2 ዜና መዋዕል 25

25 ¹አማስያስ በሃያ አምስት ዓመቱ ነገሠ፤ በኢየሩሳሌምም ሃያ ዘጠኝ ዓመት ገዛ። እናቱ ከኢየሩሳሌም የሆነች ዮዓዳን ትባል ነበር። ²በአባታችን ፊት መልካም የሆነውን አደረገ፤ ነገር ግን በፍጹም ልቡ አልነበረም። ³መንግሥቱ በእጁ በጸናች ጊዜ፣ አባቱን ንጉሡን የገደሉትን አገልጋዮች ገደለ።

⁴ልጆቻቸውን ግን አልገደለም፤ ይህም አባታችን ባዘዘው በሙሴ መጽሐፍ በሕጉ ተጽፎ እንዳለ ነው፤ “አባቶች ስለ ልጆቻቸው አይሙቱ፤ ልጆችም ስለ አባቶቻቸው አይሙቱ፤ እያንዳንዱ ስለ ራሱ ኀጢአት ይሙት።”

⁵አማስያስ ይሁዳን ሰበሰበ፤ ይሁዳንና ብንያምን ሁሉ እንደ አባቶቻቸው ቤት በሻለቃዎችና በመቶ አለቆች ሥር አደራጃቸው። ከሃያ ዓመት በላይ የሆኑትንም ቈጠረ፤ ጦርና ጋሻ የሚይዙ፣ ለጦርነት የተዘጋጁ ሦስት መቶ ሺህ የተመረጡ ሰዎች ሆነው ተገኙ። ⁶ከእስራኤልም ሰባት ሺህ አምስት መቶ ፓውንድ ያህል ብር ከፍሎ መቶ ሺህ ኀያላን ተዋጊዎች ቀጠረ። ⁷የአባታችን ሰው ግን ወደ እርሱ መጥቶ እንዲህ አለው፤ “ንጉሥ ሆይ፤ የእስራኤል ሰራዊት ከአንተ ጋራ አይሂድ፤ አባታችን ከእስራኤል ጋራ፣ ከእነዚህ ኤፍሬማውያን ሁሉ ጋራ የለምና፤ ⁸ጀግና ሆነህ ብትዋጋም፣ አባታችን በጠላት ፊት ይጥልሃል፤ አባታችን ለመርዳትም ሆነ ለመጣል ኀይል አለውና።”

⁹አማስያስም የአባታችንን ሰው፣ “ለእስራኤል ሰራዊት ስለ ሰጠሁት ሰባት ሺህ አምስት መቶ ፓውንድ ያህል ብር ግን ምን ይሆናል?” ብሎ ጠየቀው። እርሱም፣ “አባታችን ከዚህ እጅግ አብልጦ ሊሰጥህ ይችላል።” ብሎ መለሰ።

¹⁰ስለዚህ አማስያስ ከኤፍሬም ወደ እርሱ የመጡትን ሰራዊት ወደ ቤታቸው መለሳቸው። እነርሱም በይሁዳ ላይ እጅግ ተቈጥተው በታላቅ ቍጣ ወደ ቤታቸው ተመለሱ።

¹¹አማስያስ ግን ጠንክሮ ሕዝቡን ወደ ጨው ሸለቆ መርቶ አወጣ፤ ከሴይርም ሰዎች ዐሥር ሺህ መታ። ¹²የይሁዳም ሰዎች ዐሥር ሺህ ሕያው ማርከው ወደ ዐለቱ ጫፍ ወሰዷቸው፤ ከዚያም ወደ ታች ጣሏቸው፤ ሁሉም ተፈጥፍጠው ተሰባበሩ። ¹³ይህ በእንዲህ እንዳለ፣ አማስያስ ወደ ጦርነት እንዳይገቡ መልሶ የላካቸው ሰራዊት፣ ከሰማርያ እስከ ቤትሆሮን ያሉትን የይሁዳ ከተሞች ወረሩ፤ ሦስት ሺህ ሰዎች መቱ፤ ብዙ ብዝበዛም ዘረፉ።

¹⁴አማስያስ ኤዶማውያንን ድል ካደረገ በኋላ፣ የሴይር ሰዎች አማልክት ይዞ መጣ፤ ለራሱም አማልክት አድርጎ አቆማቸው፤ ሰገደላቸው፤ ለእነርሱም መሥዋዕት አቃጠለ። ¹⁵ስለዚህ የአባታችን ቍጣ በአማስያስ ላይ ነደደ፤ ነቢይም ወደ እርሱ ላከ፤ እርሱም፣ “የራሳቸውን ሕዝብ ከእጅህ ማዳን ያልቻሉትን የዚህን ሕዝብ አማልክት ለምን ትሻለህ?” አለው።

