2 Sarakuna 19 FHB Father's Heart Bible™

19 ¹Da Sarki Hezekiya ya ji haka, sai ya yayyage tufafinsa, ya sa rigar makoki, ya shiga gidan Ubanmu. ²Ya aiki Eliyakim shugaban fada, da Shebna marubuci, da manyan firistoci, dukansu saye da tufafin makoki, zuwa wurin annabi Ishaya ɗan Amoz. ³Suka ce masa, “Hezekiya ya ce, Yau rana ce ta wahala, da tsawa, da kunya; yara sun kai lokacin haihuwa, amma babu ƙarfin a haife su. ⁴Wataƙila Ubanka zai ji dukan kalmomin shugaban sojoji, wanda maigidansa sarkin Assuriya ya aika domin yă zagi Uba mai rai, Ubanka kuma zai hukunta kalmomin da ya ji. Saboda haka ka yi addu'a domin raguwar da ta rage.”

⁵Da bayin Sarki Hezekiya suka zo wurin Ishaya,

⁶Ishaya ya ce musu, “Ku gaya wa maigidanku, Ubanmu ya ce, Kada ka ji tsoron kalmomin da ka ji, waɗanda bayin sarkin Assuriya suka zage ni da su. ⁷Ga shi, zan sa wani ruhu a cikinsa: zai ji wani labari, yă koma ƙasarsa, a can kuma zan sa a kashe shi da takobi.”

⁸Da shugaban sojoji ya ji sarkin Assuriya ya bar Lakish, sai ya janye, ya same shi yana yaƙi da Libna. ⁹Sarkin kuwa ya ji labarin Tirhaka sarkin Kush, cewa, “Ga shi, ya fito domin yă yaƙe ka.” Saboda haka ya sāke aika manzanni wurin Hezekiya, ¹⁰“Ku gaya wa Hezekiya sarkin Yahuda, Kada Allahnka wanda ka dogara gare shi yă ruɗe ka ta wurin yin alkawari cewa ba za a ba da Urushalima ga sarkin Assuriya ba. ¹¹Ga shi, ka ji abin da sarakunan Assuriya suka yi wa kowace ƙasa, yadda suka hallaka su ƙaƙaf. Kai fa, za a cece ka? ¹²Allolin al'umman da kakannina suka hallaka sun cece su ne—Gozan, da Haran, da Rezef, da mutanen Eden da suke a Telassar? ¹³Ina sarkin Hamat, da sarkin Arfad, da sarkin birnin Sefarbayim, da na Hena, da na Iffa?”

Hezekiya ya Shimfiɗa Shi a Gaban Uba

¹⁴Hezekiya ya karɓi wasiƙar daga hannun manzannin, ya karanta ta. Sa'an nan ya haura zuwa gidan Ubanmu, ya shimfiɗa ta a gabansa. ¹⁵Hezekiya ya yi addu'a a gaban Ubanmu, ya ce, “Ya Allah na Isra'ila, wanda yake zaune bisa kerubobi, kai kaɗai ne Allah bisa dukan mulkokin duniya; kai ka yi sammai da ƙasa. ¹⁶Ka saurara, ya Ubanmu, ka kuma ji; ka buɗe idanunka ka gani. Ka ji kalmomin Sennakerib da ya aika domin yă zagi Uba mai rai. ¹⁷Hakika, ya Ubanmu, sarakunan Assuriya sun hallaka al'ummai da ƙasashensu, ¹⁸suka kuma jefa allolinsu cikin wuta; gama ba alloli ba ne, sai dai aikin hannun mutum, itace da dutse. Saboda haka suka hallaka su. ¹⁹Yanzu kuwa, ya Ubanmu, ka cece mu daga hannunsa, domin dukan mulkokin duniya su san kai kaɗai ne Allah.”

