Nehemiah 12

12 ¹Hibing hi Shealtielwui naomayara Zerubbabel kala Jeshuali ngasoda ngasounga pāngmonbing kala Levinaobingna: Seraiah, Jeremiah, Ezra, ²Amariah, Malluch, Hattush, ³Shecaniah, Rehum, Meremoth, ⁴Iddo, Ginnethoi, Abijah, ⁵Mijamin, Maadiah, Bilgah, ⁶Shemaiah, Joiarib, Jedaiah, ⁷Sallu, Amok, Hilkiah, Jedaiah; athum hi Jeshuawui atamli pāngmonbing kala athumwui achinā ngarāwui akhavābingna.

⁸Levinaobing: Jeshua, Binnui, Kadmi-el, Sherebiah, Judah eina Mattaniah, ana achinā ngarāli ngasoda ningkashi laawui haophokkhami kathāna sai. ⁹Athumwui achinā ngarā Bakbukiah eina Unnina athumwui otram khangatha̱wui khum athishurda athumli yangngasungda nganinga. ¹⁰Jeshuana Joiakimli, Joiakimna Eliashibli, Eliashibna Joiadali pharai, ¹¹Joiadana Jonathanli, kala Jonathanna Jaddu-ali pharai.

¹²Joiakimwui atamli avāva̱ ngarā shimkhurwui akhavā pāngmonbingna: Seraiahwui shimkhurwui vang Meraiah, Jeremiahwui vang Hananiah, ¹³Ezrawui vang Meshullam; Amariahwui vang Jehohanan; ¹⁴Malluchiwui vang Jonathan; Shebaniahwui vang Joseph; ¹⁵Harimwui vang Adna; Meraiothwui vang Helkai; ¹⁶Iddowui vang Zechariah; Ginnethonwui vang Meshullam; ¹⁷Abijahwui vang Zichri; Miniamin eina Moadiahwui vang Piltai; ¹⁸Bilgahwui vang Shammua; Shemaiahwui vang Jehonathan; ¹⁹Joiaribwui vang Mattenai; Jedaiahwui vang Uzzi; ²⁰Sallaiwui vang Kallai; Amokwui vang Eber; ²¹Hilkiahwui vang Hashabiah; Jedaiahwui vang Nethanel.

²²Eliashib, Joiada, Johanan, kala Jaddu-awui thangbingli, Levinaobingwui shimkhurwui wungva̱bing chi kapiserhaida lei, kala Persia mi Dariuswui munglakha pāngmonbingla chi tākam eina kapiserhai. ²³Levinaobingwui shimkhurwui wungva̱bing chi Eliashibwui nao Johananwui thang eina tangda Thotrinchān Lairikli kapiserhaida lei. ^a a v23 Hili khalei Thotrinchān Lairik hi wungramwui otva̱ thotrin lairik akhana, Baibelwui Thotrinchān lairikbing chi maningmana. ²⁴Levishiwui wungva̱bing chiya Hashabiah, Sherebiah, kala Kadmi-elwui nao Jeshuana; ithumwui Avāwui mi Davidna kakaso athishurda, athumwui achinā ngarāna athumli kāroda nganingda, shang akha eina khangatei shangli ngahānkāda masot chikatta ningkashi mi. ²⁵Mattaniah, Bakbukiah, Obadiah, Meshullam, Talmon, kala Akkub china ngavei khamayonbing sāda, ngaveili khalei lanshimbing khamayona sai. ²⁶Athum hi Jozadakwui nao Jeshuawui nao Joiakimwui thangbingli, kala rammunga Nehemiah eina pāngmon kala ain kathema Ezrawui thangbingli otram ngatha̱ya.

Phākho chi Khamathān Tarākha eina Dharkat Sākahai

²⁷Jerusalemwui phākhowui dharkatli ningkashi khami, laasak, kortar, tingteilā, kala lyre eina khamathānna dharkat chi sāphārumsa khavai, athumna Levinaobingli athumwui pamkhavai apam kachida eina vāphākhuilaga Jerusalemli chihorai. ²⁸Laa kasābingla Jerusalemwui kuikhamareili khalei ngaleivāk eina, kala Netophathshiwui kha̱bing eina rākazipa, ²⁹Beth-gilgal eina Geba kala Azmavethwui kha̱ eina, kaja laa kasābingna Jerusalemwui kuikhamareili khalei athum khalatta kha̱bing sākhuiluihaowa. ³⁰Pāngmonbing eina Levinaobingna akhalatta tharkhui tharan, athumna mibing, ngaveibing, kala phākho chi tharkhuisera.