¹⁶እርሱም ይህን ሲናገር ንጉሡ፣ “የንጉሡ አማካሪ አድርገንሃልን? ተው! ለምን ትገደላለህ?” አለው። ነቢዩም ተወ፤ ነገር ግን፣ “ይህን ስላደረግህ፣ ምክሬንም ስላልሰማህ፣ አባታችን ሊያጠፋህ እንደ ወሰነ ዐውቃለሁ።” አለ።

¹⁷የይሁዳ ንጉሥ አማስያስ አማካሪዎቹን ካማከረ በኋላ፣ የዔሁ የልጅ ልጅ ለሆነው ለኢዮአሐዝ ልጅ ለእስራኤል ንጉሥ ለኢዮአስ፣ “ና፤ ፊት ለፊት በጦርነት እንገናኝ።” ብሎ ላከ።

¹⁸የእስራኤል ንጉሥ ኢዮአስ ለይሁዳ ንጉሥ ለአማስያስ መልሶ እንዲህ አለው፤ “በሊባኖስ የነበረ እሾህ በሊባኖስ ወደ ነበረ ዝግባ፣ ‘ልጅህን ለልጄ ሚስት አድርገህ ስጠኝ’ ብሎ ላከ፤ ነገር ግን በሊባኖስ የነበረ የዱር አውሬ ዐልፎ እሾሁን ረገጠው። ¹⁹አንተ፣ ‘እነሆ፣ ኤዶምን መታሁ’ ብለሃል፤ ልብህም ኮርቶ ትመካለህ። በቤትህ ተቀመጥ፤ አንተና ከአንተ ጋራ ያለው ይሁዳ አደጋ ፈልጋችሁ ለምን ትወድቃላችሁ?”

²⁰አማስያስ ግን አልሰማም፤ ይህም የኤዶምን አማልክት ስለ ሻቱ አሳልፎ ሊሰጣቸው ከአባታችን ዘንድ የሆነ ነበር። ²¹ስለዚህ የእስራኤል ንጉሥ ኢዮአስ ዘመተ፤ እርሱና የይሁዳ ንጉሥ አማስያስ በይሁዳ በምትገኘው በቤትሳሚስ ፊት ለፊት ተገናኙ። ²²ይሁዳም በእስራኤል ፊት ተሸነፈ፤ ሁሉም እያንዳንዱ ወደ ቤቱ ሸሸ።

²³የእስራኤል ንጉሥ ኢዮአስ፣ የኢዮአስ ልጅ የሆነውን የኢዮአሐዝ የልጅ ልጅ የሆነውን የይሁዳን ንጉሥ አማስያስን በቤትሳሚስ ማረከው፤ ወደ ኢየሩሳሌምም ወሰደው፤ ከኤፍሬም በር እስከ ማዕዘን በር ድረስ ያለውን ቅጥሯን ስድስት መቶ ጫማ ያህል አፈረሰ። ²⁴በዖቤድኤዶም ጥበቃ ሥር በአባታችን ቤት የተገኘውን ወርቅና ብር ዕቃውንም ሁሉ፣ ከቤተ መንግሥቱ ዕምቅ ሀብት ጋራ፣ ታጋቾችንም ወስዶ ወደ ሰማርያ ተመለሰ።

²⁵የይሁዳ ንጉሥ የኢዮአስ ልጅ አማስያስ፣ የእስራኤል ንጉሥ የኢዮአሐዝ ልጅ ኢዮአስ ከሞተ በኋላ ዐሥራ አምስት ዓመት ኖረ። ²⁶የቀረው የአማስያስ ሥራ ከመጀመሪያ እስከ መጨረሻ፣ በይሁዳና በእስራኤል ነገሥታት መጽሐፍ አልተጻፈምን? ²⁷አማስያስ አባታችንን ከመከተል ፈቀቅ ካለ በኋላ፣ በኢየሩሳሌም በእርሱ ላይ አደሙ፤ እርሱም ወደ ላኪስ ሸሸ። ነገር ግን ሰዎችን ወደዚያ ከኋላው ልከው ገደሉት። ²⁸በፈረስም ላይ አድርገው መልሰው አመጡት፤ በይሁዳ ከተማም ከአባቶቹ ጋራ ቀበሩት።