Ubanmu ya Ƙasƙantar da Girman Kan Sennakerib

²⁰Ishaya ɗan Amoz ya aika wa Hezekiya cewa, “Ga abin da Ubanmu, Allah na Isra'ila, ya ce, Na ji addu'ar da ka yi mini game da Sennakerib sarkin Assuriya. ²¹Ga abin da Ubanmu ya ce game da shi, Budurwa Diyar Sihiyona ta rena ka, ta kuma yi maka ba'a; Diyar Urushalima ta kaɗa kai a bayanka. ²²Wa ka yi wa ba'a, ka kuma saɓa wa? A kan wa ka ɗaga muryarka, ka kuma ɗaga idanunka da girman kai? A kan Mai Tsarki na Isra'ila ne! ²³Ta wurin manzanninka ka yi wa Uba Maɗaukaki ba'a, ka kuma ce, Da yawan karusaina na hau kan tsaunukan dutse, can cikin zurfin Lebanon. Na sare manyan itatuwan al'ul nasa, zaɓaɓɓun itatuwan fir nasa. Na kai can tsayinsa mafi nisa, da kurminsa mafi kauri. ²⁴Na haƙa rijiyoyi, na kuma sha ruwan baƙi; da tafin ƙafafuna na busar da dukan rafuffukan Masar. ²⁵Ba ka ji ba? Tun da daɗewa na yi shi; tun zamanin dā na shirya shi. Yanzu kuwa na sa ya faru, domin ka mai da birane masu katanga tsibbai na kufai. ²⁶Mazaunansu, waɗanda aka raba da ƙarfi, suka karaya suka kuma ji kunya. Sun zama kamar tsire-tsiren jeji, kamar ɗanyun toho kore, kamar ciyawar da ta tsiro a kan rufin bene, wadda ta ƙeƙashe kafin ta yi girma. ²⁷Amma na san zamanka, da fitarka, da shigarka, da kuma fushinka a kaina. ²⁸Saboda fushinka a kaina da kuma girman kanka wanda ya kai kunnuwana, zan sa ƙugiyata a hancinka da linzamina a leɓunanka, zan kuma mai da kai ta hanyar da ka zo.

²⁹Wannan ita ce alamarka, Hezekiya, A wannan shekara za ka ci abin da ya tsiro da kansa, shekara mai zuwa kuma abin da ya tsiro daga gare shi; a shekara ta uku kuwa, ka yi shuka ka yi girbi, ka dasa gonakin inabi, ka kuma ci 'ya'yansu. ³⁰Sauran gidan Yahuda da suka ragu za su sāke yin saiwa a ƙasa, su kuma ba da 'ya'ya a bisa. ³¹Gama daga Urushalima za a sami raguwa, daga kuma Dutsen Sihiyona rukunin waɗanda suka tsira. Kishin Uba na rundunonin sama zai aikata wannan.

³²‘Saboda haka ga abin da Ubanmu ya ce game da sarkin Assuriya, Ba zai shiga wannan birni ba, ba kuwa zai harba kibiya a nan ba, ba zai fuskance shi da garkuwa ba, ba kuwa zai gina tudun yaƙi gāba da shi ba. ³³Ta hanyar da ya zo, zai komo; ba zai shiga wannan birni ba, in ji Ubanmu. ³⁴Zan kāre wannan birni in kuma cece shi, saboda kaina da kuma saboda bawana Dawuda.’”

³⁵A daren nan sai mala'ikan Ubanmu ya fito, ya karkashe dubu ɗari da tamanin da biyar a sansanin Assuriyawa. Da gari ya waye, sa'ad da suka tashi—sai ga dukan gawawwaki a kwance. ³⁶Saboda haka Sennakerib sarkin Assuriya ya tashi ya tafi. Ya koma Ninawa, ya zauna a can. ³⁷Yana cikin sujada a haikalin allahnsa Nisrok, sai 'ya'yansa maza Adrammelek da Sharezer suka kashe shi da takobi, suka gudu zuwa Ararat. Ɗansa Esar-Haddon ya gāje shi.