³¹Chiwui thili ina Judahwui akhokabingli phākhotungshong khāngkhuira, kala ningkashiwui laa kasā ashangva̱ haklak khani kapangsangkhui. Akhana phākhotungli yāshong Thothap Ngaveishong makānvai. ³²Hoshaiah eina Judahwui akhokabing ngayarpak china athum thi shurrai, ³³Azariah, Ezra, Meshullam eina ngasoda, ³⁴Judah, Benjamin, Shemaiah, kala Jeremiah, ³⁵kala pāngmonwui naomayarabing kaikhana talla̱ singda: Zechariah Jonathanwui nao, Jonathan Shemaiahwui nao, Shemaiah Mattaniahwui nao, Mattaniah Micaiahwui nao, Micaiah Zaccurwui nao, Zaccur Asaphwui nao, ³⁶kala achinā ngarā—Shemaiah, Azarel, Milalai, Gilalai, Maai, Nethanel, Judah, kala Hanani—ithumwui Avāwui mi Davidwui tingteilā singda ngasozata; ain kathema Ezrana athumwui mangāli vai. ³⁷Ura̱ Ngaveili, athumna Davidwui Keinungwui chonchak ngarongri thānsera, phākhowui ashan thānda, Davidwui shim kāngkhuilaga, zingshoshong khalei Tara̱ Ngaveili shanga.

³⁸Kakhane ningkashi laa kasā shangna vei akhashong vai; ina mi tangkhaili ngasoda thi shurda, phākhotungli, Sha̱rkha̱wui Raikānphung kāngkhuilaga Phākho Mashālāli shanga, ³⁹kala Ephraimwui Ngavei, Jeshanah Ngavei, Khai Ngavei, Hananelwui Raikānphung, Shākhawui Raikānphung kāngkhuida, Yao Ngaveili shanga, kala Khamayon Ngaveili kasha̱nsera. ⁴⁰Ningkashi laa kasā shang khanina ithumwui Avāwui shimli nganinga; ili ngasokapam otva̱bing tangkhaili ngasoda ina ngarumda nganinga, ⁴¹kala pāngmonbing Eliakim, Ma-aseiah, Miniamin, Micaiah, Eli-o-enai, Zechariah, eina Hananiah athumwui talla̱ singda. ⁴²Ngarumda Ma-aseiah, Shemaiah, Eleazar, Uzzi, Jehohanan, Malchijah, Elam, eina Ezer. Laa kasābingna Jezrahiahna kathāna sāda laa sai. ⁴³Chithang athumna pha̱kaphayā kahakva chigata kala ringphaisera, kaja ithumwui Avāna athumli khamathān tarākha mihaowa. Sha̱nao kala naoshinaola ringphaisera, kala Jerusalemwui khamathān chi katāva̱li shāhaowa.

Avāli Otram Ngatha̱bingli Yangkhami

⁴⁴Chithang ain athishurda pāngmonbing eina Levinaobingli mikahai yarbing keinungwui luibing eina kazipmi khavai, kachigat, matheikhare theishirai kala tithe haikhavai lanshimtungli mibingli kapangkhui; kaja Judahna otram khangatha̱ pāngmonbing eina Levinaobingwui vang ringphāsa. ⁴⁵David eina awui nao Solomonna kaso kahai tākam eina, athumna ithumwui Avāwui otpam kala pheokhamatharwui otpam mayona, kala laa kasābing eina ngavei khamayonbingna ngarumda mayona. ⁴⁶Kaja achālakha David eina Asaphwui atamli laa kasābingwui akhokabingna ithumwui Avāli masotlaa kala ningkashi laa thānmi. ⁴⁷Zerubbabel eina Nehemiahwui atamli, Israel saikorana laa kasābing eina ngavei khamayonbingli thangkachida yar michinga, kala Levinaobingwui vang yar phaishokhaira, kala Levinaobingna Aaronwui naomayarabingwui vang yar phaishokhaira.