2 Wungnaobing 19

19 ¹Awunga Hezekiahna chi kashā eina awui kachon serkhāklaga bora ngavaida ithumwui Avāwui shimli vai. ²Ana shimwui kashok-kazang yangkhame Eliakim, kapime Shebna, kala pāngmon ararbing katongana sifawui kachon tonglaga Amozwui naomayara marān Isaiahwuili chihovai. ³Athumna ali hānga, "Hezekiahna hithāda hānga: Aja ningkachot, kakharar, kala maikashiwui zimiksho china; naongarā pharā atam ungshunghairasai, kha athumli pharāt khavai pangshap maleimana. ⁴Awui akhavā Assyriawui awungana kharinga Avāli mana̱shi khavai chihovākasā raithānawui tui saikora chi nawui Avāna shāmilapai, kala awui shākahai tui chi kaharlapai. Chieina shākkahaibingwui vang seihā sālu."

⁵Awunga Hezekiahwui raobingna Isaiahwuili khavā eina,

⁶Isaiahna athumli hānga, "Nathumwui akhavāli hānglu, ithumwui Avāna hithāda hānga: Assyriawui awungawui raobingna ili mana̱shi kahai nathumna shākahai tui chi mangacheelu. ⁷Ina ali manglā akha sangmira; chieina ana pao akha shāda awui kachichā ngaleili latungra, kala chili ina ali raighai eina sāthatra."

⁸Raithāna Assyriawui awunga Lachishwui eina thuihaira da kashā eina, ana zatthuihailaga awungali Libnahli rai sālakha theihaira. ⁹Chitharan awunga china Cushwui awunga Tirhakahwui pongli hithāda pao shai, "Yanglu, ana nali ngarar khavai thuihaira." Kala ana Hezekiahli paophungmebing chihovāluishita hānga: ¹⁰"Judahwui awunga Hezekiahli hithāda hānglu: Nana shitsang kahai nawui Varena, 'Jerusalem Assyriawui awungawui pāngli makhuithuimara' da khamayā tui hāngda, nali machipat ngasakalu. ¹¹Yanglu, Assyriawui awungabingna ngalei saikorali sāsā athumli katonga sāshimānserhaokasā chi nana shāhaira. Chithākha nala ngatangshokra kajila? ¹²Ishāvā ngarāna sākazam yurbing, Gozan, Haran, Rezeph kala Telassarli khalei Edenwui mibingli yurbingwui varebingna kanmila? ¹³Hamath awunga, Arpad awunga, kala Sepharvaim keinung, Hena, kala Ivvahwui awungabing chi kali da leira?

Hezekiahna Avāwui mangāli chi hamnga

¹⁴Hezekiahna paophungmebingwui pāng eina chithi chi khuilaga pā. Chieina ithumwui Avāwui shimli vāklaida awui mangāli chi hamnga. ¹⁵Hezekiahna ithumwui Avāwui mangāli seihā sai: "Cherubimwuitungli pamda khalei Israelwui Vare, na amāng okathuiwui wungram saikorawuitungli Varena; nana kazing eina ngalei sai. ¹⁶O ithumwui Avā, nawui khanā nāshungmilu, kala nganāmilu; nawui mik shoda katheimilu. Sennacheribna kharinga Avāli mana̱shi khavai chihokharā tui saikora chi kashāmilu. ¹⁷Kachangkhat eina, O ithumwui Avā, Assyriawui awungabingna yurbing kala athumwui ngaleibing sākazamhaira, ¹⁸kala athumwui varebing meili sanghaowa; kaja athum varebing maningmana, kha miwui pāng eina kasā, thing kala lunggui china; chieina athumna sāshimānhaowa. ¹⁹Ara, O ithumwui Avā, awui pāng eina ithumli kankhuimilu, chieina okathuiwui wungram saikorana na amāng Vare china kaji theira."

