Pitri ke bisara ekjon Raja
Zechariah tai ke sikhai thaka homoi Uzziah amar Pitri ke bisare, aru tai laga sob bhal hoi: minar khan, pani laga kuwa khan, kheti laga mati, sikhai luwa sena-dal, deewal bhangai bole yantra khan. Titia mojbut tu ohonkar hoi jai. Tai joborjosti bhitor te ghusi kene dhoop jolai diye, aru bedi laga usor te tai laga kopal te chamra laga bemar ulai jai.
26 1Tetiya Judah laga sob manuh khan pora, solo saal umor thaka Uzziah ke, tar laga pitri Amaziah laga jaga te raja bonaise. 2Raja tu tar laga baba-purush khan logot te ghumai juwa pichete, tai pora Eloth ke aru notun kori bonaise aru eitu ke Judah logot wapas dise. 3Uzziah solo saal umor te raja hoise aru Jerusalem te panchas-dui saal raj korise. Tar laga ama tu Jerusalem laga Jecoliah thakise. 4Tar laga pitri Amaziah pora kora nisena, tai amar Pitri laga suku te thik thaka kaam korise. 5Zechariah laga din khan te, kun pora tai ke amar Pitri ke bhoi koribole sikhaise, tai nijor ke amar Pitri ke bisaribole dise; aru jitia tai amar Pitri ke bisarise, tai bhal pai thakise.
6Tai bahar ulai kene Philistine manuh khan logot juddho korise, aru Gath, Jabneh, aru Ashdod laga deal khan bhangai dise. Tai Ashdod usor te aru Philistine khan majot te sheher khan bonaise. 7Amar Pitri pora tai ke Philistine khan, Gur-baal laga Arab khan, aru Meun manuh khan bhirodh te modot korise. 8Ammon manuh khan pora Uzziah ke kor dise, aru tai bisi takot hoija karone, tar laga naam Egypt laga simana tak punchi jaise. 9Uzziah pora Jerusalem te Kona Duar, Upotyaka Duar, aru Angle te buruj khan bonaise, aru eitu khan ke mojbut korise. a a v9 Angle tu Jerusalem laga sheher deal laga ekta bahar ulai thaka bishesh bhag thakise, naam diya duar khan pora alag thakise. 10Tai morubhumi te buruj khan bonaise aru bisi pani-kup khan khundise, kilemane tar laga niche jaga aru samthol te dangor goru-mer laga jhak thakise. Tai pahar khan aru bhal kheti jaga khan te kheti kora manuh aru angur-bagan kora manuh khan rakhise, kilemane tai mati ke morom korise. 11Uzziah laga, bhag-bhag te juddho te ulai juwa, sikhai luwa sipahi khan laga ekta dol thakise, kunba ke likha-manuh Jeiel aru afsar Maaseiah pora, raja laga senapati khan majot te ekjon Hananiah laga niche te, ginti korise. 12Takot thaka juddha manuh khan ke cholai thaka ghor-pariwar laga mukhiya khan laga sob ginti dui-hajar choy-soh thakise. 13Taikhan laga hukum laga niche te tin-lakh saat-hajar panch-soh sipahi laga ekta dol thakise, kunkhan ke dangor takot pora juddho koribole sikhaise, raja ke tar laga dushman khan bhirodh te modot koribole. 14Uzziah pora pura sipahi dol ke dhal, borsa, loha-topi, juddho laga loha-kapra, dhanuk, aru guli-mara pathor khan dise. 15Jerusalem te tai, gyaani manuh khan pora bonai luwa jontro khan bonaise, juntu khan ke tir mari bole aru dangor pathor khan phelabole buruj khan aru kona khan te bohaise. Tai takot nohua tak asurit pora modot pai thaka karone, tar laga naam dur-dur tak punchi jaise.
Uzziah laga ahankar aru tar laga binash
16Jitia Uzziah takot hoise, tar laga mon ahankari hoi jaise, aru eitu pora tar laga binash anise. Tai amar Pitri logot te biswasghati hoise, aru dhup jolai diya bedi te dhup jolai dibole amar Pitri laga mondir bhitor te ghusi jaise. 17Purohit Azariah tar laga pichete bhitor te ghusise, amar Pitri laga asi-jon saahosi purohit khan logot te. 18Taikhan Raja Uzziah ke rukhai kene koise, “Uzziah, amar Pitri ke dhup jolai dibo tu tumar kaam nohoi, kintu dhup jolai dibole alag kori rakha purohit khan, Aaron laga bongsho khan laga kaam ase. Pobitro jaga pora ulai jabi; tumi biswasghati hoise, aru eitu pora amar Pitri laga usor pora tumi ke eku ijjot nadibo.”
19Uzziah bisi khong uthise. Dhup jolai dibole tar laga hath te dhup-patro loi kene, jitia tai purohit khan uporte khong korise, tetiya tar laga kopal te letera kora ekta chamra-bemar ulai ahise—ta te amar Pitri laga ghor te purohit khan laga age te, dhup laga bedi laga usorte. 20Jitia mukhyo purohit Azariah aru sob purohit khan tai phale ghuri kene tar laga kopal te bemar tu dikhise, taikhan tai ke joldi bahar ulai dise, aru amar Pitri pora tai ke marise karone, tai bhi joldi ulai jaise. 21Raja Uzziah ke tai mora tak eitu bemar thakise. Tai ekta alag ghor te thakise, etiya bhi bemar logote, aru amar Pitri laga ghor pora alag kori diya thakise. Tar laga chokra Jotham pora raja-ghor cholaise, aru desh laga manuh khan ke shason korise.
22Uzziah laga bakisti kaam khan, shuru pora hekh tak, Amoz laga chokra bhabobadi Isaiah pora likhise. 23Uzziah tar laga baba-purush khan logot te ghumai jaise, aru raja khan laga kobor-kheti te taikhan laga usorte tai ke moidam dise, kilemane taikhan koise, “Tai ke chamra-bemar thakise.” Aru tar laga chokra Jotham tar laga jaga te raj korise.