2 ዜና መዋዕል 26

26 ¹የይሁዳ ሕዝብ ሁሉ ዐሥራ ስድስት ዓመት የሆነውን ዖዝያን በአባቱ በአማስያ ፈንታ አነገሡት። ²ንጉሡ ከአባቶቹ ጋራ ካረፈ በኋላ፣ ኤሎትን ዳግመኛ ሠርቶ ወደ ይሁዳ መለሳት። ³ዖዝያ በነገሠ ጊዜ ዐሥራ ስድስት ዓመቱ ነበር፤ በኢየሩሳሌምም ኀምሳ ሁለት ዓመት ነገሠ። እናቱ የኢየሩሳሌም ሰው የሆነች ይኮልያ ትባል ነበር። ⁴አባቱ አማስያ እንዳደረገው ሁሉ፣ በአባታችን ፊት ቅን የሆነውን አደረገ። ⁵አባታችንን መፍራት ባስተማረው በዘካርያስ ዘመን፣ አባታችንን በመፈለግ ራሱን ሰጠ፤ አባታችንንም በፈለገ ጊዜ ተከናወነለት።

⁶ወጥቶ ፍልስጥኤማውያንን ተዋጋ፤ የጌትን፣ የያብኔንና የአሽዶድን ቅጥር አፈረሰ። በአሽዶድ አካባቢና በፍልስጥኤማውያን መካከል ከተሞችን ሠራ። ⁷አባታችን በፍልስጥኤማውያን፣ በጉርብኣል በሚኖሩ ዐረቦችና በምዑናውያን ላይ ረዳው። ⁸አሞናውያን ለዖዝያ ግብር ከፈሉ፤ እጅግ ኀያል ስለ ሆነ ዝናው እስከ ግብፅ ድንበር ደረሰ። ⁹ዖዝያ በኢየሩሳሌም በማእዘን በር፣ በሸለቆ በርና በማእዘኑ ላይ ግንቦችን ሠራ፤ አጠነከራቸውም። ^a a v9 ማእዘኑ ከተጠቀሱት በሮች የተለየ፣ ከኢየሩሳሌም ከተማ ቅጥር ወጣ ብሎ የወጣ የተለየ ክፍል ነበር። ¹⁰በቈላማውና በሜዳ ብዙ መንጋ ስለ ነበረው፣ በምድረ በዳ ግንቦችን ሠራ፤ ብዙ የውሃ ጒድጓዶችንም ቈፈረ። መሬትን ይወድ ስለ ነበር፣ በተራራማውና ለም በሆነው ዕርሻ ገበሬዎችንና ወይን ጠባቂዎችን አኖረ። ¹¹ዖዝያ በጦር ክፍል ተከፍሎ ወደ ውጊያ የሚወጣ የሰለጠነ ወታደር ነበረው፤ ይህም ጸሐፊው ይዒኤልና ሹሙ መዐሤያ፣ ከንጉሡ አዛዦች በአንዱ በሐናንያ ሥር ቈጥረውታል። ¹²ኀያላኑን ተዋጊዎች የሚመሩ የቤተ ሰብ አለቆች ጠቅላላ ቍጥር ሁለት ሺህ ስድስት መቶ ነበር። ¹³በትእዛዛቸውም ሥር ንጉሡን በጠላቶቹ ላይ ለመርዳት፣ በታላቅ ኀይል ለመዋጋት የሰለጠነ ሦስት መቶ ሰባት ሺህ አምስት መቶ ሰራዊት ነበር። ¹⁴ዖዝያ ሰራዊቱን ሁሉ በጋሻ፣ በጦር፣ በራስ ቍር፣ በጥሩር፣ በቀስትና በወንጭፍ ድንጋይ አስታጠቀ። ¹⁵በኢየሩሳሌም ቀስት ለመወርወርና ትልልቅ ድንጋዮች ለመፈንቀል በግንቦችና በማእዘኖች ላይ የሚቀመጡ፣ በዐዋቂ ሰዎች የተፈጠሩ መሣሪያዎችን ሠራ። እስኪበረታ ድረስ በድንቅ ሁኔታ ስለ ተረዳ ዝናው ሩቅ ድረስ ተሰማ።

የዖዝያ ትዕቢትና ውድቀቱ

¹⁶ዖዝያ በበረታ ጊዜ ልቡ ኰራ፤ ይህም ወደ ጥፋቱ መራው። በዕጣን መሠውያ ላይ ዕጣን ለማጠን ወደ አባታችን ቤተ መቅደስ ገብቶ በአባታችን ላይ ታማኝነቱን አጓደለ። ¹⁷ካህኑ አዛርያስ ከአባታችን ካህናት ጋራ የሆኑ ሰማንያ ቈራጥ ካህናትን ይዞ ተከትሎት ገባ። ¹⁸ንጉሡን ዖዝያን ተቋቁመው እንዲህ አሉት፤ “ዖዝያ ሆይ፣ ለአባታችን ዕጣን ማጠን የአንተ ሥራ አይደለም፤ ዕጣን ለማጠን የተቀደሱት የአሮን ዘሮች የሆኑት ካህናት ነው እንጂ። ከመቅደሱ ውጣ፤ ታማኝነትህን አጓድለሃልና፤ ይህም ከአባታችን ዘንድ ክብር አያስገኝልህም።”

¹⁹ዖዝያም እጅግ ተቈጣ። ዕጣን ለማጠን ጥና ማጠኛ በእጁ ይዞ በካህናቱ ላይ ሲቈጣ፣ በአባታችን ቤት ባሉት ካህናት ፊት፣ በዕጣኑ መሠውያ አጠገብ፣ በግንባሩ ላይ የሚያረክስ የቈዳ በሽታ ወጣ። ²⁰ሊቀ ካህናቱ አዛርያስና ካህናቱ ሁሉ ወደ እርሱ ዘወር ብለው በግንባሩ ላይ ያለውን በሽታ ባዩ ጊዜ፣ ፈጥነው አስወጡት፤ አባታችንም ስለ መታው እርሱ ራሱ ለመውጣት ቸኰለ። ²¹ንጉሡ ዖዝያ እስከ ሞቱ ድረስ በበሽታው ተይዞ ኖረ። ከበሽታው ሳይፈወስ፣ ከአባታችን ቤት ተለይቶ፣ ብቻውን በተለየ ቤት ኖረ። ልጁ ኢዮአታምም ቤተ መንግሥቱን ይመራ፣ የምድሪቱንም ሕዝብ ያስተዳድር ነበር።

²²የቀረውን የዖዝያን ሥራ ከመጀመሪያው እስከ መጨረሻው፣ የአሞጽ ልጅ ነቢዩ ኢሳይያስ ጻፈው። ²³ዖዝያም ከአባቶቹ ጋራ ዐረፈ፤ “የቈዳ በሽታ ነበረበት” ብለዋልና፣ ለነገሥታት በሆነው የመቃብር ሜዳ በአቅራቢያቸው ተቀበረ። ልጁም ኢዮአታም በእርሱ ፈንታ ነገሠ።