Sarki Mai Zuciya Rabe-rabe

Amaziya ya aikata abin da yake daidai a idon Ubanmu, amma ba da dukan zuciyarsa ba. Da aka yi masa gargaɗi, ya sallami sojojin Isra'ila da ya yi hayarsu, ya ci Edom, sa'an nan ya kawo allolin Edom gida ya bauta musu. Da aka sāke yi masa gargaɗi, ya rufe bakin annabin, ya tsokani Isra'ila da yaƙi, ya kuma rasa kansa da garu da kuma baitulmali.

Babi na 25.

Amaziya ya zama sarki yana da shekara ashirin da biyar, ya kuma yi sarauta shekara ashirin da tara a Urushalima. Sunan mahaifiyarsa Yehowaddan ce, mutuniyar Urushalima. Ya aikata abin da yake daidai a gaban Ubanmu, amma ba da zuciya ɗaya ba. Da sarautar ta tabbata a hannunsa, sai ya kashe fadawan nan da suka kashe mahaifinsa sarkin.

Amma bai kashe 'ya'yansu ba, yadda yake a rubuce cikin Shari'a, littafin Musa, inda Ubanmu ya umarta, “Kada a kashe iyaye saboda 'ya'yansu, ko 'ya'ya saboda iyayensu; kowa yă mutu saboda zunubin kansa.”

Amaziya ya tara mutanen Yahuda, ya shirya su bisa ga gidajen kakanninsu a ƙarƙashin shugabannin dubu-dubu da na ɗari-ɗari, wato dukan Yahuda da Benyamin. Ya ƙidaya waɗanda suka kai shekara ashirin zuwa sama; aka sami zaɓaɓɓun mutane dubu ɗari uku da suka isa yaƙi, masu riƙe da māshi da garkuwa. Ya kuma yi hayar jarumawa dubu ɗari masu ƙarfi daga Isra'ila da azurfa kusan laba dubu bakwai da ɗari biyar. Sai wani mutumin Ubanmu ya zo wurinsa ya ce, “Ya sarki, kada ka bar sojojin Isra'ila su tafi tare da kai, gama Ubanmu ba ya tare da Isra'ila, wato dukan mutanen Ifraimu nan. Ko da ka yi yaƙi da jaruntaka, Ubanmu zai kā da kai a gaban abokan gāba, gama Ubanmu yana da iko yă taimaka ko yă kā da.”

Amaziya ya tambayi mutumin Ubanmu ya ce, “To, amma fa azurfar nan kusan laba dubu bakwai da ɗari biyar da na ba sojojin Isra'ila?” Ya amsa ya ce, “Ubanmu yana iya ba ka fiye da haka ƙwarai.”

Saboda haka Amaziya ya sallami sojojin nan da suka zo masa daga Ifraimu, ya aike su gida. Suka husata ƙwarai da mutanen Yahuda, suka koma gida cike da fushi.

Amma Amaziya ya ƙarfafa zuciyarsa, ya jagoranci mutanensa zuwa Kwarin Gishiri, ya kuma karkashe mutanen Seyir dubu goma. Mutanen Yahuda kuma suka kama dubu goma da rai, suka kai su kan ƙwaryar dutse, suka jefar da su ƙasa, dukansu kuwa suka farfashe. A halin da ake ciki, sojojin nan da Amaziya ya mayar da su baya, bai bar su su shiga yaƙin ba, suka kai wa biranen Yahuda hari daga Samariya zuwa Bet-horon, suka karkashe mutane dubu uku, suka kuma kwashe ganima mai yawa.

Bayan Amaziya ya ci Edomawa da yaƙi, sai ya dawo da gumakan mutanen Seyir, ya kafa su su zama alloli nasa, ya rusuna musu, ya kuma ƙona musu hadaya. Saboda haka fushin Ubanmu ya ƙuna a kan Amaziya, sai ya aiki wani annabi, wanda ya tambaye shi ya ce, “Me ya sa kake neman gumakan mutanen nan, waɗanda ba su iya ceton mutanensu daga hannunka ba?”

Yayinda yake magana, sai sarkin ya ce masa, “Ashe, mun naɗa ka mashawarcin sarki ne? Ka yi shiru! Don me za a kashe ka?” Sai annabin ya yi shiru, amma ya ce, “Na san Ubanmu ya ƙudurta yă hallaka ka, domin ka yi haka, ba ka kuwa saurari shawarata ba.”

Amaziya sarkin Yahuda ya nemi shawarar mashawartansa, sa'an nan ya aika wa Yowash ɗan Yehowahaz, ɗan Yehu, sarkin Isra'ila, cewa, “Zo, mu fuskanci juna a yaƙi.”

Yowash sarkin Isra'ila ya amsa wa Amaziya sarkin Yahuda ya ce, “Wata ƙaya a Lebanon ta aika wa wani itacen al'ul a Lebanon, cewa, ‘Ka ba da 'yarka ta zama matar ɗana.’ Amma sai wani naman jeji a Lebanon ya wuce, ya tattake ƙayan. Ka ce, ‘Duba, na ci Edom da yaƙi,’ zuciyarka kuwa ta cika da girman kai, kana fariya. Ka zauna a gida. Don me za ka jawo wa kanka masifa har ka fāɗi, kai da Yahuda tare da kai?”

Amma Amaziya bai saurara ba, gama wannan daga Ubanmu ne, domin yă bashe su saboda sun nemi gumakan Edom. Saboda haka Yowash sarkin Isra'ila ya haura, shi da Amaziya sarkin Yahuda kuwa suka fuskanci juna a Bet-shemesh, wadda take a Yahuda. Isra'ila ta ci Yahuda da yaƙi, kowane mutum kuwa ya gudu zuwa gidansa.

Yowash sarkin Isra'ila ya kama Amaziya sarkin Yahuda, ɗan Yowash, ɗan Yehowahaz, a Bet-shemesh, ya kai shi Urushalima, ya rushe katangarta daga Ƙofar Ifraimu zuwa Ƙofar Kusurwa, wajen ƙafa ɗari shida. Ya kwashe dukan zinariya da azurfa da kuma kayan da aka samu a cikin gidan Ubanmu a ƙarƙashin kulawar Obed-edom, da dukiyar fada, da waɗanda aka kama a jingina, ya koma Samariya.

Amaziya ɗan Yowash, sarkin Yahuda, ya yi shekara goma sha biyar da rai bayan mutuwar Yowash ɗan Yehowahaz, sarkin Isra'ila. Sauran ayyukan Amaziya, daga farko zuwa ƙarshe, ashe, ba a rubuce suke ba a cikin Littafin Sarakunan Yahuda da Isra'ila? Bayan Amaziya ya juya daga bin Ubanmu, sai aka ƙulla masa maƙarƙashiya a Urushalima, shi kuwa ya gudu zuwa Lakish. Amma suka aiki mutane bayansa a can, suka kashe shi. Suka dawo da shi a kan doki, suka binne shi tare da kakanninsa a Birnin Yahuda.