Avāna Sennacheribwui langkaso maishi ngasaka

²⁰Amozwui naomayara Isaiahna Hezekiahli chihovāda hānga: "Israelwui Vare, ithumwui Avāna hithāda hānga: Assyriawui awunga Sennacheribwui pongli nana ili seihā sai kaji ina shāhaira." ²¹Awui pongli ithumwui Avāna hithāda hānga: Zionwui kachingva̱ ngalāva̱na nali ningkachaida mana̱shi; Jerusalemwui ngalāva̱na nawui thili akui shaksāmi. ²²Na khipāli mana̱shida kachipatkhala? Khipāli nana lah juida langkaso eina namik khangkākhala? Israelwui Kathara Akhalina! ²³Nawui paome shichinlaga Avāli nana mana̱shihaira, kala nana hānga: Iwui siguigari kachungkha eina ina kāhaira kaphung kajujuili, Lebanon akatanga ngahongli. Chiwui juimeikap kaji cedarthing ina ta̱teka, chiwui mathāmeikap kaji cypress ta̱teka. Chiwui vāmeikap kaji kajuili, ngahong shāmeikap kaje chili vāshunga. ²⁴Ina ra̱khong khona kala kha̱ tara̱ manga; ipheimayā eina Egypt kong saikora thengngasaka. ²⁵Nana mashāhairalā? Achālakhawui eina ina sāhaira; achālakha atamwui eina ina khangarān sai. Ara ina chi ungshung ngasakhaira, chieina nana ngaveiphin kahai keinungbing ja̱ta akhum-akhum onngasakhaora. ²⁶Chiwui kapambing, pangshap thengchaohaoda, khakshingakhaira kala maishihaora. Athum leikhurli khalei alung thāda leihaowa, nganuizon kala thingra̱ khawo thāda, shimtungli kaphor khawo thāda, mahaksangranglakha kaprorhaowa. ²⁷Kha nana pamda leikhavai, nana zatphok kala nana rāzang, kala ili nana malungvātkhavai, ina saikora theihaira. ²⁸Nana ili malungvāt kahai kala nawui langkaso ikhanāli rāshung kahaiwui vang, nanātangli iwui narenra̱ sangkhaira, kala namorchaili iwui yāchan sangkhaira; kala nawui rākhavai apong chieina ina nali hanungra.

²⁹Hezekiah, hi nawui machut china: hi kum khalatta shok kahai chi shailu, kakhane kum chiwui eina shok kahai chi shailu; kala kakathuma kum, yaolu, hātkhuilu, drakhā yāmgui sāsanglu, kala chiwui athei shailu. ³⁰Kaikha Judahwui shimkhur shāk kahaina azingshong angayung sa̱ra kala atungshong athei theira. ³¹Kaja shāk kahai akha Jerusalemwui eina shokra, kala ashangva̱ ringkashoka akha Zion Kaphungwui eina shokra. Hi Saikorawui Avāwui sāngairereona ungshung ngasakra.

³²"Chiwui vang eina Assyria awungawui pongli ithumwui Avāna hithāda hānga: Ana keinung hi alungli marāzangpaimara, kala chili malā akhala makāppaimara; chāngvei phunglagala chiwui mangāli marāpaimara, kala chiwui pongli tukkhui raipan lahla masākāshānpaimara. ³³Ana rākhavai apong chi tākam eina latungra; a keinung hili marāzangpaimara da ithumwui Avāna hānga. ³⁴Keinung hi ina ngākmira kala chi kankhuimira, iwui khalattawui vang eina kala iwui rao Davidwui vangna."

³⁵Chithang ngayā ithumwui Avāwui kazingrao china vāda Assyriawui rairumli mi lakh akha kala thing hangchishatta phangā shaothata; kala ngakarkathui mibingna ngathorthakva̱ tharan, yanglu, kathi angunmāng saikora ngasāsai. ³⁶Chiwui thili Assyriawui awunga Sennacherib thuihaowa, kala Ninevehli latungda chili apamhaowa. ³⁷Kala ana awui vare Nisrochwui shimli khorumpamda leilakha, awui naomayara Adrammelech eina Sharezerna raighai eina sāthathaowa, kala Ararat ngaleili yāmvāhaowa. Kala anaomayara Esar-haddonna awui pamli munghaowa.