କୁ ପରାସ୍ତ ବୋଲି ଦେଖିଲେ, କାରଣ ଇସ୍ରାଏଲର ଲୋକମାନେ ଗିବୀୟା ବିରୁଦ୍ଧରେ ବସାଇଥିବା ଘଡ଼ି ଉପରେ ନିର୍ଭର କରି ବିନ୍ୟାମୀନ ନିକଟରେ ପଛେଇ ଗଲେ। ³⁷ତହିଁରେ ଘଡ଼ି ବସିଥିବା ଲୋକମାନେ ତ୍ଵରା କରି ଗିବୀୟା ଉପରେ ଆକ୍ରମଣ କଲେ; ପୁଣି ଘଡ଼ି ବସିଥିବା ଲୋକମାନେ ଆଗକୁ ବ୍ୟାପିଯାଇ ଖଡ୍ଗଧାର ଦ୍ଵାରା ସମଗ୍ର ନଗରକୁ ଆଘାତ କଲେ। ³⁸ଇସ୍ରାଏଲର ଲୋକମାନେ ଘଡ଼ି ବସିଥିବା ଲୋକମାନଙ୍କ ସଙ୍ଗେ ଗୋଟିଏ ସଙ୍କେତ ନିର୍ଦ୍ଧାରଣ କରିଥିଲେ, ସେମାନେ ନଗରରୁ ଏକ ବୃହତ ଧୂମ-ମେଘ ଉଠାଇବେ। ³⁹ସେତେବେଳେ ଇସ୍ରାଏଲର ଲୋକମାନେ ଯୁଦ୍ଧରେ ବୁଲିପଡ଼ିବେ। ବିନ୍ୟାମୀନ ଇସ୍ରାଏଲର ଲୋକମାନଙ୍କୁ ବଧ କରିବାକୁ ଆରମ୍ଭ କରି ପ୍ରାୟ ତିରିଶ ଜଣଙ୍କୁ ବଧ କରିଥିଲେ, କାରଣ ସେମାନେ କହିଲେ, “ନିଶ୍ଚୟ ପ୍ରଥମ ଯୁଦ୍ଧ ପରି ସେମାନେ ଆମ୍ଭମାନଙ୍କ ସମ୍ମୁଖରେ ପରାସ୍ତ ହେଉଅଛନ୍ତି।” ⁴⁰ମାତ୍ର ଯେତେବେଳେ ନଗରରୁ ଧୂମ-ସ୍ତମ୍ଭ ଉଠିବାକୁ ଆରମ୍ଭ କଲା, ସେତେବେଳେ ବିନ୍ୟାମୀନ-ସନ୍ତାନ ଆପଣାମାନଙ୍କ ପଛକୁ ଅନାଇଲେ, ଆଉ ଦେଖ, ସମଗ୍ର ନଗର ଆକାଶ ଆଡ଼କୁ ଧୂମ ହୋଇ ଉଠୁଅଛି। ⁴¹ଆଉ ଇସ୍ରାଏଲର ଲୋକମାନେ ବୁଲିପଡ଼ିବା କ୍ଷଣି, ଆପଣାମାନଙ୍କ ଉପରେ ବିପଦ ଆସିପଡ଼ିଅଛି ବୋଲି ଦେଖି ବିନ୍ୟାମୀନର ଲୋକମାନେ ଭୀତ ହେଲେ। ⁴²ଏହେତୁ ସେମାନେ ଇସ୍ରାଏଲର ଲୋକମାନଙ୍କ ସମ୍ମୁଖରୁ ପ୍ରାନ୍ତର ଆଡ଼କୁ ବୁଲିପଡ଼ିଲେ, ମାତ୍ର ଯୁଦ୍ଧ ସେମାନଙ୍କ ପଛେ ପଛେ ଲାଗିରହିଲା, ପୁଣି ବିଭିନ୍ନ ନଗରରୁ ଆସିଥିବା ଲୋକମାନେ ସେମାନଙ୍କୁ ତହିଁ ମଧ୍ୟରେ ବଧ କଲେ। ⁴³ସେମାନେ ବିନ୍ୟାମୀନ-ସନ୍ତାନଙ୍କୁ ଚାରିଆଡ଼େ ଘେରି ସେମାନଙ୍କୁ ଗୋଡ଼ାଇ ଗିବୀୟାର ପୂର୍ବ ଦିଗରେ ସେମାନଙ୍କ ବିଶ୍ରାମ-ସ୍ଥାନରେ ସେମାନଙ୍କୁ ପଦ-ତଳେ ଦଳିତ କଲେ। ⁴⁴ତହିଁରେ ବିନ୍ୟାମୀନର ଅଠର ସହସ୍ର ଲୋକ ପଡ଼ିଲେ, ସେମାନେ ସମସ୍ତେ ବୀର ପୁରୁଷ ଥିଲେ। ⁴⁵ପୁଣି ଅବଶିଷ୍ଟ ଲୋକ ବୁଲିପଡ଼ି ପ୍ରାନ୍ତର ଆଡ଼େ ରିମ୍ମୋନ-ଶୈଳକୁ ପଳାଇଲେ, ମାତ୍ର ଇସ୍ରାଏଲ ରାଜପଥମାନଙ୍କରେ ପାଞ୍ଚ ସହସ୍ର ଲୋକଙ୍କୁ ବଧ କଲେ ଓ ଗିଦୋମ ପର୍ଯ୍ୟନ୍ତ ସେମାନଙ୍କ ପଛେ ଗୋଡ଼ାଇ ଆଉ ଦୁଇ ସହସ୍ର ଲୋକଙ୍କୁ ବଧ କଲେ। ⁴⁶ଏହିରୂପେ ସେହି ଦିନ ବିନ୍ୟାମୀନର ପତିତ ସମସ୍ତ ଲୋକ ପଚିଶ ସହସ୍ର ଖଡ୍ଗଧାରୀ ଥିଲେ, ସେମାନେ ସମସ୍ତେ ବୀର ପୁରୁଷ ଥିଲେ। ⁴⁷ମାତ୍ର ଛଅ ଶହ ଲୋକ ବୁଲିପଡ଼ି ପ୍ରାନ୍ତର ଆଡ଼େ ରିମ୍ମୋନ-ଶୈଳକୁ ପଳାଇ ଚାରି ମାସ ପର୍ଯ୍ୟନ୍ତ ସେହି ରିମ୍ମୋନ-ଶୈଳରେ ରହିଲେ। ⁴⁸ତହିଁରେ ଇସ୍ରାଏଲର ଲୋକମାନେ ବିନ୍ୟାମୀନ-ସନ୍ତାନଙ୍କ ବିରୁଦ୍ଧରେ ବୁଲିପଡ଼ି ଖଡ୍ଗଧାର ଦ୍ଵାରା ସମଗ୍ର ନଗର, ଲୋକ, ପଶୁ ଓ ଯାହା କିଛି ପାଇଲେ, ସେସବୁକୁ ଆଘାତ କଲେ, ପୁଣି ଆପଣାମାନଙ୍କ ପଥରେ ଥିବା ପ୍ରତ୍ୟେକ ନଗରକୁ ଅଗ୍ନିରେ ଦଗ୍ଧ କଲେ।