2 Thotrinchān 25

25 ¹Amaziahna mungkaphok tharan a zingkum maga̱da phangā kāshunghairasai, kala Jerusalemli zingkum maga̱da chiko munga. Awui ava̱ Jerusalemli khalei Jehoaddanna. ²Ana ithumwui Avāwui miktāli khamashung chi sai, kha ningtonglak eina maningmana. ³Wungram chi ali ngaziplak eina leikahai tharan, avāva̱ awunga chili shaokathata raobing chili ana shaothata.

⁴Kha Moseswui ain lairikli kapihaida lei kahai athishurda ana athumwui naobingli mashaothatmana; chili ithumwui Avāna kaso kahai: "Avāva̱ ngarāna naongarāwui vang mathipaimana, kala naongarāna avāva̱ ngarāwui vang mathipaimana; kha mi kachiva̱na akhalattawui moreiwui vang thira."

⁵Judah kala Benjamin saikorawui vang, Amaziahna Judahli kazipkhuida, avāva̱ ngarāwui shimlak athishurda thingthingwui kala shāshāwui kathānabing azingli phāsanga. Zingkum maga̱ eina kāzokta kachiva̱li ana mishān khuiya; kazei kala chāngvei kaphung, rai sākhavai kapang kakhui mi mashing shākathumna. ⁶Kala ana Israelwui eina raikapinga mi shākha, lupā pound thing tharuk kala shāphangā onlaga eina talop mi. ⁷Ithumwui Avāwui mi akhana awuili rāhānga, "O awunga, Israelwui raimi nana ngasoda mathuiranu, kaja ithumwui Avā Israelli, Ephraimnaobing saikorali ngasomana. ⁸Nana marāklak eina ngararlala, ithumwui Avāna nali yangkashewui mangāli yuihaora, kaja ithumwui Avāli ngachonmi lah sāshimānmiwui pangshap leira."

⁹Amaziahna ithumwui Avāwui mili ngahāna, "Kha ina Israelwui raimili mi kahai lupā pound thing tharuk kala shāphangā onlaga chi khisara?" Ana ngahānkai, "Ithumwui Avāna hi eina lāngda kachungkha nali mishap."

¹⁰Chieina Amaziahna Ephraimwui eina awuili rā kahai raimibingli shimli latung ngasaka. Athumna Judahwuitungli malungvātlakhaoda malungkhavāt eina shimli unghaowa.

¹¹Kha Amaziahna malung pingda, awui mibingli Machi Tampākli thānshoklaga, Seirwui mi thing tharā sāthata. ¹²Judahwui mibingna chila thing tharā kharing eina tukkhuida, kaphungtonli khuivāda hortāhaowa, kala saikora akaikai eina sāpothamkhaiserhaowa. ¹³Chitharan Amaziahna raili mathanvāla latung ngasak kahai raimibingna Samariawui eina Beth-horon tāshunga Judahwui keinungbingli rangararluiya, mi thing kathum sāthata, kala ngaponkakhui ot kachungkha khuiunga.

¹⁴Amaziahna Edomnaobingli yuihaikahai thili, Seirwui mibingwui varebing chi khuiungda, akhalattawui vang varebing sāda phāsanglaga, chibingli kui mashunzangda khoruma, kala rikkatā riktāhaowa. ¹⁵Chieina ithumwui Avāwui malungkhavāt Amaziahwuitungli leihaowa, kala ana marān akha chihovai, chi ana ngahāna, "Athumwui mibingli nawui pāng eina mahuikhame kahai hi miwui varebingli na khisāda phaikhala?"

¹⁶Ana khamatui leilakha, awungana hānga, "Ithumna nali awungawui machinme sāmihaira? Sāmlu! Khisāda na shaothat khavaila?" Chieina marān chi sāmhaowa, kha hānga, "Ithumwui Avāna nali sāshimān khavai ngarān kahai chi ina thei, kaja nana hi sālaga iwui hāngkachithei matheimithuwa."

¹⁷Judahwui awunga Amaziahna awui machinmebingli ngasanhaida, chitharan Israelwui awunga, Jehuwui ara̱ Jehoahazwui nao Joashli chihovai, "Thulu, ithumna mashā eina rai ngararsa."

¹⁸Israelwui awunga Joashna Judahwui awunga Amaziahli ngahānkai, "Lebanonwui khalei ka̱shātrong akhana Lebanonwui khalei cedarthingli chihovaida, 'Inaomayarawui preiva̱ sākhavai vang nanao ngalāva̱ milu' da hānga; kha Lebanonwui ramsā akhana rākānlaga ka̱shāt chili naikachupmihaowa. ¹⁹Nana, 'Yanglu, ina Edomli yuihaowa' da hānga, kala nawui ning lāngkaso ngasakta langsoi. Nawui shimli pamlu. Khisāda kalākashi phāda nala Judahla ngasoda pitāra?"

²⁰Kha Amaziahna manganāsangmana; kaja athumna Edomwui varebingli phāhaiwui vang athumli yangkashewui pāngli horsang khavai hi ithumwui Avāwui eina rāhaira. ²¹Chieina Israelwui awunga Joashna vāsamphanga, kala ana eina Judahwui awunga Amaziahna Judahli khalei Beth-shemeshli ani khani ngasunga. ²²Israelna Judahli yuihaoda kachāyām eina shimli yāmungserhaowa.

²³Israelwui awunga Joashna Jehoahazwui nao Joashwui nao, Judahwui awunga Amaziahli Beth-shemeshli tukkhuihaida Jerusalemli khuiunga; kala phākho chi Ephraim Ngavei eina Achithek Ngavei vāshungda khuining shāmati shaokhaimihaowa. ²⁴Kala ithumwui Avāwui shimli Obed-edomna khayang kahai sinā, lupāsā, khorkhong saikora, kala awungawui shimli lanbing, kala mibingla tukphungda Samariali khuiungserhaowa.

²⁵Judahwui awunga, Joashwui nao Amaziahna, Israelwui awunga, Jehoahazwui nao Joash thikahaiwui tharan eina, zingkum tharāda phangā ringvai. ²⁶Amaziahwui kasāsā, khare eina thuilaga khanao eina tangda, Judah kala Israel Awungabingwui Lairikli makapiserhaimala? ²⁷Amaziahna ithumwui Avāli mashurthuihaiwui thili, athumna Jerusalemli ali mithit khalen sāhaowa, kala ana Lachishli yāmvāhaowa. Kha athumna mibingli chili kharomvāda ali sāthathaowa. ²⁸Athumna ali sigui katong khuiungda avāva̱ ngarāli ngasoda Judahwui keinungli chifahaowa.